Lənkəran, gözəl diyar, Doğma şəhərim mənim!

(əvvəli ötən sayımızda)

Gözəldir bu yerlərin səfası

Paytaxtdan 268 kilometr məsafədə yerləşən, 2 şəhəri, 8 qəsəbəni, 83 kəndi özündə birləşdirən Lənkəranın çox zəngin və ecazkar təbiəti var. Dənizi, dağları, yaşıl ormanları olan rayonda turizm də elə buna görə xeyli inkişaf etmişdir.

Bunu Azərbaycan Prezidenti cənab İlham Əliyev belə ümumiləşdirmişdir: "Lənkəran bölgəsində turizmin inkişafı üçün hər bir şərait vardır.

Subtropik zonaya xas təkrarsız təbiəti, dağ və meşələrlə əhatə olunması Xəzər dənizi sahilində Lənkərana böyük şöhrət qazandırmışdır. Bununla yanaşı, bölgə zəngin tarixi və hər bir turistdə maraq oyada bilən çoxəsrlik xalq sənəti ənənələri ilə tanınır. Bütün bunlar bölgədə turizmin daha da inkişaf etdirilməsinə geniş imkan yaradır".

Bu mənada Lənkəranda son illərdə müasir üslubda inşa edilmiş, bütün tələblərə cavab verən bir neçə turizm obyektləri, istirahət mərkəzləri, kurort-sanatoriya, mehmanxanalar müsafirlərin ixtiyarına verilmişdir. Bütün bunlar Lənkərana iqtisadi gəlir gətirməklə bərabər, həm də bölgənin daha yaxşı tanınması üçün bir vasitədir.

Son illərdə inşa edilmiş belə obyektlərin biri də "Qafqaz" mehmanxanasıdır. Burda təşkil edilmiş bütün xidmət sahələri insanların mədəni istirahətinə hesablanmışdır. Həm də cənub bölgəsinin zəngin mətbəxini göstərməklə bu yerlərin füsunkar təbiətini nümayiş etdirir.

Bir daha vurğulayırıq ki, Lənkəranın çox zəngin təbiəti imkan verir ki, burda turizmin sürətlə inkişaf etdirilməsi sözün həqiqi mənasında öz həllini tapmış olsun. Azərbaycan Prezidenti İlham Əliyevin sərəncamı ilə 2011-ci ilin Azərbaycanda "Turizm ili" elan edilməsi də məhz ölkədə bu sahəyə diqqətdən, qayğıdan xəbər verir.

Dediyimiz kimi, dövrün bu vacib tələbini ödəmək, insanlara daha yaxşı xidmət etmək üçün bu şəbəkənin genişləndirilməsi qaçılmazdır.

2011-ci ilin birinci yarısında Lənkəran şəhərində 16 nəfərlik "Xan-Lənkəran" otel binası, Sütəmurdov kəndində "Palmalife" turizm istirahət kompleksi inşa edilmişdir.

Bütün bunların nəticəsidir ki, Lənkərana gələn turistlərin sayı son zamanlar xeyli çoxalmışdır. Əgər 2010-cu ildə rayona cəmi 8 minə yaxın turist gəlmişdisə, 2011-ci ilin birinci yarısında turistlərin sayı 7 min nəfəri ötmüşdür.

Təbiət bəzən şıltaqlığı sevir

İndi Lənkəranda son bahar - payız - bütün gözəlliyi ilə təbiətə hakim kəsilmişdir. Onsuz da gözəl olan bu şəhər bu payız günlərində bir az da axar-baxarlı olmuşdur.

Ancaq payızın əvvəllərində, sentyabrın 16-dan başlayan intensiv leysan yağışları rayonda bir çox problemlər yaratmağa müvəffəq olmuşdur. Lənkəranın Rvo, Şovu, Təngivan, Əşlə, Veravul, Vilvan, Osaküçə, Biləsər və digər kəndləri yağış sularına qərq olmuşdur.

Ölkə əhalisinin müxtəlif televiziya kanallarından da seyr etdiyi bu görüntülər doğrudan da çox böyük təbii fəlakət idi. Burdakı yollar, körpülər, suötürücü qurğular sıradan çıxmışdır. Şəxsi təsərrüfatlara, yaşayış evlərinə, ev heyvanlarına xeyli ziyan dəymişdir.

Təbii fəlakətin nəticələrini aradan qaldırmaq üçün Lənkəran Şəhər İcra Hakimiyyətinin başçısı Tofiq İbrahimovun sədrliyi ilə rayon Fövqəladə Hallar Komissiyasının təcili iclası çağırılmışdır.

Əlaqədar təşkilatların rəhbərlərinə müvafiq tapşırıqlar verilmiş, problemlərin qısa vaxtda aradan qaldırılması tələb edilmişdir. Təbii fəlakətin nəticələrini aradan qaldırmaqda Fövqəladə Hallar Nazirliyinin Lənkəran Regional İdarəsinin əməkdaşları öz texnikaları ilə daha fəal iştirak etmişlər. Qısa müddətdə Lənkəran-Lerik magistral yolunun dağılmış hissələri bərpa olunmuşdur.

Veravul, Vilvan, Osaküçə, Günəhir kəndlərində isə iri körpü tikintiləri artıq başa çatmışdır.

Yazıya vacib əlavə

Lənkərandan hazırladığımız bu yazıda müxtəlif rəsmi rəqəmlərin arxasında heç şübhəsiz ki, rayonun sosial-iqtisadi inkişafı dayanır.

Elə təkcə şəhərin özündə son bir ildə tikilən müasir, yaraşıqlı evlər, sahibkarlıq fəaliyyəti üçün inşa edilən göz oxşayan obyektlər, istirahət və ticarət mərkəzləri kifayət qədər çoxalmışdır və hər gün bunun miqyası xeyli genişlənməkdədir. Sakinlərin, sadə kənd adamlarının dediklərinə görə, bütün bunlar 2010-cu ilin aprelindən Lənkəran şəhərinə İcra Hakimiyyətinin başçısı təyin edilən Tofiq İbrahimovun əməyi nəticəsindədir. Bu rayondakı demokratik ab-hava, insanlara diqqət və qayğı Tofiq müəllimin zəhmətsevər lənkəranlılara səmimi münasibətindən qaynaqlanır. Səmimiyyət olan yerdə isə uğur və fərəh daimidir.

Səxavət Məmmədli,

Azərbaycan Respublikasının Prezidenti

yanında kütləvi informasiya vasitələrinin

inkişafına dövlət dəstəyi fondunun maliyyə

yardımı ilə

Ədalət.-2011.-14 oktyabr.- S.7.