GÖYÇAY: SEVİNC VƏ QÜRUR ÜNVANI

(əvvəli ötən saylarımızda)

Kəndarası yolların qaydaya salınması istiqamətində işlər davam etdirilir. İkinci kənd investisiya layihəsi çərçivəsində rayonun Çayarxı, Çaxırlı və Yekəxana kəndlərində ümumi uzunluğu 15,3 km. olan kəndarası yollar çınqılla təmir olunmuş, 6 yerdə su keçidləri bərpa edilmiş və ya yeni su keçidləri inşa edilmişdir. 13 saylı yol istismar idarəsi tərəfindən Hacalıkənd-Qaraman-Ləkçıplaq kəndlərarası avtomobil yolunun bir hissəsinə yeni asfalt örtüyü döşənmişdir.

Şəhərin təmiz saxlanması, məişət tullantılarının vaxtında daşınması üçün müəyyən tədbirlər görülmüş, şəhərin mərkəzi küçələrinin təmiz saxlanılmasına nail olunmuşdur.Şəhərdə aparılan abadlıq və yaşıllaşdırma işlərində rayonun idarə, müəsisə və təşkilatları, yerli icra və bələdiyyə orqanları yüksək mütəşəkkillik göstərmişlər.

2012-ci ilin birinci yarısında fəaliyyətdə olan obyektlərin genişləndirilməsi və yenidən qurulması, kiçik və orta sahibkarlığın inkişaf etdirilməsi və görülmüş digər tədbirlər nəticəsində 303 daimi iş yeri açılmışdır. Bütövlükdə 2003-2012-ci illərdə rayonda 8922 yeni iş yeri açılmışdır ki, bunun da 7510-u və ya 84,2 faizi daimi iş yerləridir.

Təhsil və səhiyyə: Göyçayda Bioloji Təbabət Klinikası fəaliyyətə başladı

Hesabat dövründə rayon təhsilinin və səhiyyəsinin maddi-texniki bazasının möhkəmləndirilməsi istiqamətində bir sıra tədbirlər həyata keçirilmiş, Göyçay şəhər 12 nömrəli uşaq bağçasında aparılan əsaslı təmir işləri başa çatdırılmış, rayonda ilk özəl səhiyyə müəssisəsi olan Bioloji Təbabət Klinikasının Göyçay filialı istifadəyə verilmişdir.

Azərbaycan Respublikası Nazirlər Kabinetinin 06 fevral 2012-ci il tarixli 24 s nömrəli sərəncamına əsasən Azərbaycan Respublikasının 2012-ci ildə dövlət büdcəsində dövlət əsaslı vəsait qoyuluşu üçün nəzərdə tutulmuş vəsait hesabına Çərəkə kənd 2 saylı 360 şagird yerlik tam orta məktəbin, Ulaşlı-şıxlı kənd 220 şagird yerlik tam orta məktəbin tikintisi işləri davam etdirilmiş, Şəkili kənd 80 şagird yerlik ümumi orta məktəbin, Göyçay şəhər 1 saylı 40 yerlik uşaq bağçasının tikintisi üçün layihə-smeta sənədləri hazırlanmışdır.

Çərəkə kəndində, həmçinin Dövlət Proqramına müvafiq olaraq Ləkçıplaq kəndində 2 saylı tam orta məktəb üçün inşa edilən 360 yerlik məktəb binalarının yeni dərs ilinə qədər istifadəyə verilməsi nəzərdə saxlanılır. Həmçinin Yaponiya hökumətinin dəstəyi ilə yeni inşa ediləcək şəhər 4 saylı uşaq baxçasının tikintisi üçün layihə-smeta sənədləri hazırlanır.

