Tarixinə xor baxmaq

İranın keçmişi unutmaq cəhdi

Dini zəmində zaman-zaman ortaya çıxan bəzi arzuolunmaz olaylar ötən ilin sonlarından yeni məcraya qədəm qoyub. Baş verənlərin qonşu dövlətlərin diqtəsi ilə həyata keçirildiyi sirr olmadığı kimi məsələnin mahiyyətində də nələrin dayandığı bəllidir. Hər bir olayın üstündən az keçməmiş verilən reaksiyalar fonunda da özünü faş etmə ortaya çıxır. Məhz buna görə də Azərbaycanda qonşu İranın məkrli planlarını reallaşdırmaq cəhdində olduğu birmənalı olaraq bildirilir. Qeyd edək ki, İslam Partiyasının sədri Mövsüm Səmədovun həbsindən sonra rəsmi Tehranın Azərbaycana qarşı tutduğu qərəzli mövqeyi daha da güclənib. Artıq ötən ilin sonlarında orta məktəblərdə hicaba qadağadan sonra iranlı ayətullahların Azərbaycanda təxribat xarakterli fətvalarının ardınca yeni ilin ilk ayında İran Partiyası rəsmi Bakıya ultimatum göndərməklə Azərbaycanı hədələdi.

Bütün bunlar onu deməyə əsas verir ki, İranın davranışları getdikcə Azərbaycan üçün real təhlükəyə çevrilməkdədir. Rəsmi Tehranın KİV-ləri də hərəkətə keçirdiyi, həqiqəti yazan Azərbaycan mediasına hücuma səfərbər etdiyi faktdır. Hətta fars ideologiyasını dəstəkləyən yerli islami saytlardan da hədə-qorxular gəlindiyi hiss olunur. Bu arada İran Prezidenti Administrasiyasının rəhbəri İsfəndiyar Rəhim Məşayinin Tehranın Elm və Sənaye Universitetində çıxış edərək İranın ilkin dəyərlərinin təcrübədə uğursuzluqla nəticələndiyini deməsi də hansısa ssenarinin həyata keçirilməsindən xəbər verir. Rəhim Məşayi bildirib ki, cəmiyyətdə təbliğ olunan islam dəyərləri ilə real həyatda və əməldə müşahidə olunanlar arasında böyük fərq var: "Şərqdə insana dəyər verilmir və insan məhrumiyyəti, yoxsulluğu başqasının hegemonluğunu asanlıqla qəbul edir. Görəsən işimizin harasında nöqsan var? Hamı mömin və inanclı olduğunu iddia edir. Lakin bu iddia ilə əməldə baş verənlər arasında böyük fərq var və iddia ilə əməldə olanı bir-biri ilə müqayisə etsək, cəmiyyətə bu baxımından yüksək qiymət vermək olmur. Əgər burada sərrast danışmasaq bəs harada danışacağıq?"

Güney Azərbaycan İstiqlal Partiyasının (Kanada) sözçüsü Saleh İldırım bu gün İran adlanan ölkədə siyasi rejimin heç bir sosial dayağının olmadığını, rejimin dağılmağa və məhv olmağa doğru sürətlə irəlilədiyini deyib: "Heç şübhəsiz ki, İran adlanan ölkənin rəsmiləri Azərbaycana yardım etmək fikrində ola bilməzlər. Qarabağ məsələsində də belədir. Onlar deyirlər ki, "Ermənistansız Qarabağı təsəvvür etmək olmaz, biz elə etməliyik ki, Qarabağ Ermənistanın tərkib hissəsi olsun, əks-təqdirdə turançılıq ideyası gerçəkləşəcək". Deməli, bunlar heç zaman Azərbaycanla həqiqi dost ola bilməzlər". İranın Quzey Azərbaycan cümhuriyyətini özünə ciddi rəqib və hətta təhlükə hesab etdiyini vurğulayan soydaşımız qeyd edib ki, Quzey Azərbaycanın güclənməsi siyasi, iqtisadi cəhətdən inkişaf etməsi əhalinin sosial rifahının yaxşılaşması Güney Azərbaycanda aparılan baxımsızlıq mücadiləsinə bir örnək ola bilər və belə bir şəraitdə Güney Azərbaycanda istiqlal istəyinin kütləviləşməsi İran adlanan ölkənin dağılması deməkdir.

Qonşu dövlət olaraq Azərbaycana qarşı İranın tutduğu mövqenin nədən irəli gəldiyinə aydınlıq gətirən bu ölkədə ölkəmizi səfir kimi təmsil etmiş Nəsib Nəsibli deyib ki, rəsmi Tehran Bakıya düşmən mövqeyində dayandığından həmişə qərəzli çıxışlar edir.

