Xocalı harayı

(bir parça)

Babəkimin, Xətayimin

Ruhu bizdən uzaq düşüb

Qeyrətimiz çat veribdi,

Sümüklərə calaq duşub.

Qorqud dədə ha yalvarır,

Övladları yola gəlmir.

Burla Xatun, Banu Çiçək

Qalıb çəmənsiz, çiçəksiz.

Neyləsin Qaraca Çoban,

Təpəgözlər at oynadır.

Dəlidağda yanmır ocaq,

Xəzərə qəm-qüssə axır.

Haray çəkir Xudafərin,

Göyçə boynun burub baxır.

Səda düşüb Zəngəzura

Qarabağda şimşək çaxır.

Borçalının yolu bağlı,

Qala Dərbənd köksü dağlı.

Ət yetişmir Xocalıya,

Ağdamı vermişik suya

Xankəndi yadlara qalıb,

Yolları duman, çən alıb.

Bu həsrətdən

Qəmlənibdi türk dünyası.

Basılıbdı el qalası.

Korşalıbdı Koroğlunun

Qılıncı tay.

Ələsgərin sazı

sınıb.

Sultan bəydən yoxdu haray

Səsi gəlmir Pənahxanın,

Şimşək kimi çaxmır daha

Qoç Nəbinin aynalısı

əsir düşüb

Vaqifin də

gözəlləri

bizdən küsüb.

Dərdə bir bax

saraylardan

çadırlara

köçüb millət.

Əsrin, günün bu vaxtında

Yerdən, göydən

Küsüb millət.

Qaçqın olub, köçkün olub,

Yesir olub, küskün olub

el-obalar,

dığalara məskən olub.

Çənlibelim,

neçə qalam.

Öz işini yaxşı gördü Səhl Sumbat,

Ağlar qaldı Basarkeçər,

Dərələyəz.

Azıx oldu erməniyə

Ocaq yeri.

Qayalardan özün atdı,

Həcər, Nigar, Tomris, Pəri.

Bir gecədə

Xocalımız talan oldu,

Daha xatın yalan oldu.

Bir gecədə viran oldu,

Qarabağın öz Xocası,

Qarabağın gül xonçası.

O gecədən başladı bax,

Bu millətin qəmi, yası.

Əziz MUSA

Ədalət.-2012.-25 fevral.-S.20.