DAHA BÖYÜK UĞURLAR SORAĞINDA

Dağlar onun keşiyini çəkər, Dəniz ona nəğmələr oxuyar...

Adlı-sanlı məşhur insanlara həmişə qibtə ilə baxırlar. Onlara xoşbəxt insanlar deyirlər. Xoşbəxt adamlar kimi, xoşbəxt şəhərlər, kəndlər də olur. Bu xoşbəxtlik alın yazısı kimi lap əvvəldən bəllidir sanki. Xaçmaz adlı yurd yerimiz də belədir.

Tanrı bu rayona nələr bəxş etməyib? Bəd nəzərlərdən uzaq... Xaçmazın qismətinə başı qarlı dağlar, zümrüd meşələr, çaylar, bulaqlar və Xəzər düşüb. Və bu yurdun bu başından o başına dağ havası, aran havası, dəniz havası axıb-qarışıb qovuşar, bir möcüzə yaradar. Yəni bu rayonun ərazisi boyu istəsən ilıq-isti bir düzəmdə meyvə bağlarını, tərəvəz sahələrini, gül-çiçəkli yaşıllıqları doya-doya gəzərsən. İstəsən yamaclardakı meşələrdən keçib dağlara qalxarsan. İstəsən doğma Xəzərin dalğaları ilə qucaqlaşarsan... Burada təbiət qoynunu açıb sənin nazınla oynayar, sehrli bir qüvvə kimi səni bütün istəklərinə çatdırar, səni xoşbəxt edər...

Bu yerlərin hələ bir Nabran nağılı da var ki...

Unutma, bu elin indi dünyanın çox yerində tanınan, haqqında xoş sözlər danışılan bir Nabran möcüzəsi də var ki, bu, ayrı bir söhbətin mövzusu olacaq. Çünki, bu nağılın bütün gerçəklikləri Xəzərimizin... şor sularından dad alıb şirinləşir.

Bu gün tam etiraf olunur ki, Xaçmaz rayonu şəhər və kəndləri ilə daha çox inkişaf etmiş rayonlarımızdan biridir.

Bu rayona uzun illərdir rəhbərlik edən təcrübəli dövlət xadimi Şəmsəddin Xanbabayev komandası ilə camaatla əl-ələ verib inkişafı daha da möhkəmləndirməyə, qazanılan uğurların miqyasını daha da genişləndirməyə çalışır.

Sevindirici haldır ki, bu uğurlar bütün istiqamətlərdə reallaşaraq ümumi nikbinlik bəxş edir. Biz bütün bunlar barədə geniş təsəvvür yaratmaq üçün təkcə son bir ildə görülən işlərə diqqət yetirsək kifayətdir.

Prezident görülən işlərdən razı qaldı

Əvvəlcə Azərbaycan Respublikasının Prezidenti İlham Əliyevin Xaçmaz rayonuna ötən ilki səfəri barədə 23 sentyabr 2011-ci ildə Prezident İlham Əliyevin Xaçmaz rayonuna növbəti səfəri xaçmazlılar üçün ilin ən mühüm hadisəinə çevrilmişdir. Prezident İlham Əliyev xalqımızın Ümummilli Lideri Heydər Əliyevin abidəsini ziyarət etdikdən sonra əsaslı surətdə yenidən qurulan Heydər Əliyev Mərkəzi ilə tanış oldu, əsaslı təmirdən sonra Mərkəzi Rayon Xəstəxanasının açılışını həyata keçirdi.

Daha sonra ölkə başçısı tamamilə yenidən qurulmuş Şəxsiyyətlər Muzeyi ilə tanış oldu, Şahmat məktəbinin, Xalça Muzeyinin, Uşaq və Gənclər kitabxanalarının açılışını həyata keçirdi. Bakı prospekti boyu, 5 hektar ərazidə yeni yaradılmış Heydər Əliyev Seyrəngahı ilə-burada yaradılmış İlham bulağı və Heydər bulağı kompleksləri ilə, Samovar kompleksi ilə, magistral yolun üzərində tikilmiş piyada körpüləri və Heydər Əliyev prospektinin əzəmətli Giriş qapısı ilə tanış oldu. Müdafiə Sənayesi Nazirliyinin ən müasir texnologiyalara əsaslanan Xaçmaz Kondensator zavodunun açılışını həyata keçirdi.

Başçı həmin anları iftixarla xatırlayır

Prezidentin Xaçmaza səfəri barədə söhbət edərkən Şəmsəddin müəllim bəzi məqamları xüsusi qürur və iftixar hissi ilə vurğuladı:

- Rayonumuza gəlişi ilə möhtərəm Prezidentimiz hər dəfə olduğu kimi, bütün xaçmazlılara hədsiz sevinc hissləri yaşatdı. Danılmaz bir həqiqətdir ki, sadalanan obyektlərin hər biri, məhz cənab Prezidentimizin diqqət və qayğısı sayəsində ərsəyə gəlmişdir. Buna görə də rayonumuzun əhalisi adından Ulu Öndərimizin layiqli davamçısı, möhtərəm Prezidentimiz cənab İlham Əliyevə ən dərin minnətdarlığımızı bildirir, ona Vətənimiz Azərbaycan naminə dəyərli fəaliyyətində yeni uğurlar diləyirik! Rayon ictimaiyyətinin bir qrup nümayəndəsi ilə görüşü zamanı möhtərəm Prezidentimiz "Xaçmaz Azərbaycanın ən gözəl şəhərlərindən birinə çevrilib və burada görülən işlərə böyük məhəbbətlə, zövqlə yanaşılıb" söyləyərək, rayonumuzda görülən işlərə verdiyi yüksək qiyməti bizi daha yaxşı işləməyə, əhalimizə daha faydalı xidmət etməyə bir çağırış hesab edərək, ölkə başçısının bu çağırışına öz əməli işimizlə cavab verməyə hər zaman hazır olmalıyıq.

Möhtərəm Prezidentimiz cənab İlham Əliyev tərəfindən ötən illərdə əldə olunan nailiyyətləri daha da artırmaq, regionların inkişafını və əhalinin həyat səviyyəsinin davamlı olaraq yüksəldilməsinə nail olmaq məqsədilə təsdiq edilmiş 2009-2013-cü illəri əhatə edən yeni Dövlət Proqramında təkcə rayonumuz üçün müxtəlif sahələri əhatə etməklə 17 bənd üzrə geniş tədbirlərin həyata keçirilməsi nəzərdə tutulur.

Bu tədbirlərin sırasında rayonumuzda sənaye və kənd təsərrüfatı istehsalının genişləndirilməsi, yol təsərrüfatında ciddi işlərin görülməsi, elektrik enerjisi, istilik, qaz və su təchizatının yaxşılaşdırılması, səhiyyə, mədəniyyət, idman və təhsil müəssisələrinin tikintisi və yenidən qurulması üzrə tədbirlər daxildir. Artıq nəzərdə tutulan işlərin müəyyən qismi reallaşmaq üzrədir. Əminik ki, Möhtərəm Prezidentimizin müdrik rəhbərliyi ilə bu Proqram da böyük uğurla həyata keçiriləcək, növbəti illərdə Azərbaycan regionları misilsiz inkişaf dövrünü yaşayacaqdır...

(ardı gələn sayımızda)

MƏZAHİR ƏHMƏDOĞLU

Azərbaycan Respublikasının Prezidenti yanında kütləvi informasiya vasitələrinin inkişafına dövlət dəstəyi fondunun maliyyə yardımı ilə

Ədalət.-2012.-10 aprel.- S.7.