Fond gəncləri fəal olmağa çağırdı

Fərhad Hacıyev: "Dağlıq-Qarabağ münaqişəsi barədə səsimizi dünyaya çatdıra bilməyimiz üçün görülən işlərdə xaricdəki gənclərimizin xüsusi rolu var"

"Gənclər Fondu bir sıra beynəlxalq layihələrə maliyyə dəstəyi göstərib, mühüm beynəlxalq forumların, konfransların təşkilatçısı olub. Bu layihələrin keçirilməsində əsas məqsəd ölkəmizi beynəlxalq səviyyədə təmsil etmək, Azərbaycan həqiqətlərinin dünya ictimaiyyətinə çatdırılmasında birbaşa iştirak etmək, bununla yanaşı, müxtəlif ölkələrdə yaşayan azərbaycanlı gənclərin bir araya gəlməsi, onların şəbəkələrinin yaradılması üçün imkan yaratmaq olub. Xarici ölkələrdə yaşayan azərbaycanlı gənclərin aktivliyi təqdirəlayiqdir".

Bu fikirləri Azərbaycan Gənclər Fondunun icraçı direktoru Fərhad Hacıyev APA-ya müsahibəsində bildirib. Fond elan etdiyi ilk qrant müsabiqəsindən danışan icraçı direktor qeydiyyatdan keçmiş 172 təşkilat və 83 fərdi şəxsdən layihə təklifləri aldıqlarını A kateqoriyası üzrə 104, B kateqoriyası üzrə 16, C kateqoriyası üzrə isə 9 layihənin seçildiyini deyib. "Digər D və E kateqoriyaları üzrə isə mütəmadi olaraq müraciətlər qəbul olunub. D kateqoriyası üzrə 17 nəfər gənc beynəlxalq tədbirlərdə Azərbaycanı təmsil edib. E kateqoriyasına rəsmi olaraq 4 müraciət gəlib. Ümumilikdə, layihə müraciətlərinə əsasən fərdi gənclər və QHT-lər tərəfindən təqdim olunan layihələrə Müşahidə Şurasının qərarına əsasən 1 920 820 manat pul ayrılıb".

Qısa müddətdir fəaliyyətə başlamasına baxmayaraq Gənclər Fondu gənclər arasında kifayət qədər tanındığını vurğulayan F.Hacıyev layihələrin daha çox təhsil, sağlam həyat tərzinin təbliği, ekoloji maarifləndirmə, ictimai işlərdə gənclərin aktivliyinin təmini və könüllülüyün yayılmasına xidmət etdiyini söyləyib.

İcraçı director xarici ölkələrdə yaşayan azərbaycanlı gənclərin aktivliyinin təqdirəlayiq olduğunu bildirib: "Ermənistan-Azərbaycan, Dağlıq-Qarabağ münaqişəsi barədə səsimizi dünyaya çatdıra bilməyimiz üçün görülən işlərdə xaricdəki gənclərimizin xüsusi rolu var. Buna görə də, Gənclər Fondu beynəlxalq layihələrin də keçirilməsində maraqlıdır və dəstək göstərməyə hazırdır".

F.Hacıyev Fondun növbəti ildəki planlarından da danışıb: "Gənclər Fondu önümüzdəki ildə fəaliyyətini daha da genişləndirməyi planlaşdırır. Fond müxtəlif telekanallarda intellektual televiziya layihələri, daha geniş miqyaslı və əhatəli gənclik və idman layihələri, sosial çarxlar müsabiqələri, gənclər arasında ixtiraçılığın inkişafına dəstək verən layihələr həyata keçirəcək. Bundan başqa, Fond bölgələrdə fəaliyyətlərin aktivləşdirilməsinə xüsusi diqqət göstərəcək.

Fond fəaliyyətini internetdə genişləndirməyi planlaşdırır. Hal-hazırda Fondun saytında 254 gənclər təşkilatı və 191 fərdi gənc qeydiyyatdan keçib. Müxtəlif sosial şəbəkələrdə Fondun səhifələri minlərlə gənc tərəfindən izlənir. Önümüzdəki günlərdə fond ikinci qrant müsabiqəsini elan edəcək. Müsabiqənin elanı zamanı prioritet sahələr və istiqamətlər qeyd olunacaq. Gəncləri və gənclər təşkilatlarını növbəti müsabiqədə aktiv iştirak etməyə, gəncləri əhatə edəcək layihə təklifləri irəli sürməyə dəvət edirik. Gənclər fondu məhz gənclər üçün fəaliyyət göstərir. Gənclərin ideyalarının, təşəbbüslərinin dəstəklənməsi bizim üçün çox vacibdir. Buna görə də, gənclərimizi fəal olmağa çağırırıq".

Anar İsaoğlu

Ədalət.-2012.-20 dekabr.-S.4.