ŞƏKİ: UĞURLARIN PRİNSİPİAL İSTİQAMƏTİ

Cavanlaşan "qoca şəhər"

Son vaxtlar Şəkidə görülən işlərin ardıcıllığı və sürəti, insanları yaxşı mənada çaşdırıb. Uzun illər boyu davam edən plansız və lokal xarakterli quruculuq işləri sakinləri qane etmirdi. İndi sosial-iqtisadi inkişafın bütün istiqamətləri üzrə qazanılan uğurların sırasında geniş miqyaslı tikinti-quruculuq və abadlıq işləri də diqqət çəkir. Burada qədimlik və müasirlik bir-birini tamamlayan bənzərsiz məqamlardır, görənləri cazibəsinə çəkən gerçək bir harmoniyadır.

Bu inkişafın, bu gedişatın daxilində, gündəlik ritmində başqa bir nüansı da diqqətə gətirmək gərəkdir. Yəni bir vaxtlar buraxılmış nöqsanları aradan qaldırmaq, indi qazanılan uğurları qoruyaraq daha böyük məsələlərin həllinə köklənmək, işgüzarlığın ən sağlam və fəal formasında qala bilmək, Böyük Şəhəri daha çox sevmək və sevdirə bilmək elə də asan məsələ deyil. Ancaq respublika rəhbərliyinin yüksək etimadını layiqincə doğruldan Şəki Şəhər İcra Hakimiyyətinin başçısı Elxan Usubov və onun tabeliyində olan məmur korpusu çətin və şərəfli vəzifələri uğurla həll etməkdə, həyata keçirməkdədir. Bunlar nədən ibarətdir? Təbii ki, əsasən rayon iqtisadiyyatını real perspektivlərdə inkişaf etdirilməsindən, eyni zamanda insanların sosial və mədəni tələblərinin həll edilməsindən, quruculuq və abadlıq tədbirlərinin dekorativ görüntüdən fundamental, uzunmüddətli məqsədlərə yönəldilməsindən. Məhz bu səbəbdən də sakinlər Şəkidəki bir çox sosial problemlərin və quruculuq - müasirləşdirmə tədbirlərinin sürətlə həll edilməsini ölkə Prezidentinin siyasətinin yerli hakimiyyət tərəfindən düzgün və səriştəli həyata keçirilməsinin nəticəsi hesab edirlər.

2012 - Azərbaycan iqtisadiyyatı üçün uğurlu illərdən biri

Respublikanın hər yerində olduğu kimi, Şəki şəhərində də 2012-ci ilin birinci yarısının yekunlarına və qarşıda duran vəzifələrə həsr olunmuş yığıncaq keçirilmişdir. Yığıncaqda ətraflı məruzə ilə çıxış edən Şəki Şəhər İcra Hakimiyyətinin başçısı Elxan Usubov bildirmişdir:

- İyulun 11-də cənab Prezidentimiz İlham Əliyevin sədrliyi ilə keçirilən Nazirlər Kabinetinin 2012-cu ilin I yarısının yekunlarına və qarşıda duran vəzifələrə həsr olunmuş iclasında ölkənin sənaye potensialının gücləndirilməsi, sosial proqram və layihələrin icrası geniş müzakirə olunmuş, qarşıda duran vəzifələr müəyyənləşdirilmişdir. Dövlət başçısı 2012-cu ilin I yarısında da Azərbaycan iqtisadiyyatının uğurla inkişaf etdiyini, bu müddət ərzində ümumi daxili məhsulun 1,5 faiz, qeyri-neft sektorunun 11,3 faiz, əhalinin pul gəlirlərinin 14,2 faiz artdığını, inflyasiyanın 2,2 faiz olduğunu bildirmişdir. Cənab Prezidentimiz Dövlət İnvestisiya Proqramının və ölkənin sənaye potensialının möhkəmləndiyini, iqtisadiyyatın şaxələndirilməsi və ölkəmizin rəqabətə davamlı olması ilə əlaqələndirmişdir. Nazirlər Kabinetinin 2012-ci ilin I yarısının sosial-iqtisadi inkişafının yekunlarına həsr olunmuş iclasında çıxış edən cənab Prezidentimiz demişdir: "İlin birinci ayları iqtisadi cəhətdən cox müsbət idi və bu, bizə imkan verirdi ki, ümumiyyətlə, 2012-ci ili Azərbaycan iqtisadiyyatı üçün növbəti uğurlu il kimi qiymətləndirək. Altı ayın yekunları bu fikirləri bir daha təsdiqləyir. Çünki altı ayda ölkə iqtisadiyyatı uğurla inkişaf etmiş və qarşıda duran bütün vəzifələr icra edilmişdir"...

