Saatlı yeni inkişaf mərhələsində

(əvvəli ötən sayımızda)

Təbii fəlakətin son izləri

2 il əvvəl ölkəni ayağa qaldıran Kür və Araz çaylarındakı daşqınlar Saatlı rayonunda da ciddi problemlər yaratdı. Sarısu gölünün bəndi suyun təzyiqinə dözməyərək dağıldı. Nəticədə rayonun iqtisadiyyatına, eləcə də kənd təsərrüfatına ciddi ziyan dəydi. Rayonun bir sıra kəndlərində evlər su altında qaldı. Hesablamalara görə rayonun 5 yaşayış məntəqəsi sel sularının qurbanına çevrilmiş, 545 ev qəzalı vəziyyətə düşmüşdür. Respublika rəhbərliyinin göstərişi ilə, Nazirlər Kabinetinin sərəncamlarına əsasən təcili işə başlanılmışdır.

Qısa vaxt ərzində Saatlı rayonunda 421 yaşayış evi tikilib sakinlərin ixtiyarına verilmişdir. Daha 112 yaşayış evinin inşası davam etdirilir. 81 evdə isə bərpa-gücləndirmə işləri aparılmışdır. 3 məktəb binası, Nərimankənd qonaq evi, həkim ambulatoriyası, Musalı və Dəllək kəndlərindəki məscidlər əsaslı təmir edilmişdir.

178 mənzildən, 132 şagird üçün məktəb binasından, 50 yerlik uşaq bağçasından, bir sıra zəruri sosial obyektlərdən ibarət Saatlı rayonunda yeni qəsəbə ərsəyə gətirilmişdir. 2012-ci ilin aprel-iyun aylarında həyata keçirilən nəzarət nəticəsində məlum olmuşdur ki, daha 13 mənzilin inşası labüddür. 25 evdə bərpa-gücləndirmə, 5 evdə isə təmir işləri həyata keçirilməlidir.

Daşqınlar nəticəsində əmlaklara, təsərrüfatlara dəymiş ziyana görə 1191 ailəyə, əkin sahələrinə görə 1336 təsərrüfat subyektinə kompensasiya verilmişdir.

Təbii fəlakətin nəticələrini daim diqqətdə saxlayan Azərbaycan Prezidenti İlham Əliyev əlavə tədbirlərin görülməsi üçün 29 mart 2012-ci ildə Sərəncam imzalamışdır. Sərəncama əsasən bu işlərin davamı üçün Fövqəladə Hallar Nazirliyinə 50 milyon manat vəsait ayrılmışdır.

Yaxın vaxtlarda Saatlı rayonunda təbii fəlakətin son izləri də qalmayacaq. Çünki bu yöndə heç bir problem yoxdur.

Rayonun aqrar uğurları

Saatlı rayonunun ictimai-siyasi, elmi həyatında fəal iştirak edən ziyalılardan biri də Zakir Əmişovdur. Rayonun bütün uğurlarına qəlbən sevinən, bu uğurlarda az da olsa rolu olan Zakir müəllim yenə fərəhlə danışdı:

- Camaatımız əməksevər, torpağa bağlı insanlardır. Son illər uğurlarımız çox olub, kənd təsərrüfatında bir az da irəli getmişik. Bu ilin birinci yarısında kənd təsərrüfatçılarımız ümumi dəyəri 47119,0 min manat olan məhsul istehsal etmişdir. Bu ötən ilin müvafiq dövrü ilə müqayisədə 22,7 faiz çoxdur. Bu ilin 01 iyul tarixinə 14010 hektar torpaq sahəsindən 49786 ton məhsul yığmışıq. 8439 ton arpa da bu ilin birinci yarısında toplanmışdır. Buğdanın məhsuldarlığı hər hektara görə 35,5 sentner, arpanınki isə 29,2 sentner olmuşdur.

Diri çəkidə 3538 ton ət, 18700 ton süd, 4581 min ədəd yumurta əldə edə bilmişik. İndi təsərrüfatlarımızda iribuynuzlu mal-qaranın sayı 66685 başa, xırdabuynuzluların sayı 100616 başa çatmışdır. Pambıq zavodları əhali və fiziki şəxslərlə 5647 hektar ərazidə pambıq əkilməsi üçün müqavilə bağlamışdır. Qıraqlı kənd ərazisində yaradılmış "GTS-Agro" MMC fiziki şəxs və əhali ilə 2080 hektar pambıq əkini üçün razılığa gəliblər.

Əkin torpaqlarının su təchizatını yaxşılaşdırmaq üçün 2012-ci ilin birinci yarısında 157 kilometr kollektor-derenajlar 452,7 min kub metr lildən təmizlənmişdir. Bura lildən təmizlənmiş 277 kilometr suvarma kanallarını da əlavə edək. Uğurlarımız çoxdur, mən ancaq bir neçəsini sadalaya bildim.

Əslində Zakir müəllim Saatlının aqrar həyatından lazımi məlumatı vermişdi.

Sosial qayğılar həmişə var

Sosial qayğıları tam həll olunmuş məkan varsa, demək orda insan yaşamır. Harda insan varsa, orda mütləq kiçik də olsa sosial qayğı var. İnsanın sosial qayğıları bitib-tükənməzdir.

Ancaq həyat üçün çox vacib olan sosial qayğıların həlli mütləq vacibdir. Məsələn, kənd rayonu olan Saatlıda sakinlərin mavi qazla təmin edilməsi əsas amillərdən biridir. Rayonun 44 yaşayış məntəqəsindən Saatlı şəhəri və Mollavazlı kəndi istisna olmaqla 1992-ci ildən mavi qazsız qalan rayonda son vaxtlar uğurlu layihələr həyata keçirilir. Qıraqlı, Mustafabəyli, Bəylik kəndlərinə mavi qaz vermək üçün "İnşaat" TQNQ tikinti idarəsi işə başlamışdır. Yaxın vaxtlarda bu siyahının böyüyəcəyi gözlənilir. Şəhərin M.F.Axundov, Cavanşir, Müşfiq, Nizami, Nəsimi küçələrindəki qaz xətlərində təmir-tikinti işləri aparılmışdır.

Rayonun müxtəlif yaşayış məntəqələrində 22 modul tipli sutəmizləyici qurğular tikilmişdir.

Saatlıdakı elektrik şəbəkələrinin və yarımstansiyaların yenidən qurulmasına 2009-cu ildən başlanmışdır. 2012-ci ilin 6 ayında 31,8 min manat xərc çəkilmişdir. Sarıcalar və Qara Nuru kəndlərində bu işlərin davam etdirilməsinə qərar verilib.

Saatlı şəhərini və ətraf kəndləri keyfiyyətli su, davamlı kanalizasiya xətləri ilə təmin etmək üçün 30 may 2012-ci ildə işə başlanılıb.

Saatlı rayonunda sosial qayğılarla bərabər digər qayğılar da var. Ancaq sevindirici hal odur ki, Saatlıda bütün bunları həll edən və həll edəcək sağlam siyasi-iqtisadi kollektiv də var.

Səxavət Məmmədli

Ədalət.-2012.-15 avqust.-S.3.