Şirvanın şöhrəti çinarlı Göyçay...

Dövlət proqramları inkişafa aparır

Ölkənin hər yerində olduğu kimi Göyçay rayonunda da geniş quruculuq işləri davam etməkdədir. Sosial-iqtisadi həyatın bütün istiqamətlərində stabil inkişafın təmin olunması əhalidə böyük inam və ruh yüksəkliyi oyadır. Regionların sosial-iqtisadi inkişafına dair Dövlət Proqramlarının qəbulu və bu proqramların müvəffəqiyyətlə yerinə yetirilməsi xalq təsərrüfatının bütün sahələrində irəliləyişlərə səbəb olmuşdur. Proqramların həyata keçirildiyi 2003-2010-cu illərdə rayon üzrə ümumi məhsul istehsalı buraxılışının həcmi 42.8 milyon manatdan 170.5 milyon manata çatmış, iqtisadi artım 4 dəfə olmuşdu

Müstəqilliyin əbədi qururu

Azərbaycan Respublikasının müstəqilliyinin 20 illiyinə həsr olunmuş bayram təntənələrindən az bir vaxt keçir. Ancaq hər dəfə xatırlanası və qürurverici hadisədir.

Çünki doğma respublikamız mərkəzdən tutmuş ən ucqarlaradək məhz müstəqillik dövründə xüsusi inkişafa nail ola bilmişdir. Göyçay rayonunun timsalında da bütün bunlar öz təsdiqini tapır və və diqqət çəkir.

... Bunu rəqəmlər də təsdiqləyib

Son 20 ildə rayonun kənd təsərrüfatında yüksək göstəricilər əldə edilmişdir. 1991-ci ilə nisbətən dənli bitkilərin əkin sahələri 4115 hektar və ya 42.4 faiz artaraq 13810 hektara çatmışdır. 2011-ci ildə 34.2 min ton taxıl istehsal edilmişdir ki, bu da 1991- ci ilə nisbətən 12.5 min ton və ya 57.6 faiz coxdur. Rayon üçün ənənəvi olan meyvə istehsalına, xüsusən nar istehsalına diqqət artırılmış, meyvə bağlarının ümumi sahəsi son 20 ildə 2.2 dəfə çoxalaraq 4828 hektara çatdırılmışdır. Heyvandarlıq sahəsində də müəyyən nailiyyətlər əldə edilmiş, 1991-ci ilə nisbətən ət istehsalı 3.1 dəfə, süd istehsalı 28.5 faiz, yumurta istehsalı 22.5 faiz, mal-qaranın baş sayı 12 faiz artmışdır. Ərzaq sənaye məhsullarının istehsalının inkişaf etdirilməsi üçün bir sıra tədbirlər həyata keçirilmiş, Göyçay Konserv və Süd zavodlarında əsaslı yenidən qurma işləri aparılmış, ən müasir dəzgah və avadanlıqlar quraşdırılmış, dünya standartlarına cavab verən meyvə şirələrinin və süd məhsullarının istehsalı təşkil olunmuşdur. Hazırda bu müəssisələrdə istehsal olunan məhsulların 80 faizə qədəri xarici dövlətlərə ixrac olunur və dünya bazarlarında Göyçay nar şirəsinə böyük tələbat vardır. Son illər 528 min başlıq broyler quşçuluq fabrikində də əsaslı yenidənqurma işləri aparılmış, bütün sexlər müasirləşmiş, müəssisədə yeni qablaşdırma və kəsim sexləri istifadəyə verilmişdir.

Kənd yaşayış məntəqələrinin suvarma suyu ilə təminatının etibarlılığını yüksəltmək üçün Göyçay çayının məcrasında ümumi smeta dəyəri 2 milyon manat olan nizamlayıcı qurğu istifadəyə verilmişdir. Bu qurğunun istifadəyə verilməsi ilin bütün fəsillərində əkin sahələrni fasiləsiz suvarma suyu ilə təmin etməyə imkan vermişdir.

