DAHA BÖYÜK UĞURLAR SORAĞINDA

(əvvəli ötən sayımızda)

Dövlət Proqramının icrası uğurla davam edir

İkinci Dövlət Proqramının qəbulundan keçən müddət ərzində rayonumuzda həyata keçirilmiş tədbirlər nəticəsində 4755 yeni iş yeri açılmışdır ki, onun da 2574-ü daimi iş yerləridir. Təkcə 2011-ci ildə 1503 iş yerləri açılmışdır ki, bunun da 1137-si daimi iş yerləridir.

2010-cu illə müqayisədə 2011-ci ildə rayon üzrə ümumi məhsul buraxılışı 22%, sənaye məhsulu 37,3%, kənd təsərrüfatının ümumi məhsulu 12,9 %, əhaliyə göstərilən pullu xidmətlərin həcmi 17%, pərakəndə əmtəə dövriyyəsi 25,1%, adambaşına düşən pul gəlirləri 10%, orta aylıq əmək haqqı 12% artmışdır. Əsas kapitala yönəldilən investisyaların həcmi 55,4% artaraq 71,1 milyon manat təşkil etmişdir. İl ərzində ümumi sahəsi 36710 m2 mənzil tikilib istifadəyə verilmişdir ki, bu sırada Qarabağ əlilləri üçün inşa edilmiş 24 mənzilli bina da vardır.

Ümumiyyətlə, Azərbaycanın dövlət müstəqilliyinin bərpasının 20-ci ildönümünü təntənə ilə qeyd edilən 2011-ci il rayon üçün bir çox sahələrdə uğurlu il olmuşdur. Xüsusən də tikinti-quruculuq və abadlıq sahəsində kifayət qədər böyük həcmli işlər həyata keçirilmişdir.

Heydər Əliyev Seyrəngahının genişləndirilməsi işinə artıq başlanmışdır. Seyrəngahın Qudyalçay körpüsünədək artırılması planlaşdırılır ki, bu da ərazinin abadlaşmasına və insanların istirahətinə xidmət edəcəkdir. Uzunluğu 2800 metr olan Heydər Əliyev prospektində yeni abadlıq işlərinin aparılmasına başlanmışdır. Prospekt boyu bütün hasarlar üzlük daşla arxitektur qaydada yenidən işlənir. Prospektin səkilərinin yenidən tikintisi, yolun asfalt örtüyünün dəyişdirilməsi, işıq dirəklərinin yeniləri ilə əvəz olunması, çoxmənzilli yaşayış evlərinin dam örtüklərinin və fasadlarının təmiri və s. işlərin görülməsi planlaşdırılır. Şəhərin N.Nərimanov küçəsində mərkəzi xəstəxananın qarşısında piyadaların yoldan təhlükəsiz keçidini təmin etmək məqsədi ilə inşa edilən piyada körpüsünün tikintisi artıq başa çatmaq üzrədir.

Xaçmaz şəhərinin Giriş qapısı ərazisində yeni parkın (Çənlibel) tikintisinə başlanmışdır. Burada 5 hektardan artıq ərazidə gözəl bir park salınacaq və Koroğlunun abidəsi həmin əraziyə köçürüləcəkdir.

Xidmət sahəsində müəyyən işlər görülmüşdür. Sentyabr ayında rayonun ən böyük kəndlərindən olan Qusarçay kəndinə təbii qazın çəkilişi başa çatdırılmış, 5600 nəfər əhalisi olan kənddə 1000-ə yaxın abonentə yeni qaz xətti çəkilmişdir. Hazırda, Çarxı kəndinə yeni qaz xəttinin çəkilişinə başlanmışdır.

