Cənublu sahibkar qadın

Bütün Avropanı cənginə almış qarlı-şaxtalı qış ölkəmizə də əməlli -başlı öz sərt üzünü göstərdi. Paytaxtımızla bərabər bölgələrimiz də qarın, soyuğun törətdiyi bir sıra çox ciddi çətinliklərlə üzləşdi. Məlum oldu ki, biz qışa elə də hazır deyilik...

Bu şaxtalar həm də bir daha onu sübut etdi ki, biz öz qanımızla, fiziki varlığımızla da şərqliyik. Soyuq havalarda isti geyimlərdə belə şəhərdəki evlər, kəndlərdəki komalar kimi üşüyürük. Sifətimizdəki cizgilər, hisslər şaxtalı qış günlərindən belə sərtdir.

Mən bütün bunları elə-belə demədim. Bax belə bir rüzgarda, hər tərəf ağ örpəyə büründüyü bir vaxtda, sifətindən zəhər yağan bir havada Göytəpəyə gedirəm. Cəlilabadın bu şəhəri rayon mərkəzindən elə də uzaq olmamasına baxmayaraq maşın tapmaq çətindir. Sükan arxasındakı sürücü yağlı müştəri gördüsə iş tamamlandı. Ancaq getmək lazımdır, çünki orada, Göytəpə şəhərinin özündə bir sahibkar jurnalisti gözləyir. Gecikmək, yalan çıxmaq olmaz, yoxsa qələm əhli haqqında fikirlər bir az da soyuqlaşar. Lap 2012-ci ilin ilk fevral günləri kimi.

Ümumi tanışlıq

Bir neçə kəndi, 14 min əhalisi olan Göytəpə şəhərində onunla- cəlilabadlı sahibkar xanımla- elə onun iş otağında görüşürük. Kiçik, səliqəli otaqda Ulu Öndərin çıxış və məruzələri çap olunmuş kitablarla bərabər dünya klassiklərinin də əsərləri kitab dolabında səliqə ilə sıralanıb. Ancaq müsahibimin özü, işi haqqında danışmağa həvəsi olmadığı ilk andaca hiss edilir. Buna baxmayaraq bu sahibkar qadın-Xuraman Əliyeva - haqqında bir sıra məlumat toplamışdım. Moskva Kooperativ İnstitutunun Bakı filalını bitirən bu qadın hazırda Azərbaycan Sahibkarlar Assosiasiyasının üzvüdür.

İlk əmək fəaliyyətinə ticarət sahəsindən başlayan Xuraman xanım xeyli müddət Cəlilabad rayon Göytəpə şəhər İstehlak Cəmiyyətində şöbələrdən birinə rəhbərlik edib. İş və həyat təcrübəsi az vaxtda ona çox şeylər öyrədib. İlk vaxtlar o işlədiyi Göytəpə ticarət obyektini icarəyə götürməklə nəyə qadir olduğunu sübut etməyə başlayır. Əməksevərliyi, ünsiyyəti, cəsarəti nəticəsində o tezliklə öz həmkarlarının rəğbətini qazanıb. Bütün göytəpəlilər məhs onun ticarət mərkəzindən ərzaq, təsərrüfat malları almağa üstünlük veriblər. Çünki, Xuraman xanım digərlərindən fərqli olaraq satılan ərzaq və təsərrüfat mallarında ilkin qiyməti o qədər də böyütməyib. Kim bilir, bəlkə də bu qadın ürəyinin yumşaqlığından irəlıi gəlib? Ancaq aldığı təhsil, iş təcrübəsi, sabahı duymaq qabiliyyəti də bu işdə ona kömək etməmiş olmaz.

Ticarət dövriyyəsinin qısa vaxtda xeyli böyüməsi Xuraman xanıma imkan verir ki, o fəaliyyət dairəsini bir qədər də böyütsün. Bir müddət sonra icarəyə götürdüyü ticarət müəssisəsini özəlləşdirməklə sahibkarlıq fəaliyyətinə başlayıb. Respublikanın İqtisadi sütunlarından olan özəlləşdirmə proqramına uyğun olaraq "Namiq -84" müstəqil müəssisəsini yaradıb.

Bu da bir qismətdir

Cəlilabadlılarla bərabər bütün cənubun tanıdığı və hörmət etdiyi Xuraman xanımı göytəpəlilər daha çox sevir, qiymətləndirirlər. Hələ bu qadınla tanış olmamışdan çox əvvəl mən bunu burda yaşayan sakinlərin fikrindən öyrənmişdim. Yəqin bu sevgi və ehtiramın məntiqi sonluğu kimi də bu sahibkar qadın onların etimadını bir daha qazanmaq üçün elə Göytəpədə şadlıq evi inşa etməyi planlaşdırır. Axı indi insanlar daha böyük və rahat yerlərdə toy-nişan mərasimləri qurmağa layiqdirlər. Burda da elə bir şərait yox...

Xeyli əziyyətin müqabilində Göytəpədə ilk şadlıq sarayı ərsəyə gəlir. İlk toy mərasimi də gənclərə hədiyyə olunur, onlar bu yaraşıqlı, geniş, hər cür şəraiti olan saraydan pulsuz istifadə edirlər.

