XALQIN SAĞLAMLIĞINA VƏ GƏLƏCƏYİNƏ HESABLANAN DÖVLƏT QAYĞISI

(əvvəli ötən sayımızda)

İnfeksion xəstəliklərlə "müharibə" sona çatır

Aparılan profilaktik tədbirlər nəticəsində uzun illərdir ki, rayonda qızılca, məxmərək, qarayara, difteriya, tetanus və poliomelitlə xəstələnmə qeydə alınmır. Malyariya ilə xəstələnmələrin də kökü kəsilir. Keçən il bir halda bu cür xəstələnmə baş vermişdir.

Uşaqlar arasında ölüm, o cümlədən evdə ölüm halları əvvəlki illərlə müqayisədə xeyli azalmış, bu istiqamətdə aparılan tədbirlər daha effektiv şəkil almışdır. Keçən il rayonda infeksion xəstəliklərin profilaktikası məqsədilə 24120 vaksinasiya və revaksinasiya tədbirləri aparılmışdır. 2010-cu ilin oktyabr ayından başlayaraq müraciətimizə əsasən Səhiyyə Nazirliyi Ağdaş rayonunda göz xəstəliklərinə düçar olmuş xəstələrin yerlərdə müayinə olunmaları, sonradan onların üzərində cərrahiyyə əməliyyatlarının aparılması üçün Akademik Zərifə Əliyeva adına Elmi-Tədqiqat Göz Xəstəlikləri İnstitutuna göstəriş vermiş, institutun əməkdaşları 3 dəfə rayonda olmuş, 200 nəfərdən çox xəstəni müayinə etmişlər.

İslahatlar, yeniliklər...

... Səhiyyədə islahatlar və ilkin səhiyyə xidmətlərinin gücləndirilməsi tədbirləri proqramına uyğun olaraq Ağdaş MRX-nın 6 nəfər həkimi Türkiyə Respublikasının paytaxtı Ankarada ixtisasartırma kursları keçmişdir. Orta tibb işçiləri də bu cür kurslara cəlb edilmişlər...

Mövcud tibb müəssisələri də müasirləşir

Öyrənirik ki, il ərzində Ağdaş MRX-da və uşaq poliklinikasında büdcə vəsaiti və daxili imkanlar hesabına əsaslı cari təmir işləri aparılmışdır. Eyni zamanda rayonun səhiyyə müəssisələrinin tibb ehtiyacları üçün büdcə vəsaiti ilə 82500 manatlıq müxtəlif tibb avadanlıqları, yumşaq və bərk inventarlar alınıb paylanmışdır.

Mərkəzi Rayon Xəstəxanasının həyətyanı sahəsində əlavə olaraq 300-dək müxtəlif bəzək və meyvə ağacları əkilmişdir. İl ərzində güzəştli əhaliyə 116.416 manatlıq pulsuz dərman verilmişdir. Rayonda məskunlaşmış qaçqın və köçkünlər ilboyu müayinədən keçirilir, onların məişət şəraiti epidemioloji nəzarətdə saxlanılır, onlara bu istiqamətdə əlavə qayğı və diqqət göstərilir.

Təminat razılıq doğurur

Keçən il Səhiyyə Nazirliyi tərəfindən Ağdaş Mərkəzi Rayon Xəstəxanasına 184.674 manat dəyərində 2 ədəd "Mersedes" markalı sanitar avtomobili verilmişdir. Eyni zamanda il ərzində 18.689 manatlıq tibb avadanlığı, diabetli xəstələr üçün 7.866 manatlıq qlükometr aparatı və test strinləri verilmişdir.

Baş həkim bildirir ki, 2011-ci ilin birinci yarısında da rayonda peyvənd tədbirləri davam etdirilmişdir. Həmin müddət ərzində infeksion xəstəliklərin profilaktikası məqsədilə 10751 peyvənd tədbiri qeydə alınmışdır. Eyni zamanda rayonda vərəm xəstəliyinə qarşı müalicə və profilaktik tədbirlər də daim nəzarətdə saxlanılır. Rayonda qeydiyyatda olan ağ ciyər xəstələrinə dövlət vəsaiti hesabına hər ay vərəm əleyhinə spesifik dərman preparatları verilir. Xəstələr DOTS və DOTS+ proqramları üzrə əlavə dərmanlarla da təmin olunurlar.

Səhiyyə Nazirliyinin yaxından köməkliyi sayəsində ilboyu böyrək çatışmazlığı olan xəstələrin hemodializ müalicəsi yüksək səviyyədə təşkil olunmuşdur.

Bakı və Gəncə şəhərlərində təşkil edilmiş Perinatal Mərkəzlər rayonun qadın əhalisinə göstərilən mama-ginekoloji xidmətin keyfiyyətcə yüksəldilməsində Ağdaş MRX-na yaxından kömək göstərir. Müayinə və müalicəsi çətinlik törədən xəstələrə diaqnozların qoyulmasında və müalicəsində respublika sanitar aviasiyası və təcili təxirəsalınmaz tibbi yardım xidmətindən də razılıq edilir. Bu ilin 9 ayı ərzində də güzəştli xəstələrə pulsuz dərman preparatlarının verilməsi davam etmişdir.

İlkin səhiyyə xidmətinin gücləndirilməsi məqsədilə əlavə olaraq rayonun 13 yaşayış məntəqəsində müasir tipli ambulator poliklinika şəbəkələri inşa olunacaqdır. Hazırda Qoltəti və Ərəbocaq kəndlərində bu məqsədlə müvafiq torpaq sahələri ayrılmış, texniki şərtlər hazırlanmış, tikintiyə start verilmişdir.

Yeni xəstəxana binasının tikintisində son işlər görülür

Ağdaş Mərkəzi Rayon Xəstəxanası üçün yeni binanın tikinti-quraşdırma işləri də son mərhələdədir.

Səhiyyədə islahatlar proqramı çərçivəsində aparılan bu genişmiqyaslı tədbir rayon əhalisinin sağlamlığına dövlət qayğısının yeni bir töhfəsidir. 5,3 hektar ərazidə nəhəng sağlamlıq ocağı inşa olunur.

6 korpusdan ibarət olan müasir görkəmli xəstəxana binası hər cür şərait və avadanlıqlarla təchiz ediləcək. Burada dializ şöbəsinin açılması da nəzərdə tutulmuşdur. Bütün bunlar dövlətimizin öz vətəndaşlarının sağlamlığına necə böyük qayğı və diqqət göstərdiyini bir daha təsdiqləyir.

Məzahir ƏHMƏDOĞLU,

Azərbaycan Respublikasının Prezidenti

yanında kütləvi informasiya vasitələrinin

inkişafına dövlət dəstəyi fondunun maliyyə

yardımı ilə

Ədalət.-2011.-25 oktyabr.-S.6.