Kürlə Xəzərin qovuşduğu yer - Neftçala

Dəli Kürün mavi Xəzərlə qovuşağında yerləşən Neftçala rayonu ölkəmizin aqrar rayonlarından biri hesab edilir.Əsas məşğuliyyəti əkinçilik və maldarlıq olan bu rayonda neft və qaz yataqlarının olması Neftçalanın iqtisadiyyatına rəngarənglik verir. Həmişə sakit və sabit ictimai-siyasi həyat tərzi burdakı insanların xarakterlərinin təzahürüdür. Halal zəhmətlə yaşamağa üstünlük verən neftçalalılar İstehsalatın müxtəlif sahələrində çalışmaqla bərabər fərdi təsərrüfatlarına da daim diqqət göstərirlər. Kürlə Xəzərin müxtəlif növ balıqları da onların sosial-iqtisadi həyatlarında önəmli rol oynayır. Bir vaxtlar daha çox bəhrələndikləri balıq məhsulları həm çayda, həm də dənizdə hiss olunacaq dərəcədə azalmışdır.

Kifayət qədər geniş əraziyə malik olan Neftçalada oğurluq hadisələrinə çox az hallarda rast gəlinir, baxmayaraq ki, bu çöllərdə mal-qaraya çox zaman nəzarət edilmir. Çox nadir hallarda baş verən ciddi cinayət hadisələrinə də rayon sakinləri sərt təpki göstərirlər. Qonaqpərvər, sadə insanları olan Neftçalanın qışı mülayim, yayı isti keçir. Ancaq dəniz sahilində yerləşməsi sakinləri bu istidən qoruyur. Bu ilin yayı isə hələ qabaqdadır...

Uğurlar asan qazanılmır

Son illərin uğurlu sosial-iqtisadi göstəriciləri içərisində Neftçala rayonunun da öz payı var. Regionlarda aparılan abadlıq-quruculuq işləri, sosial-iqtisadi inkişaf bu rayonda bir qədər də özünü qabarıq göstərir. Çünki kifayət qədər geniş ərazini əhatə edən rayon mərkəzinin özündə aparılan abadlıq-quruculuq işləri bunu deməyə əsas verir.

Ötən il rayonda ümumi məhsul istehsalı 152.1 milyon manat olmuşdur, adambaşına isə 1883.4 manatlıq məhsul istehsal edilmişdir.

Neftçalada dörd yeni müəssisə yaradılmış, 624 fiziki şəxs fəaliyyətə başlamışdır. Heç şübhəsiz ki, bu da rayonda bir neçə yüz iş yeri olmaqla bərabər sakinlərin sosial həyatlarına stimul verən amillərdəndir. Son 8 ildə 4529 nəfər neftçalalı daimi iş yeri ilə təmin edilmişdir. İndi rayonda bir işçinin orta əmək-haqqı 234 manata yüksəlmişdir.

Arxada qoyduğumuz ildə Neftçala rayon büdcəsinə 3 milyon 624 min manata qarşı 4 milyon 452 min manat vəsait daxil olmuşdur.

40071 hektar payızlıq əkin sahəsindən 102 min ton taxıl yığılmışdır. 2109 ton tərəvəz, 374 ton kartof,1240 ton bostan bitkiləri də 2011-ci ildə əldə edilmişdir.

Maldarlığa xüsusi fikir verən neftçalalılar iribuynuzlu mal-qaranın sayını 40927-yə, xırdabuynuzluların sayını isə 118146 başa çatdırmışlar.

Bütün bu uğurlar asand qazanılmamışdır, rayon sakinlərinə göstərilən qayğılarla bərabər, onlara yaradılan şərait son anda öz sözünü demişdir. Respublika "Aqrolizinq" ASC-nin Neftçala Aqroservis filialı yerli sakinləri mineral gübrələrlə bərabər 117 ədəd müxtəlif növ texnika ilə də təmin etmişdir.

Bildiyimiz kimi, Neftçala rayonu balıqçılıq təsərrüfatını yaxşı bildiyindən bu sahə onlara daim divident gətirmişdir. Hazırda bu sahəni daha da inkişaf etdirməg məqsədi ilə 3 nərə balıqartırma zavodu fəaliyyət göstərir. Ötən il bu zavodlar tərəfindən 2 milyon 997 min ədəd kiçik nərə balığı yetişdirilib Kür çayı vasitəsi ilə Xəzər dənizinə buraxılmışdır.

Gözəlikdir bu yerlərin hər daşı

Neftçala şəhərində geniş küçələr, bağlar, parklar kifayət qədər çoxdur. Mənzil Kommunal Çoxsahəli İstehsalat Birliyinin rəisi Səadət Cəfərovla "Xocalı" abidəsi önündə görüşdük. Özü demiş, səhərin gözü açılmamış küçələrdə olan rəis bunu işinin xüsusiyyəti kimi qiymətləndirdi. Şəhərin təmizliyinə gözəlliyinə cavabdeh olan bu idarənin 2011-ci ldəki uğurlarını bildiyim üçün rəisdən bu ilin birinci rübündəki iş-gücündən danışmağı xahiş etdim:

-Şəhərin təmizliyini, yaşıllığını qorumaq elə də asand deyil. Hər gün bu şəhərin ilk işbaşında olan adamı bizik. Birinci rübdə 192 min kvadratmetr ərazidə təmizlik, 2700 kvadratmetr ərazidə isə yaşıllıq işləri aparmışıq. Ötən ildən isə abadlıq, yenidənqurma işlərini yenidən genişləndirmişik. Heydər Əliyev prospekti buna bariz nümunədir. Bu prospektin sonunda bulvar tikintisinə start vermişik. Burada yerləşən inzibati və yaşayış binalarının dam örtüklərinin, fasatlarının müasir memarlıq üslubunda yenidən işlənməsi, piyada yolunun genişlənməsi prossesi arxada qalmışdır. Şəhərdəki binaların dam örtüyünün dəyişdirilməsi davam etdirilir. Şəhərdəki məhəllələrdə sakinlərin istifadə etdikləri xeyir-şər yerlərinə təzədən əl gəzdirmişik. Gördüyünüz bu "Xocalı" abidə-kompleksinin qara və ağ qranitlə yenidən işlənməsi, ətrafının abadlaşdırılması xeyli vaxt apardı. Ancaq nəticədə gözəl bir mənzərə yarandı. Görüləsi işlərimiz hələ çoxdur, sağlıq olsun, bir-bir hamısını həyata keçirəcəyik".

Səadət Cəfərovla söhbətimiz bir xeyli də uzana bilərdi, lakin onu şəhərin digər hissəsində daha vacib işlər gözləyirdi.

(ardı gələn sayımızda)

Səxavət Məmmədli,

Azərbaycan Respublikasının

Prezidenti yanında kütləvi informasiya

vasitələrinin inkişafına dövlət dəstəyi

fondunun maliyyə yardımı ilə

Ədalət.-2012.-26 aprel.- S.7.