Azərbaycanda birmənalı olaraq böyük əksəriyyət hesab edir ki, pozulmuş ərazi bütövlüyünü bərpa etməyə hazırlaşdığı bir dövrüdə İranın Azərbaycana qarşı atdığı bütün addımlar bilavasitə ermənilərə dəstəkdir. İkinci bir tərəfdən də İranın hicabla bağlı narahatlığını Misir, İraq və digər ərəb ölkələri qarşısında ifadə etməməsi, irandilli, fasdilli ölkələrdə bu məsələni qaldırmaması, onu daha çox Azərbaycanda hiss etdirməsi maraq doğurur. Burada tamamilə ayrı məqsədin olduğunu istisna etməyənlərin qənaətincə, Tehran Rusiyanın tapşırığını icra edir və Azərbaycan əleyhinə də zaman-zaman işlər görməsi də təsadüfi deyil. Azərbaycan dünyəvi dövlətdir, İranın buradakı qüvvələri isə bu dünyəviliyə xələl gətirmək niyyətindədirlər. Daxilində haqq-ədalət olmayan bir ölkənin başqalarından haqq-ədalət tələb etməsi isə əcayib görünür. Neçə əsrlər Azərbaycan türklərinin idarəçiliyində olan, işğallardan qorunan İranın başına farsların keçməsi ilə onu parçalanmadan qoruyanlara qarşı ədalətsizlik nümayiş etdirməsi etiraz doğurur. Çox təəssüf ki, İran dövlətini bu günə kimi də yaşadan Azərbaycan türklərinin, sərkərdələrinin - Xətainin də, Nadir Şahın da, Şah Abbasın həqiqi dəyərinin verilməsi əvəzində farsların bizə minnətdarlığı xəyanətlə nümayiş olunur. Daim Azərbaycanın dostu olduğunu iddia edən, amma Azərbaycana qarşı illərdir düşmən mövqedə dayanmanı anlamaq olmur. O da məlmudur ki, Azərbaycana daha çox narkotik maddələr qanunsuz yolla islam ölkəsi sayılan İrandan gətirilir. Həmçinin də qonşu ölkədən Azərbaycana təxribatçılar, casuslar ixrac olunur, ölkədə dini təfriqə yaratmaq məqsədilə satışı qadağan olunan kitablar gətirilir, Azərbaycanda rəsmi Tehran tərəfindən bəzi qüvvələr ələ alınır. Azərbaycanda dini dövlət qurmaqda marağını gizlətməyən İranın əməllərini iki il öncə "Səidin dəstəsi" adlı bir qrup terrorçunun ifşa edilməsi və İrana işləmələrinin təsdiqi də sübut edir. Söylənilənə görə, "Səidin dəstəsi"nin üzvlərinin Azərbaycanda həyata keçirməyə cəhd göstərdikləri dövlət çevrilişi heç bir sensasiyaya səbəb olmayacaqdır. Çünki dövlət çevrilişi maddəsi ilə ittiham olunan İslam Partiyasının bəzi üzvləri hələ də həbsdədirlər. Ekspertlərin çoxu bu fikirdədirlər ki, İran dövləti hələ 1979-cu ildən islam inqilabını digər dövlətlərə də ixrac etməyi planlaşdırıb. Bu planda əsasən Azərbaycanı şəriət qaydaları ilə idarə etmək öz əksini tapmışdı. Bu kimi planları həyata keçirmək üçün İslam İnqilabı Qvardiyası rəsmi Tehranın əlində bir açardır. Bu qvardiya təkcə regionda Bakı üçün deyil, eyni zamanda Vaşinqton üçün də təhlükəlidir.

"The Washington Post" qəzetinin iki il öncə Ağ Evin rəsmilərinə istinadən yaydığı məlumata görə, ABŞ bu qvardiyanı terrorçu dəstələr siyahısına salıb. Qəzet bildirib ki, qvardiyanın bəzi dairələri İranın ictimai-siyasi və iqtisadi həyatına güclü təsir göstərir. Qəzet onu da yazıb ki, adıçəkilən qvardiya 1979-cu ildən sonra formalaşdırılıb və İran - İraq müharibəsində aktiv iştirak edib. Sayta görə, İslam İnqilab Qvardiyası keçmiş MDB-nin müsəlman ölkələrində sabitliyi pozmaqda maraqlıdır.

Gültəkin

Ədalət.- 2011.- 19 yanvar.- S. 4.