Salyan yeni inkişaf mərhələsində

Noyabrın üçüncü ongünlüyü mərkəzi aranda xeyli mülayim keçir. Bir qədər əvvəlki soyuq küləkdən, yağışlı havalardan əsər-əlamət qalmayıb. Ağacların yarpaqları saralsa da hələ tamam tökülməyib. Payız günəşi də mavi qübbədə tənbə-tənbə mürgüləməkdədir. Salyan rayon mərkəzinin təmiz və yaraşıqlı küçələrinə səpələnmiş qızılı yarpaqlar səliqə-sahmanı pozsa da təbii gözəlliyi ilə insanda xoş ovqat oyadır.

Asfaltlanmış küçələr, müasir üslubda yenidən qurulmuş səkilər, fasadları və dam örtükləri dəyişdirilmiş hündür mərtəbəli binalar indi daha əzəmətli görünür.

Salyanda park və xiyabanlarda yaşıllıqların saxlanılmasına böyük diqqət verilir. 2012-ci ilin 9 ayı ərzində rayon ərazisində 31 min ədəddən çox ağac və kül kolları əkilmişdir. Bu ağacların əksəriyyətini eldar şamı, sərv, küknar kimi həmişəyaşıl ağaclar təşkil edir.

Salyan şəhərinin ümumi görünüşünə ayrı bir gözəllik verən 9395 kvadrat metr ərazidə çəmənlik salınmışdır. Bütün bunlar son vaxtlar Salyanda aparılan yenidənqurma, tikinti-abadlıq işlərinin nəticəsidir.

El yolundan,

şəhər küçəsindən tanınar

Salyan rayonunda yeni yolların çəkilişinə, təmirinə ayrıca fikir verilir. Çünki yollar iqtisadi inkişafla bərabər, həm də sosial şəraitin yaxşılaşdırılması, mədəni əlaqələrin genişləndirilməsi deməkdir.

Azərbaycan Respublikasının Prezidenti İlham Əliyevin 14 aprel 2009-cu il 80 saylı Fərmanı təsdiq edilmiş «Azərbaycan Respublikası Regionlarının 2009-2013-cü illərdə sosial-iqtisadi inkişafı Dövlət Proqramı» çərçivəsində Salyanda həyata keçirilən bir sıra uğurlu layihələrdən bəhs edərkən yol təsərrüfatından söz açmaq vacibdir. Rayon mərkəzindəki H. Əliyev, N. Nərimanov, Q. Səmədov, Y. Zərgərli, M. Ağazadə, Ə. Kürçaylı, Şəhriyar, E.İmanov, A. Hüseynov, M. Dadaşov, Aşıq Pənah, 20 Yanvar, H.Z. Tağıyev, A. Ağabəyli, X.R.Ulutürk, İ. Qurbanov, Ə. Hüseynzadə, T.Xəlilbəyli, S. Vurğun, 28 May, M.Ə. Rəsulzadə küçələrinə 17,42 kilometr asfalt basılmışdır.

On minlərlə kənd sakinlərinin böyük ehtiyac duyduqları daha bir yol çəkilişi də bu il reallaşıb. 23,5 kilometr uzunluğu olan çox rahat Yolüstü - Kürsəngi avtomobil yolu buna gözəl nümunədir. Boranı kənd və Arbatan kənd yollarına döşənmiş 6 və 2,8 kilometr asfalt da bu işləri davamıdır.

Salyan şəhərinə xüsusi gözəllik verən tikinti-quruculuq, abadlıq işləri 2012-ci ilin 9 ayında bir az da genişləndirilib. Şəhər küçələrinin təmir edilməsi diqqət mərkəzində olub. Şəhərin müxtəlif küçələrinə 26348 kvadrat metr üzlük daş döşənib. Səkilərin kənarlarına 40475 metr barüdür düzülüb. 11431 kvadrat metr əraziyə tava-piltə qoyulub. 640 metr uzunluğunda 1920 kvadrat metr istinad divarı çəkilib. 3227 kvadrat metr hörgü işləri isə mişar daşları ilə aparılmışdır.

Salyan şəhərinin ümumi görünüşünə xələl gətirən 11 kommunal evin fasadları yenilənmişdir. Daha 37 çoxmərtəbəli yaşayış evlərinin dam örtüyü əsaslı təmir edilmişdir.

