FEYZİYYƏ

-deyirlər, gecələr piano səslənir otağımda.

-mən piano çalmağı sevirəm.

-bilirəm, amma sənin pianon yox

- ola bilər.

- səni tez-tez görürlər.

- harda?

- orda, uzaqlarda

- nə olsun.

- axı sən eləcə burdasan, həmişə

- burdag yaxında

- bəlkə də

- bəs niyə hər yerə yazırsan

- betta, betta, betta

- bilmirəm

- mənsə bilirəm

- nəyi?

- çox şeyi

məsələn, sevmirsən yüksəkliyi

amma hər gecə çıxırsan binaların damına,

ocaq qalamağa.

- neçəsini - birini, ikisini?

- heç görmədim, deyirlər

- bəs səncə,

çoxmu şey istəyər balınclar

gecənin qaranlığında

sürmə izlərinə toxunmadığı tək

nəmini saxlasaydı balıncların,

qurutmasaydı qaranlıqlar,

sabahlar da bir baxsaydı,

bir görsəydi

nə olacaqdı ki

kimsə bilməz,

sızıldayan nəmli barmaqların yazdığı

mesajlar

ünvanına gülüş işarəsi ilə çatar

sən də tutmusan ki, deyirlərgdeyirlər

neynək, deyirlər, deyirlər də

***

nə özüm qəribəm, nə qəribim var,

bircə öz ömrümçün qəribsəyirəm.

yollar da yolumdan oğurlanıbdı,

əllərim qoynumda yol gözləyirəm.

bir ümid əlini qoyub çiynimə,

bir yalan köksümü içəri basır.

gözlərim sevinci geyib əynimə,

ürəyim qorxudan boynunu qısır.

hamının yerinə özüm yaşadım,

hamının yerinə özüm ölmüşəm.

yüklənib çoxunun dərdin daşıdım,

görün neçə ömrə şərik gəlmişəm.

kaş ki, öz ömrüm də gələydi bir gün,

çıxıb yad ömürdən özüm olaydım.

sevincdən, ümiddə bəzənib hər gün,

ömrümlə baş-başa, yalnız qalaydım.

gəzdim öz ömrümü yad yuxularda,

birində xəzanam, birində qaram.

göndərdim özümü ömür dalınca,

indi nə ömrüm var, nə özüm varam.

***

mən yarımçıq hörülmüş,

nahamar suvamış divardan asılan

çərçivəyə çalınmış rəsm əsəriyəm-

məni hardan,

hansı üzünə,

necə asırsınız asın-

bircə çərçivəmdən çıxarmayın!

çərçivə əsərlərin sərhəd çızığı,

qoruq xətiddi.

çərçivədən çıxanların sonu,

elə cızığından çıxanların aqibəti kimidi.

hər iki halda aqibət

üstdən çalın-çarpaz

çəkilmiş xətlər-cızıqlardı.

***

yuxudu, hər şey yuxudu,

bircə gerçəyi yoxudu,

elə dünyanın oxudu,

gəlib keçir içimizdən.

susanlar sözə susayır,

sönənlər közə susayır,

özgələr bizə susayır,

gəlib içir içimizdən.

ayıqdı yatanlar, ayıq,

yatanlar hamıdan sayıq,

ömür - yuxulu bir qayıq,

üzüb keçir içimizdən.

Ədalət.-2011.-15 oktyabr.-S.20.