NUMEROLOGİYA,

YAXUD ƏDƏDLƏR HAQQINDA ELM

Dünya ədədlər üzərində qurulub.

(Pifaqor)

Ədədlər yalnız rəqəm və işarələrin ifadə etdiyi kəmiyyət göstəricisi deyil, onlarda başqa bir qüvvə də vardır. Ədədlərin ifadəsi olduğu bu qüvvə təbiətdə şeylərlə qaydalar arasında olan okkult əlaqələrdədir.

(Kornelius Aqrippa)

Numerologiya nisbətən son zamanlar tanınsa da, əslində ən qədim elmlərdən biridir. Müəyyən mənada ədədlərin öz dili var, ibtidai qəbilələr bu dili başa düşür və ədədlərin dilində bir-biri ilə əlaqə saxlayırdılar. Qədim əlifbalarda (məsələn, qədim yəhudi əlifbasında) hərflərin də ədədi mənası vardı.

Kabalist kosmologiya və onun ezoterik nəzəriyyələrinin dərinliklərinə varmadan, müasir numerologiya qədim yunan riyaziyyatçısı və mistik alimi, e.ə. əvvəl 550-ci ildə şöhrətinin zirvəsinə qalxmış Pifaqorun nəzəriyyəsinə əsaslanan sadə ədədi və əlifba koduna üstünlük verir.

Məlum olduğu kimi, Pifaqor, onun şagirdləri və davamçıları rəqəmlərin sayını azaldaraq 1-9 arasında saxladılar, çünki bu rəqəmlər başlanğıc rəqəmləridir, qalan rəqəmləri onlardan düzəltmək mümkündür.

İyirmi əsr keçəndən sonra, məşhur Kornelius Aqrippa 1533-cü ildə nəşr etdiyi "Okkult fəlsəfəsi" əsərində həmin rəqəmləri və onların mənasını verdi.

1 - məqsədin rəqəmidir, əlifbanın ilk hərfi olan "A" ilə başlanan hər şeydə aqressivlik və ambisiya formasında təzahür edir.

2 - gündüz və gecə kimi əks anlayışların rəqəmidir. Tarazlıq və kontrast mənasında işlənir, müsbət və mənfi keyfiyyətləri birləşdirərək tarazlıq yaradır.

3 - dəyişkənlik deməkdir, keçmişin, indinin və gələcəyin rəmzi olan üçbucaqla işarə edilir. İstedad və şən əhval-ruhiyyəni ifadə edir, uyğunlaşmaq rəmzidir.

4 - sabitlik və möhkəmlik deməkdir. Onun möhkəmliyi kvadratla- kosmosun tərəfləri, ilin fəsilləri və od, torpan, hava və su ünsürləri ilə ifadə olunub. Ən sadə ədəddir.

5 - son nəticəni səyahət və sınaqlar vasitəsi ilə əldə edən risk və təhlükə deməkdir. Onda sabitliyin olmaması bir tərəfdən inamsızlığa gətirib çıxara bilər, digər tərəfdən bu, ən xoşbəxt, ən gözlənilməz ədəd sayılır.

6 - inam rəmzidir. O, göy qurşağının yeddi rəngini ifadə edərək təbiətlə harmoniyadadır. İdeal ədəddir, həm tək, həm də tək ədədlərə bölünərək sanki onları birləşdirir.

7 - sirli, məchul və görünməz şeyləri öyrənmək və bilmək yoludur. Yeddi əsas planet, həftənin yeddi günü, yeddi musiqi qamması deməkdir. O, məqsədi (1) və harmoniyanı (6) birləşdirərək, onu həqiqi psixoloji ədədə çevirən öz simmetriyasını yaradır.

8 - maddi uğur rəmzidir. İki kvadratla ifadə olunduğu üçün kamil inam rəmzi sayılır. İki yerə bölünəndə bərabər hissələrə ayrılır (4-4). Yenə bölsən, yenə bərabər hissələrə ayrılacaq (2-2-2-2), bu isə dördqat tarazlıq deməkdir.