Əhalinin elektrik enerjisi ilə təchizatı, ümumən rayonun elektrik təsərrüfatı sahəsində ötən il müəyyən işlər görülmüşdür. Xüsusən, yüksək gərginlikli elektrik ötürücü xətlərinin Bakı prospektində, Heydər Əliyev Seyrəngahı ərazisində və digər ərazilərdən daha münasib ərazilərə keçirilməsi, hava xətlərinin kabelə keçirilməsi istiqamətində kifayət qədər böyük həcmli işlər həyata keçirilmişdir. Əhali sektorundan elektrik enerjisinin dəyərinin yığımı il ərzində 82,35% təşkil etmişdir ki, bu göstəricinin daha da artırılması üçün təsirli tədbirlərin görülməsi tələb olunur. Ərazilərdə keçirilən hesabat yığıncaqlarında bir sıra kəndlərdə elektrik dirəklərinin və naqillərin yararsız vəziyyətdə olması ilə əlaqədar problemlərin qalxması da narahatlıq doğurmaya bilməz.

Ötən il Nabran kəndində 5 km yeni kanalizasiya xətti çəkilərək, təmizləyici qurğuya birləşdirilmişdir. Respublika hökuməti və Asiya İqtisadi İnkişaf Bankının birgə layihəsi olan Xaçmaz şəhəri və ətraf 5 kəndin su və kanalizasiya sistemlərinin yenidən qurulması üçün layihələndirmə işləri artıq başa çatdırılmışdır. Qarşıdakı aylarda bu işlərin həyata keçirilməsinə başlanacaqdır.

Rayon əhalisinə göstərilən rabitə və poçt xidməti sahəsində müəyyən işlər görülmüşdür. İl ərzində rayonun Müqtədir, Bostançı, Dədəli, Həsənqala, Pirquluoba, Yeni Həyat, Nərəcan, Uzunoba, Müşkür, Qımılqışlaq, Çarxı, Qaradağbuduq, Qobuqıraq kəndləri tam elektronlaşdırılmışdır. Şəhərin Bakı prospektində 3,4 km hava rabitə xətləri yeraltı kabel xətləri ilə əvəz olunmuş, 468 abunəçiyə telefon xətti çəkilmiş, sürətli internet abunəçilərinin sayı iki dəfədən çox artırılaraq 2228-ə çatdırılmışdır. Həmçinin, Xaçmaz regional Poçt Filialı ötən il ərzində 23 kənd və 4 şəhər şöbəsi vasitəsilə əhaliyə 25 adda poçt xidməti göstərmiş, plan tapşırıqlarını 100% yerinə yetirmişdir.

Kənd təsərrüfatı

2011-ci ilin məhsulu üçün rayonda bütün təsərrüfat qurumları daxil olmaqla 31569 ha (əvvəlki ildən 2371 ha çox) sahədə taxıl bitkiləri əkilmişdir ki, bunun 26584 hektarı buğda, 4985 hektarı arpa bitkisidir. Rayon üzrə məhsuldarlıq hər hektardan 25,3 sentner olmaqla, cəmi 80174 ton taxıl məhsulu istehsal edilmişdir. Bu 2010-cu illə müqayisədə hər hektardan 3,1 sentner çox olmaqla, 14289 ton çox taxıl istehsal edilmişdir.

Ötən il rayonun təsərrüfatlarında 13424 ton kartof, 121334 ton tərəvəz bitkiləri, 83271 ton meyvə, 5501 ton üzüm məhsulu yığılmışdır. 2011-ci ildə 7663 ton diri çəkidə ət, 39263 ton süd, 17,7 milyon ədəd yumurta, 192 ton yun istehsal olunmuşdur. Təsərrüfatlarda 58.229 baş iribuynuzlu mal-qara, 95368 baş davar vardır.

2012-ci ilin məhsulu üçün rayonun bütün təsərrüfat qurumlarında 36.053 ha sahədə payızlıq taxıl bitkiləri əkilmişdir ki, bunun 30202 hektarı ərzaqlıq buğda, 5851 hektarı arpa bitkisidir. Əkilmiş taxıl sahələri əvvəlki ildən 3953 ha çoxdur.

(ardı gələn sayımızda)

MƏZAHİR ƏHMƏDOĞLU

Azərbaycan Respublikasının Prezidenti yanında kütləvi informasiya vasitələrinin inkişafına dövlət dəstəyi fondunun maliyyə yardımı ilə

Ədalət.-2012.-11 aprel.-S.7.