Üzü bahara doğru

(əvvəli ötən sayımızda)

Quruculuq işləri yeni mərhələdə

2011-ci ildə görülmüş digər tədbirlər nəticəsində 724 daimi iş yeri açılmışdır. Bütövlükdə 2003-2011-ci illərdə rayonda 8562 yeni iş yeri açılmışdır ki, bunun da 6518-i və ya 76,1 faizi daimi iş yerləridir.

Dövlət başçısı İlham Əliyevin ölkədə Milli sahibkarlığın inkişafının stimullaşdırılması ilə bağlı gördüyü işlər Göyçay rayonunda da özəl sektorun dinamik inkişafına güclü təkan vermişdir. Yerli sahibkarlar və iş adamları rayonun sosial-iqtisadi inkişafının sürətləndirilməsində, əhalini narahat edən problemlərin həllində fəal iştirak edirlər.

2011-ci ildə rayon üzrə sənaye məhsulunun 76,3 faizi qeyri-dövlət sektorunda istehsal edilmiş və ötən ilə nisbətən özəl bölmədə sənaye məhsulu istehsalı 52,8 faiz artmışdır.

İnvestorların rayona cəlb edilməsi üçün əlverişli mühitin yaradılmasının nəticəsidir ki, hər il Konserv zavoduna, Süd zavoduna, Kərpic zavoduna, Broyler Quşçuluq fabrikinə milyonlarla manat investisiya qoyulur.

Ötən ilin may ayında şəhərin sənaye zonasında "ATF" MMC-nin vəsaiti hesabına smeta dəyəri 800 min manat, istehsal gücü saatda 120 ton olan asfalt zavodu istifadəyə verilmişdir.

Keçən il Sahibkarlığa Kömək Milli Fondundan kredit almaq istəyən sahibkarların sayı xeyli artmış, 19 sahibkarlıq subyektinə fondun vəsaiti hesabına 1,9 milyon manat güzəştli kredit verilmişdir. Hazırda rayonun Yalman kəndində fondun ayırdığı kredit hesabına üzüm qəbulu müəssisəsi və sutkada 8 ton spirt istehsal edən qurğu kompleksi tikilir.

Rayonda sahibkarlara məsləhət, informasiya və tədris xidmətləri göstərmək məqsədi ilə İqtisadi İnkişaf Nazirliyinin Göyçay biznes tədris mərkəzi yaradılmışdır. Keçən il İqtisadi İnkişaf Nazirliyi tərəfindən rayon sahibkarları üçün müxtəlif mövzularda iki seminar, Sahibkarlığa Kömək Milli Fondu tərəfindən kredit yarmarkası keçirilmişdir.

Təhsil, səhiyyə, mədəniyyət...

Rayonda fəaliyyət göstərən təhsil, səhiyyə, mədəniyyət və digər humanitar sahələrin kollektivləri də öz işlərini yüksək səviyyədə qurmağa səy göstərmişlər.

Keçən dərs ilinin buraxılış imtahanlarında IX siniflər üzrə 1819 nəfər, XI siniflər üzrə 1188 nəfər iştirak etmiş, müvafiq olaraq 1766 və 909 nəfər müvəffəq nəticə göstərmişlər.

Ali məktəblərə 307 nəfər qəbul edilmiş, 11 nəfər 600, 47 nəfər 500-dən yuxarı bal toplamışlar.Ümumilikdə rayon üzrə ali məktəblərə sənəd vermə 11,9%, qəbul olunma 1,5% artmışdır.

Bütün bunlarla yanaşı rayon məktəblərində təlim-tərbiyə işinin və tədrisin təşkilində nöqsanlar çoxdur. Bir sıra məktəblərdə yuxarı sinif şagirdlərinin dərsə davamiyyəti zəifdir, qızların təhsildən yayınması, erkən nikahların qurulması ilə bağlı faktlar vardır.

Göyçay Dövlət İdarəetmə və Texnologiya Kollecinin baloniya təhsil prosesinə qoşulması təkcə tələbələrin deyil, həm də müəllimlərin əməyinin qiymətləndirilməsinə imkan yaradır və onlarda məsuliyyət hissini artırır. Kollec Azərbaycan -Almaniya texniki əməkdaşlıq cəmiyyəti ilə əlaqələr yaratmış, Almaniya universitet və kollecləri ilə təcrübə mübadiləsi qurmuşdur.

Kənd təsərrüfatı və sənaye sahələri üzrə kadrlar hazırlayan Peşə liseyində 2011-2012-ci tədris ilində 10 ixtisas üzrə 200 nəfər şagird qəbul olunmuş, 2 yeni fakültə: baytarlıq və kompüter operatorları qrupları açılmışdır.

Keçən il əhaliyə göstərilən səhiyyə xidmətinin yaxşılaşdırılması istiqamətində müəyyən işlər görülmüşdür.

Keçən il Yaponiya dövlətinin dəstəyi ilə Təcili və Təxirəsalınmaz Tibbi Yardım stansiyası əsaslı təmir olunmuş, "Ailə planlaşdırılması və Reproduktiv Sağlamlıq" Mərkəzində yeni otaqlar tikilib istifadəyə verilmişdir.

Respublika Səhiyyə Nazirliyinin müvafiq sərəncamı ilə 2006-2011-ci illərdə yeni doğulmuş uşaqlar Elektron Sağlamlıq Kartı ilə təmin olunur. İl ərzində 7098 nəfərə kart paylanmış və bu sahədə işlər davam etdirilir.

Bunlarla bərabər Mərkəzi rayon xəstəxanası tərəfindən əhaliyə göstərilən səhiyyə xidmətinin təşkilində nöqsan və çatışmamazlıqlar çoxdur. Kənd səhiyyə müəssisələrinin çoxuna ali təhsili olmayan tibb işçiləri rəhbərlik edir, pediatr, mama-ginekoloq və s. ixtisaslar üzrə həkimlər çatışmır. Kənd yerlərində tibbi xidmətin zəif təşkili əhalinin haqlı narazılıqlarına gətirib çıxarır.

Rayon Mədəniyyət və Turizm şöbəsi tərəfindən əhaliyə göstərilən mədəni xidmətin səviyyəsinin yüksəldilməsi istiqamətində müəyyən tədbirlər həyata keçirilmişdir.

2011-ci ilin noyabr ayında rayonda sayca 6-cı olan nar bayramı festivalı keçirilmişdir. Bayramda 20-ə yaxın xarici dövlətin səfiri və diplomatik korpusların nümayəndələri, Azərbaycan Respublikası Milli Məclisin üzvləri, qonşu rayonların nümayəndələri, minlərlə rayon sakini iştirak etmiş, sonda Respublikanın tanınmış incəsənət ustalarının iştirakı ilə böyük bayram konserti və atəşfəşanlıq olmuşdur.

Rayonda dövlət və milli bayramlarımızla bərabər may ayında keçirilən "Gül" , "Kitab günü" bayramları, "Yaşa kitab", "Yaşa qədim Azərbaycan" sərgiləri, Beynəlxalq "Uşaq günü" və digər tədbirlər tamaşaçıların geniş marağına səbəb olmuşdur.

(ardı gələn sayımızda)

Məzahir Əhmədoğlu

Azərbaycan Respublikasının Prezidenti yanında kütləvi informasiya vasitələrinin inkişafına dövlət dəstəyi fondunun maliyyə yardımı ilə

Ədalət.-2012.-18 fevral.- S.12.