AYIBDIR

Xocalı, qanlı müsibət,

Bu nə dəhşət, bu ə vəhşət.

Başıbəlalı millətin

O ilki qışı necə sərt

İsdi od ocaqlarından

Səpələndilər çöllərə,

Qalın qarlı meşələrə.

Körpələr süngü başında

Qız -gəlinlər, əldən-ələ,

Erməniyə oldu kölə.

Üçüncü minillikdəyik,

Sivil insan şəklindəyik

Xocalı - yatmış bir vulkan

Biz də onun bətnindəyik.

Xocalı tarixi qara,

Bütün türk elinə yara

Durun gedək qisas alaq,

Bəsdir, baxdıq ora-bura!

Bu məsələdə nə vəkil.

Avropa ya NATO - çəkil!

El namusun qorumağa

Bizə icazəmi gərək

Vallah, ölüb yerə girək!

Hanı XXI əsrin

Babəkləri, Nəbiləri,

Koroğlunun dəliləri?

Haradadır Cavad xanlar,

Qeyrət qəsri ucaldanlar?

Yetişibdir artıq zaman,

Puskurəcək yatmış vulkan,

Qalxacaqdır Xocalıdan

Yaralanmış Azərbaycan!

Parçalanmış Azərbaycan!

Ayıbdır, vallah, ayıbdır

Əsrlərin arxasından

Bizə baxan əcdadlardan,

Namus çəkən babalardan,

Ağsaqqallardan ayıbdır.

Qazilərdən, şəhidlərdən,

Qız gəlinlərdən ayıbdır,

Ətəyi kəsik torpaqdan -

Azərbaycandan ayıbdır.

Səkinə SADIQ

Ədalət.-2012.-25 fevral.-S.20.