Üzü bahara doğru

(əvvəli ötən sayımızda)

Rayon əhalisinin elektrik enerjisi və təbii qazla təchizatının yaxşılaşdırılması sahəsində bir sıra işlər görülmüş, 2010-cu ilə nisbətən istehlakçılara 11 min kv.saat çox elektrik enerjisi buraxılmış, Qızılağac, Mollahacılı, Qaraməryəm, Mirzəhüseynli, Şəhadət, Qarabağlar və Ərəbcəbirli kəndlərində qazlaşma işləri aparılmış və həmin kəndlərdə yaşayan 1622 abonentə uzun fasilədən sonra təbii qaz verilişi bərpa edilmişdir.

Bütün bunlarla yanaşı rayon paylayıcı elektrik şəbəkəsi tərəfindən enerji təsərrüfatının lazımi səviyyədə saxlanılması üçün əməli tədbirlər görülmür. Güc transformatorlarının böyük əksəriyyətinə vaxtaşırı profilaktiki qulluq göstərilmir.

Yüzlərlə elektrik dirəyi istismar müddətini başa çatdırdığından hazırda qəza vəziyyətindədir. Şəbəkədə ehtiyat transformatorlar çatışmadığından qəzalar nəticəsində sıradan çıxmış transformatorların qısa müddət ərzində dəyişdirilməsi təmin olunmur.

Küləkli və yağışlı günlərdə əhalinin elektrik enerjisi ilə təminatında tez-tez fasilələrə yol verilir. Son günlər havaların qarlı və şaxtalı keçməsi ilə əlaqədar şəhərin ayrı-ayrı məhəllələrinə və kənd yaşayış məntəqələrinə elektrik enerjisi verilməsində ciddi çətinliklərin yaranması rayonun elektrik təsərrüfatının günün tələblərinə cavab vermədiyini bir daha təsdiq etdi.

Elektrik enerjisindən istifadə edənlərin müraciətlərinə müddət pozğunluğu ilə baxılması və onların əsassız olaraq incidilməsi ilə bağlı çoxsaylı faktlar vardır. Yeni inşa etdirdikləri evlərə elektrik sayğacları quraşdırılması ilə bağlı müraciət etmiş vətəndaşların tələblərinə baxılması aylarla süründürülür.

Elektrik sayğacında nasazlıqlar baş vermiş bir çox abonentlər isə səbəbi araşdırılmadan əsassız olaraq böyük məbləğdə cərimə olunur. Bütün bunlar əhalinin haqlı narazılığına səbəb olur.

2011-ci ildə şəhərin 14 küçəsində ümumi sahəsi 60,6 kv.m. metr olan yeni asfalt örtüyü salınmış, bu məqsədlər üçün rayon büdcəsindən 750 min manata yaxın vəsait xərclənmişdir. 9 küçədə abadlıq işləri aparılmış, şəhərin mərkəzində bayraq meydanının tikintisinə başlanılmışdır.

Şəhərin təmiz saxlanması, məişət tullantılarının vaxtında daşınması üçün müəyyən tədbirlər görülmüş, şəhərin mərkəzi küçələrinin təmiz saxlanılmasına nail olunmuşdur.

Şəhərdə aparılan abadlıq və yaşıllaşdırma işlərində rayonun idarə, müəssisə və təşkilatları, yerli icra və bələdiyyə orqanları yüksək mütəşəkkillik göstərmişlər. Mövcud yaşıllıqlara qulluq edilməsi və yeni yaşıllıqların salınması istiqamətində bir sıra tədbirlər görülmüş, "Ekologiya ili" çərçivəsində ötən il rayon ərazisində 50 mindən artıq ağac və bəzək kolu əkilmişdir.

Rayon əhalisinin içməli su ilə təminatının yaxşılaşdırılması istiqamətində müəyyən tədbirlər həyata keçirilsə də kəndlərdə su təmizləyici qurğuların quraşdırılması, şəhərin içməli su və kanalizasiya sistemlərinin yenidən qurulması sahəsində aparılan işlər lazımi səviyyədə deyildir.

Asiya İnkişaf Bankının krediti hesabına maliyyələşdirilən Göyçay şəhərinin su təchizatı və kanalizasiya sisteminin yenidən qurulması layihəsi olduqca ləng həyata keçirilir.

2009-2011-ci illərdə içməli su mənbəyi olmayan 18 kənddə təmizləyici qurğuların istifadəyə verilməsi nəzərdə tutulduğu halda yalnız Çaxırlı və Bəydövül kəndlərində belə qurğular istifadəyə verilmişdir.

Dövlət proqramı töhfələr verir

"Azərbaycan Respublikası regionlarının 2009-2013-cü illərdə sosial-iqtisadi inkişafı Dövlət Proqramı"nda 2011-ci il üçün Göyçay rayonu üzrə nəzərdə tutulmuş tədbirlərin yerinə yetirilməsi sahəsində müəyyən işlər görülmüşdür. Region əhalisini il boyu təzə meyvə və tərəvəzlə təmin etmək üçün rayonun Ərəbcəbirli kəndində 2000 tonluq soyuducu anbar kompleksi istifadəyə verilmişdir.

Ölkəmizdə alternativ enerji mənbələrindən geniş istifadə edilməsi çərçivəsində Yuxarı Şirvan kanalının Göyçay rayonunun Bığır kəndi ərazisindən keçən hissəsində 3 MVa gücü olan "Göyçay -1" su elektrik stansiyası inşa edilir.

Hesabat dövründə rayon ərazisində yol infrastrukturunun təkmilləşdirilməsi, kəndlərarası avtomobil yollarının yenidən qurulması istiqamətində əməli tədbirlər görülmüş, Muğanlı-Yevlax avtomagistralının Göyçay rayonu ərazisindən keçən hissəsinin əsaslı tikilməsi işlərinə başlanılmışdır.

Azərbaycan Respublikası Prezidentinin 28 iyul 2011-ci il tarixli sərəncamına əsasən Ləkçıplaq-Yalman-Şıxbəy-Məlikkənd-Şıxəmir kəndlərini birləşdirən yolun tikintisinə 2,5 milyon manat vəsait ayrılması rayonda əsl bayram əhval-ruhiyyəsi yaratmış və göyçaylılar ölkə Prezidenti tərəfindən onlara göstərilən diqqət və qayğını yüksək qiymətləndirmişlər. Ümumi uzunluğu 11,6 km. olan kəndlərarası yolun tikintisi qısa müddətdə aparılmış və dekabr ayında istifadəyə verilmişdir.

2011-ci ildə Şıxbəy kəndində 180 yerlik məktəb binası, şəhər 3 saylı və Qaraməryəm kənd tam orta məktəbləri əsaslı yenidən qurma işləri aparıldıqdan sonra istifadəyə verilmişdir.

(ardı gələn sayımızda)

Məzahir Əhmədoğlu

Azərbaycan Respublikasının Prezidenti yanında kütləvi informasiya vasitələrinin inkişafına dövlət dəstəyi fondunun maliyyə yardımı ilə

Ədalət.-2012.-17 fevral.-S.7.