Eynulla Müslüm

Qoru görüm

Kəs deyəndə kəsir səsin,

Tanıya bilmir yiyəsin.

Öz başını yeyən kəsin,

Başdaşını qoru görüm.

Yurdu boğan bürkü deyil,

Qovan qorxu-hürkü deyil.

Vətən ata kürkü deyil,

Qarışını qoru görüm.

Şər düşəndə dan yerinə,

Dayaz baş vurur dərinə.

Qəm dolanda gözlərinə,

Göz yaşını qoru görüm.

Şeytan çıxır gün batanda,

Ac arvad ərin atanda.

Qız uşağı naz satanda,

Göz-qaşını qoru görüm.

Əllər yenə dizdə qaldı

Zaman-zaman axdı sular,

Düzlər yenə düzdə qaldı.

Gözlər zilləndi göylərə,

Əllər yenə dizdə qaldı.

Hafiz Rəhim

Ayaqları döyənəkdi,

Əlləri qabar düzlərin.

Hər vaxt sümsük tula kimi

Ehtiyac tapar düzləri.

Mat qalıbdır bu gərdişə,

Bəlkə də göydən düşüblər.

Bu havaya uyuşmurlar

Taqətdən-heydən düşüblər.

Qəzəb də var, giley də var,

Gözlərinin qarasında.

Əriyirlər gilə-gilə

Əyrilərin arasında

***

Abdulla Məmməd

Əllərim bulaşıb göz yaşlarına

Bir damla göz yaşın-sonda ölən köz,

Dilinlə gor eşmə ürəyimdə sən.

Dünən sevincimə şərik olan qız,

Bu gün kədərinlə ürəyimdəsən.

Əllərim bulaşıb göz yaşlarına,

Alın yazısıdı, göz yaşı deyil.

Qucub dizlərini hönkürmə yenə

Dizlərin sevgimə başdaşı deyil.

Ədalət.-2012.-4 dekabr.-S.7.