Beləcə, bu böyük şadlıq sarayı Göytəpə şəhərinə, onun kəndlərinə nümunəvi xidmətlər başlayır. Ancaq bu gənclərə ev qurmaq üçün müxtəlif yataq dəstləri, qab-qacaq digər əşyalar da lazımdır axı. Bu missiyanı da həyata keçirən Xuraman Əliyeva gənc ailələrə mebel dəstlərinin satışını da təşkil edir. Özü də başqalarından xeyli ucuz. Göytəpəlilər danışırlar ki, yeni qurulan bu ailələr bəzən bu mebellərin pullarını özləri pul qazandıqdan sonra ödəyirlər. Nə olar, təki yeni qurulan ailələr, onların sevincləri çox olsun.

Və heç şübhəsiz ki, bu məqamda qadın qəlbinin böyüklüyü, sevinci təsirsiz qalmayıb. Axı Xuraman xanım da beləcə gəlin köçüb. İnsanlara, bir-birini sevərək ailə quranlara dayaq durmaq da hamıya nəsib olmur.Görünür bu da taleyin bir qismətidir.

Uğurlar asan qazanılmır

Dediyim kimi,danışmağa özü, işi haqqında fikir söyləməyə meyilli olmayan Xuraman xanım insanlarla ünsiyyəti bacarığı, cəsarəti, zəhməti hesabına yaradır. Buna görə də ətrafdakılar onu sevir, ona mərd, zəhmətkeş bir insan kimi rəğbət göstərirlər. Məhz onun bu zəhmətkeşliyi də ona bir çox uğurlar qazandırıb. Ancaq uğurlar da asan qazanılmır.

Hal-hazırda Cəlilabad şəhərində ticarət obyektinin tikintisinə başlayan X.Əliyeva ölkə Prezidentinin sahibkarlığa göstərdiyi qayğıdan daha çox bəhrələnməklə bərabər əvəzində ölkəsinə, insanlara daha çox mənfəət vermək qərarına gəlmişdir. Çünki bir sahibkar kimi onun təcrübəsi indi daha çoxdur.

Bir neçə il əvvəl ehtiyacı olanlara, xüsusən gənc ailələrə satışını təşkil etdiyi mebel haqqında ideyalarını da ona bəzi şeyləri öyrətmişdir. Ətrafdakı sahibkarlarla iş birliyini qurmaqda maraqlı olan sahibkar qadın nəhayət, qərara gəlir ki, elə mebel dəstlərini özü də hazırlaya bilər. Belə bir müəssisə yaratmaq xeyli vəsait, vaxt, axtarış tələb edirdi. Buna baxmayaraq Xuraman xanım "Namiq-84" müstəqil müəssisənin köməyi ilə işə başlayır. Bir çox mexaniki avadanlıqları, mebel ustaları tapmaq üçün müxtəlif ünvanlara dəfələrlə üz tutması son anda öz nəticəsini verir. Xammal qayğısını da həll edəndən sonra işə başlanılır.

Çox keçmir ki, Xuraman xanımın yüksək zövq və kefiyyətlə hazırladığı mebel dəstləri bütün regiona səs salır. Sahibkar Xuraman Əliyeva bununla həm də neçə-neçə insanlara iş yeri vermiş olur. Bu onun işsizliyin aradan qaldırılmasına bir töhfəsidir

Arzular sahilsiz,istəklər sonsuz...

Yaşadığı rayonun ictimai-siyasi, mədəni həyatında yaxından iştirak edən Xuraman Əliyeva həm də fəal sahibkar kimi Rumıniya, Almaniya, Türkiyə, Yunanıstan kimi ölkələrdə olmaqla onların qabaqcıl iş metodlarını öyrənməyə nail olmuşdur.

İmkansız adamlara, şəhid ailələrinə daim əl tutan Xuraman xanım Ramazan, Novruz, Qurban bayramlarında da soydaşlarını unutmur.

Onlara çox böyük həssaslıqla yanaşan bu qadın imkan daxilində problemlərinin həllində də böyük ürəklə iştirak edir. Bunların heç biri gəlişi gözəl sözlər deyil, həqiqətdir.

Həm də bunların heç birini dilinə gətirməyi sevməyən Xuraman xanım ürəyindən keçən istək və arzularının bir qismini axır ki, mənimlə bölüşdü. Görünür bunlar onun üçün çox əzizdir:

-Arzularsız ömür yoxdur ki! Ən böyük arzum Qarabağımızı düşmən tapdağından azad görməkdir. Həmin gün bax bu şadlıq evində Göytəpənin ən böyük şadyanalığını keçirəcəm. Ancaq görəcəyimiz bu qələbə də mənim neylədiyimi özüm bilirəm.Sən bilirsən axı, Göytəpə şəhərində neçə hərbi hissə var. İstəklərim də az deyil, çox istəyirəm ki, ölkə başçısının ərzaq təhlükəsizliyi ilə bağlı imzaladığı proqrama uyğun heyvandarılq sahəsində də müəyyən iş görüm. Gücümü işə salıb insanları ekoloji baxımdan daha kefiyyətli ət, süd məhsulları ilə təmin edək! İndi buna ehtiyac daha çoxdur. Bu həm də ölkəmizə gətirilən kefiyyətsiz məhsullara az da olsa sipər olar, həm də daxili istehsalı zənginləşdirər. Ümüd edirəm ki, Sahibkarlığın İnkişafına Dəstək Fondu bizə kredit də ayıracaq.

Mən ölkənin cənubunda yaşayıb fəaliyyət göstərən bir xanım sahibkar haqqında danışdım. Ancaq bilirəm ki, danışdığım danışmadıqlarımdan xeyli azdır. Nə olar, təki ortada iş olsun.

Səxavət Məmmədli

Ədalət.-2012.-28 fevral.-S.7.