Robert Katler: "Azərbaycan dünyanın enerji siyasətini müəyyən edən ölkələrdən birinə çevrilib"

Karlton (Carleton University) Universitetinin Avropa, Rusiya və Avrasiya Tədqiqatları İnstitutunun baş elmi işçisi Robert Katlerin (Robert Cutler) APA-nın Vaşinqton müxbirinə müsahibəsi

- Azərbaycanın Xəzər regionunda mövcud enerji siyasətini necə qiymətləndirirsiniz?

- Azərbaycan dünyanın enerji siyasətinin gündəliyini yerinə yetirənlərdən gündəliyi müəyyən edən ölkəyə çevrilib. Hətta Azərbaycan beynəlxalq enerji şirkətlərindən və xarici ölkələri ilə birgə layihələr həyata keçirsə belə, həmin şirkətlər və ölkələr də qarşılıqlı olaraq Azərbaycandan asılıdır və bu da ölkənin bu şəkildə onların nüfuzundan azad olmasına şərait yaradır. Azərbaycanın mühüm coğrafi mövqeyi və enerji resursları onun təkcə təbii ehtiyatlara sahib ölkə kimi deyil, həm də tranzit ölkə kimi potensialını və qlobal enerji təhlükəsizliyinə əvəzsiz töhfəsini təmin edir.

- Avropa Komissiyasının sədri Joze Manuel Barrozo "Nabucco" qaz kəməri layihəsini və digər enerji məsələlərini müzakirə etmək üçün Azərbaycana və Türkmənistana səfər etdi. Səfərin nəticələrini necə qiymətləndirirsiniz?

- "Nabucco"nun perspektivləri günü gündən artır. Konsorsium investisiya barədə yekun qərar hazırlayır. Barrozonun Bakıda prezident Əliyevlə imzaladığı razılaşma əvvəl əldə olunan razılaşmalara bir əlavə idi, amma eyni zamanda da vacib simvolik məna daşıyırdı. Barrozonun Ottingerlə birlikdə etdiyi səfər də simvolik olaraq çox əhəmiyyətli idi, çünki bu səfər Avropa İttifaqının məsələyə böyük diqqət yetirdiyini göstərir.

- Azərbaycan-İran və Azərbaycan-Rusiya enerji əməkdaşlığı ilə bağlı nə deyə bilərsiniz?

- Azərbaycan, əlbəttə ki, Naxçıvanın qazla təminatı barədə düşünür və bu da İranla münasibətlərdə vacib elementlərdən biridir. Amma İranın Konstitusiya ilə təsbit olunmuş siyasi və hüquqi quruluşu onun iqtisadi doktrinasında öz əksini tapıb və qarşılıqlı xeyir gətirən etibarlı, rasional biznes əlaqələrinin qurulmasına ziddir.

Bu, Qərblə enerji əməkdaşlığına ziyan vurmamalıdır. Qərb bu səbəbdən Azərbaycanla enerji əməkdaşlığından imtina edərmi? Reallıq bu sualın cavabının mənfi olduğunu göstərir.

Ədalət.- 2011.- 18 yanvar.- S. 6.