ŞAMAXI: MİNİLLƏRİN ƏN GÖZƏL DÖVRANIMI?

(əvvəli ötən saylarımızda)

2012-ci ilin mart və aprel aylarında rayonun müxtəlif ərazilərinə 2050 ədəd ağac əkilmiş, bir sıra ekoloji tədbirlər həyata keçirilmişdir.

Qeyd olunan müddət ərzində Azərbaycan Respublikasının Prezidenti cənab İlham Əliyevin Sərəncamlarına əsasən Cümə məscidinin və Şamaxı Astrofizika Rəsədxanasının əsaslı təmir edilərək yenidən qurulması işləri davam etdirilmişdir. Ötən ilin birinci yarısında Şamaxı Olimpiya İdman Kompleksinin yenidən qurulması, rayon icra hakimiyyətinin inzibati binasının qarşısında fəvvarə kompleksinin quraşdırılması davam etdirilmiş, Heydər Əliyev parkındakı fəvvarələr kompleksi isə əsaslı təmir olunmuş və orada böyük həcmli monitor quraşdırılmışdır.

Həmişəki kimi təhsilə xüsusi qayğı və diqqət

2012-ci ildə təhsil sahəsinin maddi-texniki bazasının daha da möhkəmləndirilməsi məqsədilə əsaslı işlərin görülməsinə başlanılmışdır. Otən altı ay ərzində Göylər kəndində 360, Həmyəli kəndində 180, Kərkənc kəndində 120, Qonaqkən, Böyük Xınıslı və İkinci Çaylı kəndlərinin hər birində 80 yerlik yeni məktəb binalarının tikintisinə başlanılmışdır. Hazırda Azərbaycan Müəllimlər İnstitutunun Şamaxı filialının binasında təmir işləri davam etdirilir. Mədrəsə qəsəbə uşaq bağçası əsaslı təmir olunmuş, şəhər 1 saylı uşaq bağçası üçün yeni binanın tikintisinə başlanılmışdır. Uşaq-incəsənət məktəbi üçün müasir binanın inşası davam etdirilmişdir.

İlin birinci yarısı ərzində Şamaxı elektrik şəbəkəsi və rayon qaz istismarı sahəsi tərəfindən rayon ərazisində xeyli işlər görülmüşdür. Həmin müddətdə Hacılı, Əhmədli, Qızmeydan, Kələxana, Adnalı və Məlikçobanlı kəndlərinə qaz kəməri çəkilərək istifadəyə verilmişdir. Yaxın günlərdə isə Quşçi kəndinin sakinləri də təbii qazdan istifadə etmək imkanı əldə edəcəklər. İyun ayından isə rayonun ən iri yaşayış ərazilərindən olan Göylər və Çarhan kəndlərinin qazlaşdırılması işlərinə başlanılmışdır. Ötən dövr ərzində Şamaxı şəhərinin təbii qaz təminatınının yaxşılaşdırılması üçün bir neçə küçədə nəzərdə tutulmuş işlər görülmüşdür.

Bu baxımdan ilin altı ayında Şamaxı elektrik şəbəkəsi tərəfindən də xeyli tədbirlər həyata keçirilmişdir. Belə ki, 10 KV-luq Çörək zavodu, şəhər 1, 2 saylı, Mərkəzi, Bənövşə, Telestansiya, Şıxlar, Avaxıl, Şərədil, Göylər və s. hava xətlərində bir sıra təmir işləri aparılmış və bəzi avadanlıqlar dəyişdirilmişdir.

Burada Aleksandr Düma da heyranlığını gizlətməmişdir...

İlin birinci yarısının ən yaddaqalan hadisələrindən biri də Azərbaycanın Şamaxı və Fransanın Qayar şəhərləri arasında dostluq körpüsünün qurulmasıdır. Bu ilin 29 may - 1 iyun tarixlərində rayonun nümayəndə heyəti Fransada olmuş, Şamaxı və Qayar şəhərləri arasında əməkdaşlıq münasibətlərinin qurulması ilə bağlı Bəyannamə imzalanmışdır. Bu tədbir bir daha Azərbaycanın, o cümlədən tarixi paytaxt şəhər olan Şamaxının zəngin və qədim mədəniyyətinin, incəsənətinin və mətbəxinin nəyə qadir olduğunu bir daha sübut etmişdir.