Müasir üslubda yenidən qurulmuş bu gözəl küçələri lazımınca işıqlandırmaq üçün 630 ədəd xüsusi görünüşü olan dirək quraşdırılmışdır. Burdakı kommunal binalarının, ticarət şəbəkələrinin və digər sosial obyektlərin fasadlarının işıqlandırılması təmin edilmişdir.

Rayonun mavi qaz

qayğısı olmayacaq

Qışı mülayim keçən Salyan rayonunda şaxtalı havaların olmamasına heç kəs zəmanət verə bilməz. Əslində qışın gözəlliyi də onun bəyaz qarı və şaxtasıdır. Ancaq soyuqdan qorunmaq üçün istilikdən - mavi qazdan istifadə etmək mütləq lazımdır. Bu istilik mənbəyinin məişətdə hələ ki, alternativi yoxdur.

2012-ci ilin sonuna 3 ay qalmasına baxmayaraq bu sahədə xeyli işlər görülmüş, bir sıra uğurlara imza atılmışdır. Salyan şəhərində eləcə də onun kəndlərində insanların mavi qaza olan ehtiyacları dəqiqliklə müəyyənləşdirilmişdir. Salyan şəhərinin Ə.Hüseynzadə, H.Z. Tağıyev, A. Ağazadə, X.R. Ulutürk, Ə. Hüseynov, T. Xəlilbəyli küçələrində 381 metr uzunluğunda yeni yeraltı polietilen boru çəkilmişdir. Qaz xətlərinin yeniləşməsi işi 20 Yanvar küçəsində də aparılmışdır.

Rayon mərkəzinin təbii qazla təmin edən 159 millimetrlik orta təzyiqli «Mərkəzi qazanxanalar» qaz kəmərinin eyni küçələrdən keçən hissəsinin yenidən qurulması məqsədilə yeni borular çəkilmişdir. Ə. Hüseynov, Ə. Zeynalov küçələrindən keçən müxtəlif ölçülü qaz kəmərləri də dəyişdirilmişdir.

Salyan şəhərini, eləcə də onun kəndlərini mavi qazla mütəmadi təmin etmək üçün «Ələt-Astara» yolunun 62-ci kilometrliyində, şəhərin girəcəyində yeraltı qaz kəməri üzərində yeni ölçü qovşağı inşa edilmişdir. Rayon mərkəzinin İ. Quliyev, M.F. Axundov, C. Cabbarlı, Ə. Zeynalov, Aşıq Pənah və başqa küçələrinin, Kürqaraqaşlı kəndini təbii qazla təmin edən uzunluğu 7700 metr olan qaz kəmərinin yenidən qurulması başa çatdırılmışdır.

Parça-Xalac, Seyidan, Cəncəli, Piratman kəndlərinə mavi qazın verilməsi üçün bu kəndlərə bir pilləli sistemdə polietilen boruların çəkilməsi yekunlaşmışdır. Rayonun 21 yaşayış məntəqəsində qaz təminatının bərpası üçün 23 kilometr uzunluğunda çəkilmiş qaz kəməri tezliklə öz bəhrəsini verəcək. Qarabağlı və Kərimbəyli kəndlərinin qaz təsərrüfatı bir pilləli qurularaq sayğaclaşdırma mərhələsinə çatdırılmışdır.

Şəhərin Ə. Qasımzadə, T. Davudzadə, M.Ə. Rəsulzadə, H.Z. Tağıyev küçələrində 1512 metr uzunluğunda orta təzyiqli, E. İmanov, Sabir, Y. Zərgərli küçələrində 2927 metr, Çuxanlı kəndində 9300 metr, Arbatan kəndində 4400 metr uzunluğunda qaz xətti çəkilmişdir. 32 kilometr uzunluğunda kənd daxili qaz xətləri iki tərəfli çəkilmiş, 600 yeni sayğac quraşdırılmışdır. Şəkərli, Qardili, Yenikənd kəndlərində orta və aşağı təzyiqli qaz xətlərinin çəkilməsinə start verilmişdir.

Bütün bunlar onu deməyə əsas verir ki, tezliklə Salyan rayonunda mavi qazla bağlı bütün qayğılar həll edilmiş olacaq.

Səxavət Məmmədli

Ədalət.-2012.-1 dekabr.-S.4.