CƏLİLABAD - TİKİLİR Kİ, İZ QALSIN...

(əvvəli qəzetimizin ötən sayında)

İşiniz uğurlu, eviniz nurlu olsun!

Son illər rayonda yeni istehsal müəssisələrinin, ticarət, iaşə və məişət obyektlərinin tikilməsi hesabına yüzlərlə işsiz özünə iş yeri tapıb. "Azərbaycan Respublikası Regionlarının Sosial-İqtisadi İnkişafı Dövlət Proqramı"nın və digər tədbirlərin yerinə yetirilməsi nəticəsində son 8 il ərzində 24150, o cümlədən 2011-ci ildə 824 iş yeri açılıb və iş yerlərinin yarıdan çoxu daimi xarakterlidir.

Son illər olduğu kimi ötən il də şəhid ailələrinə və Qarabağ əlillərinə, qaçqın və məcburi köçkünlərə diqqətlə yanaşılıb. Tikintisi başa çatmış 16 və 36 mənzilli yaşayış binalarının mənzilləri xüsusi komissiya vasitəsilə sosial ədalət prinsipi əsasında bölünüb, 42 Qarabağ müharibəsi əlili və şəhid ailəsi, 2 Böyük Vətən Müharibəsi əlili, 2 nəfər 20 Yanvar əlili və 6 Çernobl iştirakçısı mənzillə təmin edilib.

2011-ci ildə rayon sakinlərinə rabitə xidmətinin göstərilməsində də uğurlar əldə olunub. Rayon poçtamtı üzrə tarif gəlirləri proqnozu 105 faiz yerinə yetirilib, əhaliyə 96,4 min manat pullu xidmət göstərilib. Astanlı kənd poçt şöbəsi üçün yeni bina tikilib. Astanlı kəndinə 7,5 və Ağdaş kəndinə 6,5 kilometr kabel çəkilib, Cəlilabad-Yardımlı yolunun tikintisi ilə əlaqədar 13,5 kilometr kabel yenisi ilə əvəzlənib. Cəlilabad və Göytəpə şəhər, Sabirabad, Qarazəncir, Alar və Günəşli kənd elektron avtomat telefon stansiyalarında əlavə nömrə quraşdırılması üçün DSLAM avadanlığı alınıb.

Dövlət Proqramına müvafiq olaraq əhalinin elektrik enerjisi ilə təchizatını yaxşılaşdırmaq məqsədilə Cəlilabad şəhərində elektrik təsərrüfatının yenidən qurulması uğurla başa çatdırılıb. Şəhərin yeni yaşayış massivində 6, habelə Bədirli, Adnalı, Cəfərxanlı, Uzuntəpə və Üçtəpə kəndlərində yeni transformator istifadəyə verilib, 14,5 kilometr yararsız elektrik xətləri yenisi ilə əvəzlənib.

Ötən il Günəşli kəndində yeni qazpaylayıcı stansiya tikilib, Günəşli və Alar kəndlərinə təbii qaz verilib, rayon üzrə 1161 paqonmetr qaz xətti dəyişdirilib. Bu il Cəlilabad şəhərinin yenidən qazlaşdırılması və 12 kəndə təbii qazın bərpa edilməsi nəzərdə tutulub.

"Azərbaycan Respublikası regionlarının 2009-2013-cü illərdə sosial-iqtisadi inkişafı Dövlət Proqramı"nda Cəlilabadın şəhər və kənd yaşayış məntəqələrinin su təchizatı ilə yaxşılaşdırılması nəzərdə tutulub. Ölkə prezidentinin tapşırığına əsasən Cəlilabad şəhərində su və kanalizasiya sisteminin yenidən qurulması üçün texniki şərtlər hazırlanıb, içməli suyun Viləşçaydan gətirilməsinə dair layihə təsdiq olunub. Dünya Bankının vəsaiti hesabına Almaniya, Türkiyə və Azərbaycan mütəxəssislərinin həyata kecirəcəyi bu mühüm tədbir nəticəsində 2013-cü ilədək Cəlilabad şəhərində yeni su və kanalizasiya sistemi çəkiləcək, bütün çirkab sular yeraltı borular vasitəsilə təmizləyici qurğuya axıdılacaq.

Dərsə gedən min uşaq...