Turizmin bazası möhkəmlənir

Şamaxı turizm üçün respublikanın əlverişli rayonlarından biridir. Şamaxının bir tərəfdən zəngin təbiətə, digər tərəfdən qədim tarixə və mədəniyyətə malik olması onun turizm imkanlarını daha da artırır. Hazırda rayonda 24 istirahət mərkəzi fəaliyyət göstərir. İyulun 21-də "Şirvan" mehmanxanası rayon sakinlərinin, eləcə də qonaqların istifadəsinə verilmişdir. Dünya standartlarına uyğun yenidən qurulmuş bu mehmanxanada qonaqlara, ümumiyyətlə, bütün müştərilərə komfort xidmət göstərmək üçün hər cür şərait vardır. Həmçinin hazırda rayonun Şərədil, Saqiyan kəndlərinin və Pirqulu zonasının ərazilərində müasir mehmanxanaların tikintisi davam etdirilir.

İcra aparatı: vətəndaş müraciətlərinə münasibətdə effektiv metodlar

Cari ilin birinci yarısında rayon icra hakimiyyəti başçısı aparatına 488 vətəndaş müraciəti, o cümlədən 418 ərizə, 70 şikayət daxil olmuşdur. Ötən ilin müvafiq dövrü ilə müqayisədə müraciətlərin ümumi sayı 285 ədəd, ərizələrin sayı 171 ədəd, şikayətlərin sayı isə 114 ədəd azalmışdır. Müraciətlərdən 159-u Azərbaycan Respublikasının Prezident Adminstrasiyasından, 4-ü Milli Məclisdən, 10-u Nazirlər Kabinetindən, 43-ü respublikanın digər qurumlarından, 272-si isə vətəndaşlardan bilavasitə rayon icra hakimiyyətinə ünvanlanmışdır. Vətəndaş müraciətlərinə diqqətlə yanaşılmasının, konkret və əsaslı cavabların verilməsinin nəticəsidir ki, şikayətlərin sayı ərizələrə nisbətən 348 ədəd az olmuşdur.

Birinci yarımillikdə rayonun 3 qəsəbə və 21 kəndində rayon icra hakimiyyətinin başçısı ilə keçirilmiş görüş-qəbulda 2005 nəfər əhali iştirak etmişdir ki, bu da həmin kəndlərin ümumi əhalisinin 7,5%-ni təşkil etmişdir. 92 xahiş xarakterli müraciətin 87% ictimai, 13% faizi isə şəxsi xarakter daşımışdır.

Müraciətlərin 28-i (30,4%) müsbət, 7-i (7,7%) qismən həll edilmiş, 24-nin (26,1%) icrası müvafiq rayon təşkilatlarına tapşırılmış, 18-nin (19,5%) həlli barədə respublikanın əlaqədar orqanlarına müraciət edilmiş, 14-nün (15,2%) həlli isə Azərbaycan Respublikası regionlarının sosial-iqtisadi inkişafı (2009-2013-cü illər) Dövlət Proqramına daxil edilmişdir.

Göründüyü kimi Şamaxı rayonunda bütün istiqamətlər üzrə məqsədyönlü tədbirlər davam edir, rayon rəhbərliyi əhalinin arzu və istəklərinin həyata keçirilməsi, rifah halının daha da yaxşılaşdırılması üçün mümkün olan zəruri işlərin reallaşmasına ciddi səy göstərir. Bu səbəbdən də rayonda həyat öz axarı ilə davam edir və yüksək əhval-ruhiyyə hökm sürür.

MƏZAHİR ƏHMƏDOĞLU

Azərbaycan Respublikasının Prezidenti yanında kütləvi informasiya vasitələrinin inkişafına dövlət dəstəyi fondunun maliyyə yardımı ilə

Ədalət.-2012.-25 avqust.-S.13.