Muğan düzündəki rayon

Biləsuvar şəhərində içməli su təchizatı və kanalizasiya sistemi yenidən qurulur

(əvvəli ötən sayımızda)

"Bu mənim rayonumdur"

Biləsuvarda respublika banklarının filialları kifayət qədərdir. "Röyal-Bank" ASC-nin Biləsuvar rayon filialının müdiri İsmayıl Rüstəmov da digər şəhər sakinləri kimi öz rayonunu çox sevir:

- Hər bir dövlətin iqtisadiyyatında banklar mühüm rol oynayır. İndi insanlarımz banklara daha çox inanırlar. Nəticə odur ki, ötən ilin 9 ayında biləsuvarlılar banklara 412,0 min manat əmanət qoymuşlar. Bu da iqtisadiyyatımızın bir göstəricisidir. Pərakəndə əmtəə dövryyəsi 75,8 milyon manat olmuşdur ki, bu ötən ilin müvafiq dövrü ilə müqayisədə 19 faiz çoxdur. İstehsal etdiyimiz məhsulun həcmi 118.0 milyon manata çatmışdır. Hər nəfərə düşən ümumi məhsul buraxılışının həcmi 1284 manat təşkil etmişdir.

Əhalinin həyat tərzinin yaxşılaşması, pul gəlirlərinin artması nəticəsində rayonda 110 fərdi ev tikilmiş, ümumi mənzil fondu 1601.5 min kvadratmetr olmuşdur. 2011-ci ilin 9 ayı ərzində istehsalatın müxtəlif sahələrində çalışan sahibkarlara kömək məqsədi ilə 21 sahibkarlıq subyektinə Sahibkarlığa Kömək Milli Fondu tərəfindən 2.2 milyon manat güzətli kreditlər verilmişdir. Əhalinin gəlirləri 119.8 milyon manata çatmışdır, adambaşına düşən pul gəlirlərinin həcmi 1303,6 manat olmuşdur. Həmin müddətdə də 366 daimi iş yeri açılmışdır.

Əhalini elektrik enerjisi ilə daim təmin etmək üçün 15 ədəd elektrik transformatoru əsaslı, 160 ədədi isə cari təmir edilmişdir. Camaatımızın təbii qazı daha yaxşı almaları üçün əlavə 7 kəndə zəruri işlər yekunlaşmışdır. Rayon sakinlərinə sürətli internet xidməti göstərmək üçün elektron ATS-lərdə avadanlıqların quraşdırılması davam etdirilir.

Belə, bütün bu uğurlar mənim yaşadığım Biləsuvarda gərgin və nizamlı zəhmətin hesabına qazanılıb. Düşünürəm ki, belə uğurlarımız hələ çox olacaq.

Kənd təsərrüfatının dinamik inkişafı

Dediyimiz, kimi Biləsuvar Muğan düzündə yerləşən aqrar rayonudur. Ötən il rayon 46050 hektar ərazidə mülkiyyətçilər tərəfindən müxtəlif kənd təsərrüfatı məhsullarının əkini aparılmışdır. Payızlıq əkinin 13338 hektar buğda , 11046 hektar isə arpa olmuşdur. Nəticədə Biləsuvar əməkçiləri taxıl sahələrindən hər hektardan məhsuldarlıq 23.4 sentner olmaqla 57215, 8 ton məhsul götürmüşlər.

2012-ci ildə daha yaxşı məhsul götürmək üçün biləsuvarlılar təxminən 15500 hektar buğda, 12000 hektar ərazidə payızlıq əkin aparmışlar. Rayon Aqroservis filialında və fiziki şəxslərdə bu işləri görmək üçün işlək vəziyyətdə olan 174 ədəd şum traktoru və kotan, 148 ədəd mala, 80 ədəd taxılsəpən var. Suvarılacaq əkin sahələrinin ərazisi 38.9 min hektardan 42.3 min hektara çatdırılmışdır.

Heyvandarlıq sahəsində də ötən il uğurlu olmuşdur. Rayonda iribuynuzluların sayı 39125 başa, xırdabuynuzluların sayı isə 134109 başa çatdırılmışdır. Ət istehsalı 3885 tona, süd istehsalı 17779 tona çatdırılmışdır. Kənd təsərrüfatını daha da genişləndirmək üçün mülkiyyətçilərə 2011-ci ilin 9 ayı ərzində 1558378 manat subsidiya verilmişdir. Onlara 2374 ton güzəştli qiymətlərlə mineral gübrələr satılmışdır. Torpaq adamlarına kömək üçün "Aqrolizinq" ASC-nin Biləsuvar filialının tikintisi başa çatdırılmışdır.

Yaxşı təhsil,sağlam insan gələcəyin təminatçısıdır

Xeyrulla Mürsəlov Biləsuvar ziyalılarından biridir. Burada doğulan , burada istehsalatın müxtəlif sahələrində çalışan Xeyrulla müəllim öz rayonu haqqında həvəslə danışır:

-Rayon haqqında yüz danışmaqdansa bir görmək daha yaxşıdır. Biləsuvar son illərdə öz simasını o qədər dəyişib ki, 10-15 il əvvəl buranı tərk edən indi rayona gəlsə ən azından təəcüblənər. Bu mübaliğəsiz belədir.

Ancaq hər ölkənin, hər rayonun təhsili onun gələcəyi deməkdir. Rayondakı 26 tam orta, 10 ümumi orta, 3 məktəbəqədər təhsil müəssisəsinin maddi-texniki bazası durmadan yüksəlir. 9 məktəbdə əsaslı təmir aparılmışdır. Ötən il 146 məzunumuz ali məktəbə, 70 nəfər orta ixtisas məktəbə qəbul olunub.9 nəfər şagirdimiz isə qəbul imtahanında 600-dən çox bal toplayıb. Xırmandalı kənd 1 saylı orta məktəbin direktoru Firudun Hüseynov "Respublikanın əməkdar müəllimi" adına layiq görülüb.

Bu gün biləsuvarlılara 106 həkim, 291 nəfər orta tibb işçisi xidmət edir. Əhaliyə xidmət üçün rayonun bir neçə kəndində tibb məntəqəsi açılmışdır. Uşaq Sağlamlıq Mərkəzi ən müxtəlif avadanlıqlarla təhciz edilmişdir. Ana və uşaqların mühafizəsi gücləndirilmiş, "Ailə Planlaşması və Reprodiktiv Sağlamlıq " Proqramı həyata keçirilməyə başlanılmışdır.

Qısası, sağlam insan, mükəmməl təhsil gələcəyin təminatçısıdır. Bu mənada bizim Biləsuvarda bu işlər arzu olunan məcrada gedir.

...Muğan düzündəki Biləsuvar haqqında çox danışmaq olar. Ancaq hələlik bunlarla kifayətlənməli olduq. Çünki, bu rayon haqqında daha dolğun yazılar buradakı lahiyələr həyata keçiriləndən sonra bir daha qələmə alınacaq.

Səxavət Məmmədli

Azərbaycan Respublikasının Prezidenti yanında kütləvi informasiya vasitələrinin inkişafına dövlət dəstəyi fondunun maliyy yardımı ilə

Ədalət.-2012.-15 fevral.-S.7.