Ümumtəhsil sistemində müasirləşmə dövrü

(mövzu əsasında VI yazı)

Azərbaycan reallığında

Xalqımız dövlət müstəqilliyinin bərpa edilməsinin 20-ci ildönümünü bayram edir. Davamlı inkişaf tərəqqi və yüksəliş prosesi bu gün müstəqil Azərbaycanın siyasi simasını müəyyənləşdirir. Bütün sahələrdə yeniləşən respublikamız beynəlxalq aləmdə mövqelərini ildən-ilə möhkəmləndirir. Hazırda dünyanın əksər ölkələri iqtisadi çətinliklərlə üzləşdiyi halda, möhtərəm Prezidentimizin düzgün daxili və xarici siyasəti nəticəsində Azərbaycan ildən-ilə böyük nailiyyətlərə imza atır. Bu gün Azərbaycanın hər bir bölgəsi böyük tikinti meydanını xatırladır. Rayonlara, qəsəbələrə şəhər simasının gətirilməsi əyalət insanlarının mənəvi-psixoloji ovqatını, firavan gələcəyə inamını daha da artırır. Ölkə vətəndaşları yaxşı başa düşürlər ki, çətin və ağrılı günlər arxada qalmışdır. Qarşıda sürətli iqtisadi və mədəni uğurları, demokratik inkişaf səviyyəsi ilə dünya arenasında layiqli mövqeyini təmin edən qüdrətli və əzəmətli Azərbaycan görünür.

Azərbaycan Respublikasının Prezidenti cənab İlham Əliyevin 11 iyul 2011-ci il tarixli sərəncamı ilə "2011-2021-ci illərdə Azərbaycan təhsilinin inkişafı üzrə Milli Strategiya"nın hazırlanması ilə bağlı Dövlət komissiyasının yaradılması ölkəmizin içtimai-siyasi və sosial həyatında ən mühüm və əhəmiyyətli hadisə olmuşdur. Müstəqil Azərbaycanda informasiya cəmiyyətinin təşəkkülünü və biliklərə əsaslanan iqtisadiyyata keçid şəraitində yeni təhsil modelinin qurulmasını təmin edəcək Milli Strategiyanın hazırlanması təhsilin inkişafının dövlət siyasəti səviyyəsində prioritet istiqamət kimi nəzərdə tutulmasına, ölkə Prezidentinin təhsil sahəsinə göstərdiyi müntəzəm diqqət və qayğıya əyani sübutdur.

"Təhsil haqqında" Azərbaycan Respublikası Qanununa və Azərbaycan Respublikasının Prezidenti cənab İlham Əliyevin həmin Qanunun təsdiq edilməsi barədə 5 sentyabr 2009-cu il tarixli fərmanına uyğun olaraq, ümumi təhsil sahəsində təhsil orqanlarının, ümumtəhsil məktəblərinin, pedaqoji işçilərinin fəaliyyətini tənzimləyən normativ-hüquqi sənədlər, o cümlədən "Ümumi təhsil pilləsinin dövlət standart və proqramları (kurrikulumları)", "Ümumi təhsil məktəbinin Nümunəvi Nizamnaməsi", "Ümumi təhsil pilləsinin təhsil haqqında dövlət sənədlərinin nümunələri və onların verilməsi qaydası", "Ümumi təhsili xüsusi nailiyyətlərlə başa vuran məzunların qızıl və ya gümüş medalla təltif olunma Qaydası", "Təhsil Proqramlarının (kurrikulumların) yerinə yetirilməsi müddəti", "Ümumi təhsil müəssisəsinin Pedaqoji Şurası haqqında əsasnamə" müəyyən olunmuş qaydada təsdiq edilmişdir.

Ağdaşda təhsilə xüsusi yanaşma

Bütün bu mühüm məsələlər Ağdaş rayonunda da təhsil sistemində aparıcı istiqamət olaraq həyata keçirilməkdədir. Rayon rəhbərliyinin təhsilə münasibəti müntəzəm qayğı və diqqəti xüsusi qeyd olunmalıdır.

2010-2011-ci dərs ilində rayonda 68 ümumtəhsil məktəbi, o cümlədən 41 tam orta, 18 ümumi orta, 9 ibtidai məktəb fəaliyyət göstərmişdir.