Rayonda təhsilin inkişafına diqqət artırılıb və bu prosesə gündəlik nəzarət olunur. Nəticə də göz qabağındadı. Ötən il Gülməmmədli kəndində 360 şagird yerlik tam orta məktəbin tikintisi başa çatdırılıb. Cəlilabad şəhər 2 saylı tam orta məktəbi üçün 640, 6 saylı ümumi orta məktəbi üçün 180 və Sabirabad kənd 1 saylı tam orta məktəbi üçün 480 şagird yerlik məktəblərin tikintisi davam edir. Soltankənd kəndində 180, Həziabad kəndində 360 və Zəhmətabad kəndində 80 şagird yerlik tam orta məktəbin tikintisi də nəzərdə tutulub.

Cəlilabad ötən ilki məzunları ilə də fəxr edə bilər. 2010-2011-ci dərs ilini başa vurmuş məzunlardan 232-si ali, 120-si isə orta ixtisas məktəblərinə qəbul olunub. Cəlilabad şəhər 1 saylı məktəb-liseyin 695 bal toplayan məzunu Mirfaiq Mirhəsənov Prezident təqaüdünə layiq görülüb. Rayon İcra Hakimiyyəti yüksək bal toplayan 11 nəfərə aylıq təqaüd təyin edib.

Akademik Zərifə Əliyeva adına orta məktəbin XI sinif şagirdi İlahə Təhməzova xalq yazıçısı Mirzə İbrahimovun 100 illiyi ilə əlaqədar inşa müsabiqəsində qalib gəldiyi üçün I dərəcəli diploma layiq görülüb.

Məktəblərinin informasiya və kommunikasiya texnologiyaları ilə təminatını yaxşılaşdırmaq üçün rayonun 110 məktəbində 739 dəst kompüter quraşdırılıb. Təhsildə qazanılan uğurlara görə Cəlilabad şəhər 8 saylı məktəb-liseyin müəllimi Qərənfil Əhmədova "Respublikanın əməkdar müəllimi" fəxri adına layiq görülüb, akademik Zərifə Əliyeva adına tam orta məktəbin direktoru Elminaz Nadirova "Tərəqqi" medalı ilə təltif olunub. Cəlilabad şəhər 1 və 8 saylı məktəb-liseyləri "İlin ən yaxşı məktəbi" müsabiqəsinin qalibi elan ediliblər.

Rayonda tibbi xidmətin səviyyəsi əvvəlki illərə nisbətən yüksəlib, ötən il imtiyazlı xəstələr 229,7 min manatlıq pulsuz dərman preparatları ilə təmin olunub. Açılışında ölkə prezidenti cənab İlham Əliyevin iştirak etdiyi dünya standartlarına cavab verən müalicə-diaqnostika mərkəzi istifadəyə verildikdən sonra əhaliyə göstərilən səhiyyə xidməti daha da yüksəlib.

Rayon mədəniyyət və turizm şöbəsi il ərzində tarixi hadisələr, əlamətdar günlər, bayramlar və yubileylər münasibətilə maraqlı kütləvi tədbirlər keçirib, əhalinin asudə vaxtının təşkili üçün davamlı tədbirlər görüb.

Turizm sahəsində də bir sıra işlər görülmüş, Cəlilabadın turizm potensialı düzgün dəyərləndirilərək bu sahəni daha da inkişaf etdirmək üçün xüsusi proqram hazırlanıb. Bu gün rayon ərazisində 8 turizm obyekti fəaliyyət göstərir ki, onların da ikisinə Mədəniyyət və Turizm Nazirliyi tərəfindən lisenziya verilib. Həmin obyektlərdə beynəlxalq standartlara cavab verən meyarlar əsasında xidmətin səviyyəsini yüksəltmək və əlavə obyektləri istifadəyə vermək üçün tədbirlər görülür.

Açılan qapılar, açıq qapılar

Vətəndaşların müəyyən olunmuş qrafikə uyğun olaraq qəbulu, onların müraciətlərinə vaxtında baxılması və haqlı tələblərinin həll edilməsinə xüsusi diqqət göstərilib. Müraciətlərin əksəriyyəti dərhal həll olunub, həlli mümkün olmayan problemlər barədə vətəndaşlara müvafiq izahatlar verilib. Rayonun imkanı xaricində olan problemlər barədə isə müvafiq qurumlar qarşısında məsələ qaldırılıb.

Cəlilabadın zəhmətsevər insanları son illər rayonun abad və gözəl olması üçün çox işlər görüblər. Onların əməyi sayəsində Cəlilabad tikilir, yenidən qurulur. Tikilir ki, iz qalsın...

Etibar CƏBRAYILOĞLU

Azərbaycan Respublikasının Prezidenti yanında kütləvi informasiya vasitələrinin inkişafına dövlət dəstəyi fondunun maliyyə yardımı ilə

Ədalət.-2012.-25 aprel.- S.7.