9 - elementar ədədlərin ən böyüyü, uğur rəmzidir. Tam inkişaf etdikdə bütöv bir qrupun cizgilərini birləşdirərək nəzarət faktoruna çevrilir. Doqquz ədədi, 3x3-ün hasili kimi, dəyişkənliyi irəliyə doğru hərəkətə çevirir.

Böyük ədədlərin sadə ədədə çevrilməsi üçün müxtəlif sistemlər işlənib hazırlanmışdır. Ən sadə və geniş yayılmüş üsul verilmiş ədədin bütün rəqəmlərini toplamaq, sonra əgər 10 və ya daha çox alınarsa, alınan rəqəmləri də toplamaq lazımdır. Bu proses, 1-dən 9-a kimi sadə ədəd alınana kimi davam eləyir.

Sadə bir nümunə kimi, 125 ədədini götürək. Onun komponentlərini belə toplayaq: 1+2+5=8. Beləliklə, 8 ədədi 125-in vibrasiya kodudur. Yaxud, Apokalipsisdə "yırtıcı ədəd" sayılan 666 ədədini götürək. Toplayırıq: 6+6+6=18, sonra isə 1+8=9. 9 ədədinin ümumi təsirini nəzərə alanda, bu, çox yerinə düşən vibrasiyadır.

Çoxları belə hesab edirlər ki, 11 və 22 ədələrinin xüsusi mənası var. Onda bu ədədləri keyfiyyətcə yoxlamaq lazımdır: yəni, əvvəlcə 11 kimi, sonra 2 (1+1) kimi, bundan sonra 4 (2+2) kimi baxmaq lazımdır.

13 sayı 4-ə kimi (1+3) sadələşdirilə bilər, 31 sayı da beləcə (3+1). Bu ədədlərin heç birinin 4-dən başqa vibrasiya kodu ola bilməz.

TARİXLƏR VƏ HƏYAT RƏQƏMLƏRİ

Tarixləri vibrasiya koduna qədər azaltmaq üçün gün, ay və ilin rəqəmlərini toplamaq lazımdır (yanvar -1, fevral -2, dekabr-12=3 və sair). Məsələn, 4 iyul 1776-cı il- Müstəqillik Bəyannaməsinin imzalanması günüdür. Burada 4 - iyulun 4-cü günü, 7- yeddinci ay, iyul və 1776 ədədləri vardır. Toplayırıq: 4+7+1+7+7+6=32=3+2=5. Heç bir ədədi vibrasiya bu mühüm sənədin imzalanması zamanı qarşıya çıxan risk və inamsızlığı bundan dəqiq ifadə edə bilməzdi. Bu, geri qayıdıb-qayıtmayacağına əmin olmadan təzəcə düzəldilmiş gəmini suya buraxıb naməlum dənizlərə yola salmağa bənzər. Risk simvolu olan 5 ədədi məhz bunu ifadə edir. Tarixi günlər nə qədər maraqlı olsa da numerologiyanın əsas vəzifəsi insan həyatını öyrənməkdir. Onların ən sadəsi- doğum günlərinin tarixidir.

Məsələn, 12 mart 1957-ci il doğum tarixini götürək, onları belə toplayaq: 1+2+3+1+9+5+7=28=10=1. Deməli, bu tarixdə anadan olan şəxsin vibrasiya ədədi 1-dir. Və yuxarıda göstərilən rəqəmlərin mənası ilə uyğunlaşdırılr. Doğum tarixi dəyişməzdir və doğulan gündən ona vibrasiya təsiri göstərir. Bəs o insan xarakterini nə dərəcədə düzgün təyin edə və ya insan taleyini, onun gələcəyini idarə edə bilir və bu, sonra bəhs edəcəyimiz digər numeroloji amillərdən nə dərəcədə asılıdır?

(Ardı gələn şənbə sayımızda)

Ədalət.- 2011.- 22 yanvar.- S. 10.