Ötən il rayonun ümumtəhsil məktəblərində 14434 nəfər şagird təhsil almışdır. Onların təlim-tərbiyəsi ilə 2254 nəfər müəllim məşğul olmuşdur. 3 məktəbdənkənar tərbiyə müəssisəsində isə 1693 nəfər məktəblinin asudə vaxtı səmərəli təşkil olunur. Ağdaş rayon təhsil şöbəsinin müdiri Lütvi Paşayevlə söhbətimiz zamanı bildirdi ki, yeni dərs ilinə hazırlıq sahəsində görülən işlərdən biri də məktəblərin maddi-texniki bazasının möhkəmləndirilməsidir. Son illər dövlət tərəfindən yeni məktəb tikintisi, məktəblərin əsaslı təmiri ilə yanaşı mövcud məktəblərin maddi-texniki bazasının möhkəmləndirilməsinə də xüsusi diqqət yetirilir. Bircə faktı qeyd etmək yerinə düşər ki, cəmi 8-10 il bundan əvvəl məktəblərdə inventar və avadanlığa böyük ehtiyac olduğu halda, bu gün məktəblər lazımi qədər inventar və avadanlıqla təmin edilmişdir. Bununla belə, hər il dövlət büdcəsindən inventar və avadanlıq alınması üçün xeyli vəsait ayrılır. Qarşıdakı tədris ilində məktəblərin inventar və avadanlığa olan tələbatını ödəmək üçün yerli büdcədən 70 min manat vəsait ayrılmışdır.

2010-2011-ci tədris ilində rayonun ümumtəhsil məktəblərində təhsil alan bütün şagirdlər dövlət tərəfindən pulsuz dərsliklərlə tam təmin edilmişdir. Yeni tədris ili üçün Təhsil Nazirliyindən 70 adda, 72768 manat dəyərində 34677 ədəd dərslik gətirilərək məktəblərə paylanmışdır. Dərsliklərin gətirilməsi davam etdirilir.

Maddi-texniki bazanın möhkəmləndirilməsi, əsaslı təmir və yeni məktəb tikintisi

Yeni dərs ilinə hazırlıqla əlaqədar məktəb rəhbərləri ilə xüsusi müşavirə keçirilmiş, RTŞ-də geniş tədbirlər planı hazırlanıb təsdiq edilmişdir. Hər bir məktəbdə görüləcək işlər müəyyənləşdirilmişdir.

Məktəblərin əsaslı və cari təmiri üçün yerli büdcədən 35200 manat vəsait ayrılmışdır. Bu vəsait hesabına Qəsil kənd tam orta, Zeynəddin kənd ümumi orta, Aşağı Qəsil kənd ibtidai məktəblərində əsaslı təmir işləri aparılmışdır.

Respublika Təhsil Nazirliyinin sifarişi ilə şəhər S.Vurgun adına tam orta məktəbin əsaslı təmiri üçün 1 milyon 263 min manat, Aşağı Nemətabad kənd ümumi orta məktəbin əsaslı təmiri üçün 400 min manat vəsait ayrılmışdır. Hər iki məktəbdə görülən işlər yekunlaşmaq üzrədir.

Ümumiyyətlə 2011-ci ildə təhsil müəssisələrinin təmiri üçün bələdiyyələrin köməkliyi ilə 15598 manat, daxili imkanlar hesabına 47857 manat və büdcə vəsaiti hesabına 1.722.204 manat, cəmi: 1.756.359 manatlıq iş görülmüş, bütün təhsil müəssisələri yeni dərs ilinə hazırlanmışdır.

Bu günlərdə isə 3 məktəbin-Qəribli kənd tam orta, Şordəhnə və Ovculu kənd ümumi orta məktəblərin tikintisinə başlanmışdır. Son üç ildə 3 məktəb- Qaradeyin, Yuxarı Ləki kənd tam orta və Gürcuva kənd ümumi orta məktəbləri tikilib istifadəyə verilmişdir. 15 məktəbdə istilik sistemi və duru yanacaqla işləyən qazanxana vardır və hamısı da payız-qış mövsümünə hazırdır.

(ardı gələn sayımızda)

Məzahir Əhmədoğlu

Ədalət.-2011.-18 oktyabr.-S.7.