ŞAMAXI: MİNİLLƏRİN ƏN GÖZƏL DÖVRANIMI?

(əvvəli ötən sayımızda)

Nəticələr sevindiricidir

Şamaxı rayonu üzrə cari ilin altı ayının sosial-iqtisadi inkişafının yekunları yenə də sevindiricidir. Bunu statistik rəqəmlər də təsdiqləyir. Qeyd olunam müddət ərzində 62,9 milyon manat dəyərində ümumi məhsul buraxılışı olmuşdur. Bu rəqəm keçən ilin müvafiq dövrü ilə müqayisədə 11,1 milyon manat və yaxud 121,5 faiz çoxdur. Həmin müddətdə rayonda sənaye məhsulunun həcmi 2,6 milyon manat olmuşdur ki, bu da 2011-ci ilin müvafiq dövrü ilə müqayisədə 481 min manat və yaxud 121,9 faiz çoxdur. Həmçinin ilin birinci yarısında əsas kapitala yönəldilən investisiyaların həcmi 19,2 milyon manat təşkil etmişdir. Ötən altı ayda pərakəndə əmtəə dövriyyəsi 66,7miyon, əhaliyə göstərilən pullu xidmətlərin həcmi 16,3 milyon manat olmuşdur. İlin əvvəlindən bəri rayon üzrə 296 daimi iş yeri açılmışdır.

Rayon iqtisadiyyatının mühüm sahəsi

Rayon iqtisadiyyatında kənd təsərrüfatı sahəsi mühüm yer tutur. Görülən məqsədyönlü tədbirlər nəticəsində bu ilin altı ayı ərzində bu sahədə 17326,1 min manatlıq məhsul istehsal edilmişdir. Ötən il rayon üzrə 21691 hektarda taxıl əkini aparılmışdır. İndiyədək 14000 hektarda biçin aparılmışdır. Rayonun aran hissəsində məhsul yığımını başa çatdıran fermerlər bu işi orta zonada da yekunlaşdırmaq üzrədirlər. Qeyd etməliyik ki, istər məhsul istehsalının artımında, istərsə də əkin sahələrinin ilbəil genişləndirilməsındə kənd təsərrüfatı məhsulları istehsalçılarına verilən dövlət yardımı əsaslı rol oynamışdır. Bu il rayon üzrə 3260 nəfərə 400,8 min manat yardım verilmişdir.

Keçmiş şöhrətin - üzümçülüyün geri dönüşü

İndi rayonda üzümçülüyün yenidən dirçəldilməsi istiqamətində mühüm addımların atılmasına başlanılmışdır. Bu sahədə dövlət başçısının tapşırığı ilə qəbul edilən "2012-2020-ci illərdə Azərbaycan Respublikasında üzümçülüyün inkişafına dair Dövlət Proqramı"nın qəbul edilməsinin böyük rolu olmuşdur. Hazırda rayonda üzümçülük yenidən inkişaf dövrünü yaşayır. Fermerlər tərəfindən ilin birinci yarısında 67 hektar yeni üzümlük salınaraq bu gəlirli sahə 1357 hektara çatdırılmışdır.

Ötən dövrdə taxılçılıq və üzümçülüklə yanaşı heyvandarlıq sahəsinin də intensiv inkişafı xüsusi diqqət mərkəzində olmuşdur. Belə ki, altı ayda rayon üzrə 2433,7 ton ət, 10967,8 ton süd, 372,6 ton yun və 6168 min ədəd yumurta istesal olunmuşdur ki, bu da 2011-ci ilin müvafiq dövrü ilə müqayisədə xeyli çoxdur. Heyvanların baş sayında da artım meylləri müşahidə olunmaqdadır.

Prezident: hər bir sakin istəyir ki, onun rayonu daha gözəl olsun...

Azərbaycan Respublikasının Prezidenti İlham Əliyev Nazirlər Kabinetinin 2012-ci ilin birinci yarısının sosial-iqtisadi inkişafının yekunlarına və qarşıda duran vəzifələrə həsr olunmuş iclasında bir daha regionlarda gedən işləri yüksək qiymətləndirərək bildrmişdir ki, rayonlar arasında sağlam rəqabət gedir. Həm rayon rəhbərləri, eyni zamanda, ictimaiyyət, əlbəttə, hər bir rayon sakini istəyir ki, onun rayonu daha da gözəl, abad və inkişaf etmiş olsun.

