Alman alim Xocalı soyqırımı haqda kitab yazdı

Səbail rayon İcra Hakimiyyətinin təşkilatçılığı ilə Milli Məclisin deputatları, ictimaiyyət nümayəndələri, təşkilat və birliklərin iştirakı ilə Almaniyanın Maqdeburq şəhər Bazar İqtisadiyyatı İnstitutunun rəhbəri Rolf Kunşun Xocalı faciəsinin 20 illiyi ilə əlaqədar alman dilində nəşr edilmiş kitabının təqdimat mərasimi keçirilib. Səbail rayon İcra Hakimiyyətindən Lent.az-a verilən məlumata görə, təqdimatdan öncə iştirakçılar və qonaqlar Xocalı faciəsinə həsr olunmuş foto stendlər və kitab sərgisi ilə tanış olub.

Təqdimat mərasimini giriş sözü ilə açıq elan edən Səbail rayon İcra Hakimiyyətinin başçısı Asif Əsgərov Azərbaycan xalqının qan yaddaşı olan Xocalı faciəsi, ermənilərin zaman-zaman xalqımıza qarşı törətdikləri vəhşiliklər və Xocalı soyqırımı ilə bağlı həqiqətlərin dünya ictimaiyyətinə çatdırılması üçün görülməsi vacib olan işlər barədə ətraflı məlumat verib.

Qeyd olunub ki, almaniyalı ictimai xadim, Maqdeburq şəhəri Bazar İqtisadiyyatı İnstitutunun rəhbəri Rolf Kunş Almaniyanın Zaxsen-Anhalt Əyalətində fəaliyyət göstərən Alman-Azərbaycan Mədəniyyət Cəmiyyəti ilə əməkdaşlıq edir, cəmiyyətin tədbirlərində iştirak edir və cəmiyyətin dəstəyi ilə ilk dəfə olaraq alman dilində Xocalı faciəsi ilə bağlı kitab nəşr edilib. Həmin kitabın müəllifi Rolf Kunş, Zaxsen-Anhalt Əyaləti Alman-Azərbaycan Mədəniyyət Cəmiyyətinin sədri Yaşar Niftəliyev və cəmiyyətin üzvü, peşəkar boks üzrə İBO İnterkontinental çempionu Azad Əzizov Bakıya dəvət olunub və təqdimat mərasimində iştirak edib.

Təqdimat mərasimində Yazıçılar İttifaqının katibi, xalq yazıçısı Çingiz Abdullayev, Milli Məclisin deputatları Hüseynbaba Mirələmov və İlham Əliyev çıxış edərək kitab barəsində öz təəssüratlarını bildirib, kitabın Xocalı soyqırımının dünya miqyasında tanınması, erməni vəhşiliklərinin dünya xalqlarına çatdırılması işində böyük əhəmiyyət kəsb etdiyi vurğulanmış, müəllifə öz minnətdarlıqlarını bildirib.

Sonda kitabın müəllifi Rolf Kunş çıxış edərək Xocalı faciəsi ilə yazılan kitabın ərsəyə gəlməsi, ona bu işdə yardımçı olanlar barədə məlumat verib.

Ədalət.-2012.-24 fevral.-S.8.