...Şəkidə hansı işlər görülmüşdür və görülməkdədir. 2012-cu ilin I yarısında rayonumuzun sosial-iqtisadi inkişafının yekunları ilə tanış olmaq üçün konkret faktlara nəzər salmaq kifayətdir. Bu ilin I yarısında ilkin hesablamalara görə, faktiki qiymətlərlə 191 milyon 408 min manatlıq məhsul buraxılmışdır ki, bu da 2011-ci ilin müvafiq dövrü ilə müqayisədə 132,2 faiz çoxdur. Adambaşına faktiki qiymətlərlə 1084 manatlıq, yaxud 2011-ci ilin müvafiq dövrü ilə müqayisədə 32,2 faiz çox məhsul buraxılmışdır. Rayon üzrə orta aylıq əməkhaqqı 222 manat olmuşdur. Bu əvvəlki ilin müvafiq dövrü ilə müqayisədə 7 faiz çoxdur. 2012-cu ilin I yarısında Şəki rayonunda 514 iş yeri açılmışdır ki, onların da hamısı daimi iş yerləridir. 2012-cu ilin I yarısında Şəki rayonunda əmtəə dövriyyəsinin ümumi həcmi 134 milyon 112 min manat olmuşdur. Bu 2011-ci ilin müvafiq dövrü ilə müqayisədə 14,6 faiz çoxdur. Hazırda rayonumuzda 20 sənaye müəssisəsi fəaliyyət göstərir ki, bunların da 12-si kiçik müəssisədir. 2012-ci ilin I yarısında Şəki rayonunda istehsal və qeyri-istehsal sahələrinin inkişafına yönəldilmiş investisiyanın həcmi 53 milyon 807 min manat olmuşdur. Bu 2011-ci ilin müvafiq dövrü ilə müqayisədə 2 dəfə çoxdur. İstifadə edilmiş investisiyanın 95,9 faizi dövlət mülkiyyətinin, 4,1 faizi qeyri-dövlət mülkiyyətin payına düşür. 2012-ci ilin I yarısında əsas kapitala yönəldilmiş investisiyanın 92,4 faizi tikinti quraşdırma işlərinə sərf edilmişdir ki, bu da əvvəlki ilin müvafiq dövrü ilə müqayisədə 2 dəfə çoxdur.

Şəki Rayon Məşğulluq Mərkəzinə 2012-ci ilin I yarısında 234 nəfər işaxtaran müraciət etmişdir. Hesabat dövründə 123 nəfər işə düzəlmişdir. İcra Hakimiyyəti başçısının Sərəncamına əsasən müəyyən edilmiş 18 kvota yerinə 6 nəfər işə götürülmüşdür. 25 may 2012-ci ildə Şəki şəhərində əhalinin məşğulluğunun təmin edilməsi məqsədi ilə keçirilən növbəti "Əmək Yarmarkası"na 26 müəssisədən 258 boş iş yeri çıxarılmışdır.Yarmarkada göndəriş verilmiş 50 nəfər işlə təmin olunmuşdur...

Sosial sahəyə dövlət qayğısı

Şəkililər ölkə rəhbərinin əhalinin sosial müdafiəsi sahəsində yeritdiyi siyasəti yüksək qiymətləndirir, aztəminatlı əhali qrupuna göstərdiyi böyük diqqət və qayğının təzahürü kimi qəbul edir. Nazirlər Kabinetinin iyul ayının 11-də keçirilən geniş iclasında çıxış edən Prezidentimiz demişdir: "Sosial məsələlərin həlli daim diqqət mərkəzində olmalıdır, bazar iqtisadiyyatı prinsipləri əlbəttə ki, bizim üçün əsasdır. Ancaq bəzi hallarda bazar iqtisadiyyatı prinsipləri sosial ədalət ilə üst- üstə düşmür. Amma Azərbaycanda hər iki amil daim diqqət mərkəzindədir və görülən tədbirlər bunun məntiqi nəticəsidir. Ünvanlı sosial yardım proqramı icra edilir, hər bir ailəyə verilən məbləğ 109 manat səviyyəsindədir və 143 min ailə ünvanlı sosial yardım alır. Bu da sosial siyasətimizi gücləndirən amildir".

(ardı gələn sayımızda)

MƏZAHİR ƏHMƏDOĞLU

Azərbaycan Respublikasının Prezidenti yanında kütləvi informasiya vasitələrinin inkişafına dövlət dəstəyi fondunun maliyyə yardımı ilə

Ədalət.-2012.-9 avqust.-S.4.