İlhamə Qasımova: "Belə müğənni ağzını açan kimi..."

"Onlar bizim bəzi gənc müğənnilər kimi bir-iki ağız oxuyub, pul qazanmaq haqqında fikirləşmirlər"

- İlhamə, Avropa turnesi çərçivəsində Avstriyada, Almaniyada konsert proqramları ilə çıxış etdin. Bu konsertlərin təşkilatçısı kim idi, bu turne sənə nə verdi? Ümumiyyətlə, konsert necə keçdi? Zəhmət olmasa, oxucularımızla təəssüratlarınızı bölüşün.

- Konsertlərin təşkilatçısı, konsert verdiyimiz məkanların - "Muzikpark"ların aid olduğu şirkət idi. Bu konsert mənim ilk imtahan konsertim oldu - deyə bilərəm. Avropa turnesi çərçivəsində verdiyim konsertlərdə daha da çox şey öyrəndim. Hansı ki, bu öyrəndiklərim mənə gələcəkdə böyük zallarda konsert verməyim ücün bir təcrübə oldu. Konsertlərimin uğurla sonuclanmasından çox məmnunam.

- Avropa tamaşaçısı bizim tamaşaçılardan nə ilə fərqlənir?

- Elə də nəzərəçarpacaq fərq yoxdur əslində. Amma bəzi fərqləndirən xüsusiyyətlər var. Məsələn, Avropa tamaşaçısı çox sadədir. Onları yalnız gördüyün iş, onlarla səmimi münasibət, ünsiyyət maraqlandırır. Avropa tamaşaçısını mənim üst-başım, imicim maraqlandırmırdı. Sadə geyimdə hamı bir nəfər kimi məhz musiqi dinləmək üçün konsert məkanına gəlirdilər. Hər şey çox sadə idi. Hamı eyni girişdən girir, eyni qiymətdə olan biletdən alırdı. Bir sözlə, musiqidən zövq almaq üçün bir məkana toplaşan insanlar biri-birindən fərqlənməyə, digərindən üstün görünməyə çalışmırlar.

- Bəs Avropa müğənniləri necə, azərbaycanlı sənətçilərdən hansı kriteriyaları ilə fərqlənirlər?

- Fərq orasındadır ki, Avropada tanınan müğənni olmaq istəyirsənsə, həddindən artıq çox işləməlisən öz üzərində. Orada dinləyici qazanmaq müğənniyə böyük zəhmət hesabına başa gəlir. Məsələn, bu gün mahnını aldım, beş gün dinlədim, sonra da gedib 1-2 saata studiyada yazdırdım - bunlarla bitmir. Çünki belə müğənni ağzını açan kimi rədd cavabı alır. Həqiqətən, mən orada müğənniliyin bir sənət kimi necə ağir olduğunu anladım və bunu yaşadım. Bir mahnı üzərində o qədər çalışmaq, studiyada yazılanda da hətta nəsə bəyənilmirsə, hər şey təxirə salınır. Deyirlər təzədən öyrən.

İnanın ki, artiq ifa edəcəyin mahnını nifrət edəcəyin qədər əzbər öyrənirsən. Söhbət sözlərin və ya musiqi kantatasının öyrənilməsindən getmir, oxu tərzindən, sound-dan, mahnının hansı sözlərində hansı səs ahəngi olmalıdır - bunlardan gedir. Bir sözlə, çox ağırdır. Məhz bu amillərə görə, bizim müğənnilərin işi yüngüldür, bunlara görə fərqlənirik Avropa müğənnilərindən. Bir də mən orada çox da reklamı aparılmayan müğənnilərin sənətə vurğunluqlarını gördüm. Onlar bizim bəzi gənc müğənnilər kimi bir-iki ağız oxuyub, pul qazanmaq haqqında fikirləşmirlər. Onları, ifa edəcəkləri mahnı, gördükləri işin keyfiyyəti maraqlandırırdı. Çünki yeganə maraq sənətə idi. Məncə, biz onlarla müqayisədə, az çalışqanlığımıza görə fərqlənirik.

- İlhamə Qasımova Azərbaycan üçün artıq bir brenddir, əgər Avropada adının dəyişdirilməsi məsələsi ortaya çıxsa - başqa ad altında çıxışlar etməyinizi nəzərdə tuturam - buna razılaşarsınız?

- Xeyr, çünki bunun üçün çox gecdir. Həm də bu söhbət ilk müqavilə imzaladığım gün olub və adımın İlhamə kimi qalması qərara alındı. Adım yerində qaldı, sadəcə, soyadı kənarlaşdırdılar. Məncə, adından kənar bir ad qoymaq üçün çox fərqli janrın və ya görünüşün olmalıdir, yaxud da davranış tərzin, Lady Qaqa və ya Madonna, Pink, Sinead O"Connor kimi olmalıdır. Bunlarsız ad dəyişmək yersiz, mənasız və savadsızlıq olar.

- Bu turneyə külli miqdarda vəsaitlər xərclənir, sirr deyilsə, bunun müqabilində qonorarınızın məbləğini açıqlayarsınız?

- Bu, əlbəttə ki, sirrdir. Təkcə mənim sirrim yox, prodüserimin ve menecerimin arasında olan biznes sirridir.

- Birdəfəlik Azərbaycanı tərk edib, Avropada fəaliyyət göstərmək təklifi alsanız, cavabınız necə olar? Həm də belə olan halda, Azərbaycanda nələri itirə bilərsiniz?

- "Birdəfəlik" dedikdə, uzunmüddətli ola bilər, yəni əlbəttə ki, bu oradakı işdən asılıdır. Əgər məni doğrudan da qane etsə, o zaman birdəfəlik deyil, uzunmüddətli gedə bilərəm, iş müqaviləsi ilə. Yaşamaq üçün isə Vətənim yaxşıdır.

Ədalət.-2012.-22 fevral.- S.8.