Əhalinin sosial müdafiəsi

Əsası Ulu Öndər Heydər Əliyev tərəfindən qoyulmuş əhalinin sosial problemlərinin həlli strategiyası Prezident İlham Əliyev tərəfindən uğurla davam etdirilir. Əsas sosial problemlərdən olan əmək pensiyalarının artırılması, əmək qabiliyyətini itirmiş şəxslərin sosial müdafiəsi, ailə başçısını itirmiş şəxslərin maddi vəziyyətlərinin yaxşılaşdırılması ölkə Prezidentinin daim diqqət mərkəzində olmuş, bu sahədə işləri təkmilləşdirmək üçün fərman və sərəncamlar verilmiş, Qanunlar qəbul edilmişdir.

Hesabat dövründə sosial yardıma ehtiyacı olan insanların müəyyənləşdirilməsi istiqamətində əməli tədbirlər görülmüş, bu yardımla bağlı rayon Əmək və Əhalinin Sosial Müdafiəsi Mərkəzinə müraciət etmiş 1809 nəfərə ünvanlı sosial yardım təyin olunmuşdur. Aztəminatlı təbəqələrin, əlil və şəhid ailələrinin sosial müdafiəsinin gücləndirilməsi üçün əməli tədbirlər görülmüşdür. Hazırda bu kateqoriyadan olan 3823 nəfər müxtəlif sosial müavinətlər alırlar.

300 nəfərə yaxın ahıl, tək və kimsəsiz yaşayan vətəndaşlar mərkəzin sosial məişət xidmətindən istifadə edirlər.

Dövlət Sosial Müdafiə Fondunun rayon şöbəsində əmək, ailə başçısını itirməyə və əlilliyə görə pensiyalarının təyin olunmasında daha mütərəqqi üsullardan istifadə edilməklə bütün pensiyaçılar haqqında məlumatlar avtomatlaşdırılmış və baza məlumat sistemi yaradılmışdır. Hazırda Dövlət Sosial Müdafiə Fondu rayon şöbəsi tərəfindən 20 minə yaxın hüquqi və fiziki şəxslər, mülkiyyətindəki kənd təsərrüfatına yararlı torpaqlardan istifadə edən şəxslər fərdi qaydada uçota alınmış və onlara sosial sığorta şəhadətnamələrinin verilməsi təmin edilmişdir. 01 aprel 2012-ci il tarixə rayon üzrə 9137 nəfər qocalığa, 1405 nəfər ailə başçısını itirməyə və 3868 nəfər əlilliyə görə pensiya və müavinət alan şəxs vardır.

Vətəndaş müraciətləri diqqət mərkəzində

Rayon icra hakimiyyəti başçısı aparatı hesabat dövründə Azərbaycan Respublikası Prezidentinin "Vətəndaşların müraciətlərinə baxılması haqqında" müvafiq fərmanını rəhbər tutaraq əhalini narahat edən problem və çətinlikləri yerində öyrənmək və operativ həll etmək məqsədi ilə səyyar görüşlərin keçirilməsi praktikasından geniş istifadə etmişdir. 2012-ci ilin birinci yarısında rayon icra hakimiyyəti başçısının 21 səyyar qəbulu keçirmişdir. Keçirilmiş görüşlərdə 2495 nəfərə yaxın iştirak etmiş, 127 nəfər çıxış edərək 97 müxtəlif xarakterli təklif, müraciət və şikayət söylənilmiş, yerli əhəmiyyətli sosial problemlər qaldırılmışdır. Müraciətlər nümayəndəliklər üzrə ümumiləşdirilmiş, görüləcək hər bir işin icraçısı və konkret müddəti göstərilməklə tədbirlər planı tərtib edilmiş və icrasına aparıtın müvafiq şöbələri tərəfindən nəzarət təmin olunmuşdur. Keçirilmiş səyyar qəbullar haqqında operativ məlumatların müəyyən edilmiş müddətlərdə RİAİS sisteminə ötürülməsi təmin edilmişdir.

MƏZAHİR ƏHMƏDOĞLU

Azərbaycan Respublikasının Prezidenti yanında kütləvi informasiya vasitələrinin inkişafına dövlət dəstəyi fondunun maliyyə yardımı ilə

Ədalət.-2012.-30 avqust.-S.3