Böyük tikinti proqramı

Son 20 ildə rayonda böyük tikinti proqramı həyata keçirilmiş, 500-ə yaxın irili-xırdalı obyekt istifadəyə verilmişdir. Tikinti sahəsinə qoyulan investisiyaların həcmi əsaslı olaraq artmışdır. Təkcə 2010-cu ildə əsas kapitala 25 milyon manat vəsait yönəldilmişdir. 1991-ci ildə isə bu rəqəm cəmi 400 min manat səviyyəsində olmuşdur. Yerli xam maldan inşaat materialları istehsalına diqqət artırılmış, Göyçay kərpic zavodunda əsaslı yenidənqurma işləri aparılmış, onun istehsal gücü 2 dəfəyə yaxın artırılmışdır. Şəhərin sənaye zonasında və Qarabaqqal kəndində kərpic istehsal edən müəssisələr istifadəyə verilmişdir. Cəyirli kəndinin ərazisində illik istehsal gücü 1 milyon kub metrə yaxın olan daşdoğrayan qurğu kompleksi, həmçinin sənaye zonasında qum-çinqıl istehsal edən 4 müəssisə inşa edilmiş

Göyçay çayı üzərində strateji əhəmiyyətli olan yük götürmə qabiliyyəti 300 tonluq körpü keçidi istifadəyə verilmişdir

Son 20 ildə rabitə və poçt xidmətinin madd-texniki bazasının möhkəmləndirilməsi istiqamətində xeyli işlər görülmüşdür.

Rayonda ilk dəfə tətbiq olunan müasir rabitə texnologiyaları əhalinin beynəlxalq standartlara cavab verən informasiya -telekommunikasiya xidmətlərindən səmərəli istifadəsinə şərait yaratmış, abonentlərin beynəlxalq rabitə xəttinə çıxışını tam təmin etmişdir.

1991-ci ildə rayon üzrə yalnız bir elektron ATS olduğu halda hazırda mövcud 26 ATS-nın hamısı elektron sisteminə keçirilmiş, Alxasava, Qarayazı, Mirzəhüseynli, Mırtı və Mallı-Şıxlı kəndlərində yeni ATS binaları inşa edilmişdir. Göyçay Telekommunikasiya qovşağının yerləşdiyi bina əsaslı yenidən qurulmuşdur. Son illər əhaliyə göstərilən poçt xidmətinin də səviyyəsi xeyli yüksəlmiş, Bəydövül, Qaraman, Müskürlü, Qarabaqqal, Qızılağac, Kürdşaban, Alpout, Potu, İnçə, Məlikkənd, Qarayazı, Yeniarx və Mırtı kəndlərində yeni poçt şöbələri inşa edilmiş, mərkəzi poçtamt filialı yeni binaya köçürülmüşdür.

Rayon əhalisinin elektrik enerjisi və təbii qazla təhcizatının yaxşılaşdırılması sahəsində görülmüş tədbirlər nəticəsində əhali fasiləsiz elektrik enerjisi və təbii qazla təmin olunmuşdur.

Göyçay paylayıcı yarımstansiyasında 20 mva gücündə transformator quraşdırılaraq stansiyanın ümumi gücü 45 mva-ya çatdırılmış, bu da pik saatlarında istər əhalinin, istərsə də istehsal müəssisələrinin sabit elektrik enerjisi ilə təminatına imkan vermişdir.

Şəhəri təbii qazla təmin edən 1 və 2 saylı qazpaylayıcı stansiyalar əsaslı təmir olunmuş, Mirzəhüseynli kəndinin ərazisində yeni qazpaylayıcı stansiya istifadəyə verilmişdir. Rayon mərkəzinə və 9 kənd yaşayış məntəqəsinə təbii qaz verilişi bərpa edilmişdir.

Təhsil, səhiyyə, mədəniyyət və idman

Son illər təhsil, idman, mədəniyyət və səhiyyə müəssisələrinin maddi-texniki bazasının möhkəmləndirilməsi istiqamətində əməli tədbirlər görülmüşdür. Dövlət Proqramı və Heydər Əliyev Fondunun vəsaiti hesabına şəhər 8 saylı, rayonun Kürdşaban, Bəydövül, Yekəxana, Mirzəhüseynli, Ərəbcəbirli, Şəhadət-Qarabağlar, Şıxbəy kəndlərində məktəb binaları inşa edilmiş, şəhər 1, 3, 4, 5, 7 saylı, İnternat və Qaraməryəm kənd orta məktəbləri əsaslı təmir olunmuşdur.

(ardı 1 noyabr sayımızda)

Məzahir Əhmədoğlu,

Azərbaycan Respublikasının Prezidenti

yanında kütləvi informasiya vasitələrinin

inkişafına dövlət dəstəyi fondunun maliyyə

yardımı ilə

Ədalət.-2011.-29 oktyabr.- S.8.