Son bir il ərzində Şamaxının da abadlaşdırılması və daha da inkişaf etdirilməsi istiqamətində genişmiqyaslı tədbirlər hazırlanaraq həyata keçirilmişdir. Ötən dövr ərzində bir tərəfdən qədim Şamaxı şəhərinin abadlaşdırılması, digər tərəfdən bir sıra mövcud sosial problemlərin mərhələ-mərhələ həll edilməsi rayon sakinləri tərəfindən xüsusi razılıq hissi ilə qarşılanmışdır.

Bu baxımdan şəhərin mərkəzi küçələrindən biri olan "Şirvan" küçəsində aparılan böyük həcmli tikinti və yenidənqurma işlərini qeyd etmək lazımdır. İlin əvvəllərindən etibarən bu küçədə yeni işıqlandırma sistemi quraşdırılmış, müasir səkilər çəkilərək təzə bardürlər qoyulmuşdur. Küçə boyu bütün ictimai, fərdi yaşayış evlərinin, həmçinin inzibati binaların və obyektlərin fasadlarına milli memarlıq üslubunda yeni üzlük materialı çəkilmiş, dam örtükləri dəyişdirilmişdir. 20 yanvar küçəsində 5 mənzilli 2 mərtəbəli yaşayış binasının inşası başa çatdırılmaq üzrədir. Heydər Əliyev küçəsində isə mövcud istinad divarları milli memarlıq üslubunda təmir edilmiş, səki daşları dəyişdirilərək onun üst örtüyünə mozaik piltələr döşənmişdir.

Şamaxıda ölkə rəhbərliyinin tapşırıqlarına layiqincə əməl edilir

Şəhərin giriş hissəsində Şamaxının tarixi keçmişinə layiq layihə əsasında inşa olunan qalanın tikintisi başa çatmaq üzrədir. Bu il Prezident sərəncamı ilə anadan olmasının 150 illiyi qeyd olunan böyük şairimiz M.Ə.Sabirin adını daşıyan park tamamilə yenidən qurularaq əsaslı təmir edilmişdir. Eyni zamanda şairin məqbərəsi də təmir olunmuşdur. Digər məşhur şairimiz İmadəddin Nəsiminin adını daşıyan parkda da əsaslı təmir və yenidənqurma işlərinə başlanılmışdır.

Bundan əlavə N.Nərimanov küçəsinin əsas hissəsinə, həmçinin yeni salınmış səkilərin üzərinə keyfiyyətli asfalt örtük döşənmiş, sel sularının qarşısının alınması məqsədilə su ötürücülər çəkilərək yeni işıqlandırma sistemi quraşdırılmışdır. S.Ə.Şirvani küçəsində sel sularının ötürülməsi üçün bir kilometrə yaxın məsafədə diametri 1020 mm-lik dəmir borular quraşdırılmışdır. Sürüşmə zonasında yerləşən H.Ciddi küçəsində abadlıq işləri aparılaraq vurulmuş svaylar üzərində hündürlüyü iki metr olan dəmir-beton sədd çəkilmişdir.

Hazırda Şamaxı şəhərində su, kanalizasiya və qaz xətlərinin çəkilişi davam etdirilir. Artıq N.Nərimanov, S.Ə.Şirvani, H.Əliyev və Şirvan küçələrində çəkilən bu xətlər əsas şəbəkəyə qoşulmuşdur. Bakı-Şamaxı magistral yolunun şəhərə giriş hissəsində dövlət idarələri üçün nəzərdə tutulan üçmərtəbəli binanın inşası başa çatmaq üzrədir. Rayon ağsaqqallarının xahişi ilə əsas yolu təmir olunan qədim "Yeddigünbəz" qəbirstanlığının ərazisində namazgahın inşasına başlanılmışdır.

(ardı gələn sayımızda)

MƏZAHİR ƏHMƏDOĞLU

Azərbaycan Respublikasının Prezidenti yanında kütləvi informasiya vasitələrinin inkişafına dövlət dəstəyi fondunun maliyyə yardımı ilə

Ədalət.-2012.-24 avqust.-S.3.