Ölkə Prezidenti Salyanı təqdir etdi

(əvvəli ötən sayımızda)

Gözəllik asan əldə edilmir

Ölkə başçısının Salyana səfəri ilə bağlı bəhs etdiyimiz ümumi təqdimat işdə elə də asan deyil. Qazanılan bu uğurların arxasında çox böyük məsuliyyət və zəhmət dayanır. Rayonun girişindən hiss edilən bu abadlıq-quruculuq işləri milli memarlıq üslubunda inşa edilmiş "Salyan şəhəri" göstəricisindən başlayır. Ələt-Astara yolunun şəhər ərazisindən keçən hissəsində, Dövlət Bayrağı Meydanında, Y.Qasımov, X.R.Ulutürk, T.Xəlilbəyli, Heydər Əliyev, Nizami küçələrində, "31 mart Dünya azərbaycanlılarının soyqrımı", "1941-1945-ci il Böyük Vətən Müharibəsi "abidə komplekslərində, sosial və ticarət obyektlərində həyata keçirilən təmir-tikinti işləri işləri bu gün göz oxşayır. Təmizlənmiş, təmir edilmiş, səkiləri yenidən qurulmuş, fasadları dəyişdirilmiş binalar, küçələr, meydançalar böyük zəhmətin bəhrəsidir.

Etiraf etməliyik ki, son bir ildə Salyanda görülən işlərin miqyası çox böyükdür. Çünki, illərlə tökülüb qalan təmir-bərpa, abadlıq-quruculuq işlərini bir ildə başa çatdırmaq elə də asan deyil.

Azərbaycan Respublikası Nazirlər Kabinetinin sərəncamı ilə 2011-ci ilin 16 iyununda Salyan rayon İcra Hakimiyyəti İnzibati binasının tikintisi üçün 2 milyon manat vəsait ayrılmışdır. Artıq binanın inşasına başlanılmışdır. Müəllimlər İnsititutunun Salyan rayon filialının inzibati binasının və yataxanasının təmiri üçün ayrılmış 500 min manat vəsait təyinatı üzrə xərclənmiş və gözəl nəticə əldə edilmişdir. 17 hündürmərtəbəli binanın da dam örtüyü dəyişdirilmişdir.

Hər bir yenilik, yaradılan gözəllik ağır zəhmətdən keçir. Salyanda bu gözəllikləri yaradanların işləri hələ çoxdur. Çünki rayonun buna ehtiyacı çox, rəhbərliyin həvəsi isə tükənməzdir. Prezident İlham Əliyev də bu rayona tez-tez yön salmağı sakinlərə söz verib. Belə səmimi görüşlər üçün də daha məsuliyyətlə çalışmaq lazımdır.

Ötən ilin uğurları

2011-ci il Salyanda təkcə abadlıq-quruculuq sahəsində uğurlar əldə edilməyib. İstər iqtisadiyyatın müxtəlif sahələrində, istər sosial sferada rayonun ümumi göstəriciləri təqdirə layiqdir.

Ötən il Salyan rayonunun yerli büdcəsinin gəlirləri 5 milyon 920 min manat olmuşdur. Büdcədə sosial obyektlərin təmirinə 412 min manat, yolların təmirinə 450 min manat, abadlıq işlərinə 498 min manat xərclənmişdir.

2011-ci ildə 16531 hektar taxıl sahələrindən 48438,2 ton məhsul əldə edilmişdir. Ət istehsalı 12650.1 tona, süd istehsalı 42207.2 tona yüksəlmişdir. Rayonda 118 milyon 718 min manatlıq kənd təsərrüfatı məhsulları istehsal edilmişdir. Müqayisə üçün bildirək ki, bu 2010-cu ildəkindən 26 milyon 678.9 min manat artıq olmaqla 27.5 faiz çoxdur.

Rayonda sahibkarlığa diqqət xeyli artdığından bu sahədə müəyyən uğurlar əldə edilmişdir. Qaraçala qəsəbəsində onlara torpaq sahələri ayrılmış və lazımı şərait yaradılmışdır. Rayonda istehsal edilən kənd təsərrüfatı məhsullarının xarici bazarlara çıxarılması məqsədi ilə mühüm layihələr həyata keçirilmişdir. "Hacı-Camalxan" kəndli (fermer) təsərrüfatı tərəfindən 2011-ci ildə 450 min manatlıq meyvə- tərəvəz konserv məhsulları ABŞ-a, Almaniyaya, Polşaya, İsrailə ixrac edilmişdir. Salyandakı 1186.5 hektar üzüm bağından kənd əməkçiləri ötən il 4615,5 ton məhsul götürmüşlər.

Kənd təsərrüfatı bitkilərini vaxtında suvarmaq, torpaq sahələrinin meliorativ vəziyyətinin yaxşılaşdırmaq məqsədi ilə 364- kilometr dren şəbəkəsi, 562 kilometr suvarma kanalları yenidən təmizlənmişdir.

Sakinləri təbii qazla daim təmin etmək üçün Salyan şəhərinə üç istiqamətdə orta təzyiqli qaz kəmərinin çəkilməsinə başlanmışdır. Kənd sakinlərinin də təbii qazla normal təminatı üçün müvafiq tədbirlər görülür. Arbatan, Çuxanlı, Babazanan, Qardili, Şəkərli, Həsənli, Qarabağlı, Yolüstü kəndlərində yenidənqurma və bərpa işləri aparılmışdır.

Rayondakı içməli su problemini həll etmək üçün Azərbaycan və Yaponiya hökumətləri arasındakı kredit layihəsi əsasında Salyan şəhərinin su və kanalizasiya sisteminin yenidən qurulması üçün 70 milyon dollar vəsait ayrılmışdır.

Bir sözlə, Salyan rayonunda iqtisadi-sosial göstəricilər 2011-ci ildəki uğurların tam əksidir.

Hər kəs sözünü deyə bilər

İnsanların yaşam tərzini formalaşdıran iqtisadi durumun , sosial qayğıların, məişət məsələlərinin həlli həmişə asan olmur. Heç şübəsiz ki, rayon rəhbərləri belə məsələlərin həllində sakinlərlə açıq təmasda olmağa daha çox üstünlük verirlər.

Salyan rayon İcra Hakimiyyətinin başçısı Tahir Kərimov bu tendensiyanı bir azda genişləndirərək 2012-ci il martın 9-da "Açıq mikrafon" günü keçirilmişdir. Görüşdə iştirak və çıxış edən icra başçısı son bir ildə rayonda görülən abadlıq-quruculuq işlərindən, uğurlardan bəhs etməklə bərabər insanların sosial və məişət qayğılarını da nəzərdən qaçırmadığını bildirmişdir. Və bu sahədə sakinlərin öz fikirlərini sərbəst şəkildə bildirməyi xahiş etmişdir. Ölkənin müxtəlif telekanallarının, informasiya agentliklərinin, qəzetlərin iştirak etdiyi "Açıq mikrafon" günündə çıxış edən şəhər və rayon sakinləri arzu və təkliflərini bildirməklə bərabər onları narahat edən məsələlərdən də bəhs etmişlər.

Ümumi fikir isə son bir ildə Salyanda aparılan təmir-tikinti, abadlıq- quruculuq işlərinin təqdir etməsi olmuşdur.

Səxavət Məmmədli

Azərbaycan Respublikasının Prezidenti yanında kütləvi informasiya vasitələrinin inkişafına dövlət dəstəyi fondunun maliyyə yardımı ilə

Ədalət.-2012.-18 aprel.-S.7.