Qarabağlı
Salyandakı
bu kənd rayonun ən
inkişaf etmiş ərazisidir
(əvvəli ötən
sayımızda)
Həll edilən ən böyük problem
Salyan rayonu İcra Hakimiyyəti
başçısının Qarabağlı inzibati vahidliyi
üzrə icra nümayəndəsi İlham Muradov nə qədər
gizlətsə də, tələsdiyi hiss edilirdi:
- Gedək bir qaz çəkənlərə
də baş çəkək. Əvvəlcə onu deyim ki,
yaxın vaxtlara kimi çox az sayda ailə ərazimizdəki
neft buruqlarından götürülən səmt qazından
istifadə edirdi. Aşağı təzyiqli bu səmt qazı
heç o ailələri də razı salmırdı.
"Regionların Sosial İqtisadi İnkişafı Dövlət
Proqramı" çərçivəsində indi bizim
Qarabağlı inzibati ərazisinə qaz xəttinin çəkilişi
yekunlaşmaq üzrədir. Bütün evlərə qaz xətti
çəkilib, artıq sayğaclaşma işlərinə
başlanmışdır. Bu ay Qarabağlının
özü, ilin axırına kimi qalan bütün kəndləri
mavi qazla təmin olunacaq. Hə, görə bilməyəcəyimiz
bəzi şeylər haqqında danışırdım
axı. Kəndlərimizin su mənbəyi Kürdür. Bu
çay vasitəsilə təsərrüfatı
yaşadırıq. Ərazimizdə hələlik 2 ədəd
"modul" tipli sudurulducu qurğu var.
Qarabağlıdakı qurğunun 26, Gomuşludakının 19
bulağından istifadə edilir. 2008-ci ildə inşa
edilmiş elektron ATS-dən hələlik 256 nəfər bəhrələnə
bilir. "ADSL" sistemi quraşdırılandan sonra internet
istifadəçilərimizin sayı 100-ü keçib. Ancaq
rabitə sistemində işlərimizi mütləq genişləndirmək
fikrimiz var. Hə, çatdıq deyəsən.
Qarabağlı kəndindəki
İmam Hüseyn Məscidinin qarşısında
inşaatçılar qaz borularının birləşdirilməsi
ilə məşğul idilər. İşləri çox
olduğundan həmsöhbət olmaq fikrində deyildilər.
Maşına oturub yolumuza davam edirik. Şəhidlər
Xiyabanını, "Partizan
Babaş"-ın- Babaş Rüstəm oğlu Dadaşovun barelyefini ziyarət etdikdən sonra ölkənin yaxşı
tanıdığı İbrahim
Musa oğlu Qurbanovun büstünə salam verib, məzarına tər çiçəklər
qoyuruq.
Salğarlı kişi
Qarabağlı haqqında
danışanda heç şübhəsiz ki, İbrahim Musa
oğlu Qurbanov barəsində ayrıca bəhs etmək
lazımdır. El-obanın, yurdun seçilən
ağsaqqalı, ölkənin iqtisadi və sosial həyatında
parlaq yeri olan İbrahim kişi çox şərəfli bir
ömür yaşamışdır. Şəxsiyyəti rəsmi
titul və təltiflərdən daha ağır olan bu
salğarlı kişi haqqında qəzet və jurnallarda kifayət
qədər material var. İşgüzar, sadə və səxavətli
bu insan haqqında "İzi qalan insan" kitabında da
İbrahim kişi ilə bağlı Azərbaycanın sayılıb-seçilən
elm, söz adamları ilə birgə ölkənin yüksək
rütbəli məmurları özü ürək sözlərini
demişlər. Bəxtiyar Vahabzadə, Budaq Budaqov, Ənvər
Seyidov, Zeynəb Xanlarova və digər tanınmış
ölkə ziyalılarının İbrahim kişi
haqqındakı fikirlərini tərifi sevməyən
böyük Məmməd Araz daha dəqiq ifadə etmişdir:
"Azərbaycan xalqı öz tarixi ərzində çox
böyük şəxsiyyətlər yetirib. Onların hər
birinin öz yeri, özünəməxsus xidmətləri var.
İbrahim Qurbanov da ötən əsrin ən parlaq
simalarından biri idi. O üç inkişaf etmiş Azərbaycan
şəhərinin abadlaşdırılmasında, yenidən
qurulmasında əvəzsiz rol oynayıb".
İstehsalatın ən müxtəlif
sahələrində çalışanda da, Neftçala,
Salyan, Cəlilabad rayonlarına rəhbərlik edəndə də
Ulu Öndər Heydər Əliyevin ən yaxın dostu, ən
yaxın silahdaşı İbrahim Musa oğlu Qurbanov heç
zaman haqqı nahaqqa verməyib. Dövləti, dövlətçiliyi
də ailəsi, balaları kimi sevib, qoruyub, əzizləyib.
Atasının ənənəsini
yaşatmağa çalışan, kəndinin,
el-obasının güvənc yeri olan, Vergilər Nazirliyinin 5
saylı Ərazi Vergilər İdarəsində rəis
müavini vəzifəsində işləyən Pənah
İbrahim oğlu Qurbanov bu böyük el ağsaqqalı
haqqında həmişə qürurla, fəxrlə
danışır:
- Atam olduğu üçün
demirəm, İbrahim Musa oğlu Qurbanov yorulmaz təsərrüfatçı,
sadiq dost, əsl el ağsaqqalı idi.
O kişi qurub-yaratmaqdan xüsusi
bir zövq alırdı. Çox qəribə idi ki, vəzifəsindən,
mövqeyindən asılı olmayaraq atam ona pənah
aparanların heç birinə fərq qoymurdu.
Hətta tanımadığı
adamlara belə kömək edirdi, əl tuturdu. İndi bilirəm
ki, əsl kişilərin, böyük insanların
özündən sonra qoyduqları mənəviyyat daha
uzunömürlü, daha gərəkli olur. Qaldı atamla
bağlı yazmalı olduğum xatirələrə,
düşünürəm ki, lazımdır. Ondan öyrənəcək
çox şey var, qoy oxuyub bilsinlər. Bacaranlar özlərinə
nümunə də götürsünlər...
Etiraf edək ki, belə
ömür hamıya qismət olmur. Görünür
Allahın və insanların sevdikləri həyat
kitabının başqa səhifələrindədir.
Azad sahibkarlıq iqtisadi inkişaf
deməkdir
Vaxt azalır, əslində
axşama hələ xeyli var. Ancaq birazdan aranın istisi
yandırıb yaxacaq. Mahir müəllimə də telefonda
taxılbiçən kombaynçılar rahatlıq vermir. Ən
müxtəlif xidmət və ticarət obyektləri, iaşə
müəssisələri olan Qarabağlı kəndi və
onun tabeliyində olan inzibati ərazidə bir sıra sosial
binalarla bərabər mədəniyyət evi, tibb məntəqəsi,
rabitə şöbəsi, kitabxana da fəaliyyət göstərir.
Kifayət qədər böyük və müasir tələblərə
cavab verən "Asif", "Samir" şadlıq
sarayları da burdakı sakinlərin istifadəsindədir.
Ancaq kəndin iqtisadi həyatına birbaşa təsir edən
"İlkin-N", "Samir" MMC-lər haqqında bir qədər
geniş danışmaq lazımdır. "İlkin-N"
MMC-nin ölkənin, eləcə də regionun iqtisadi-sosial həyatına
təsirindən bəhs etmişik. Onun nəzdindəki
"Halal" Aqroservis eyni mövqeyi həyata keçirir.
Burda olan texnika, maşın-mexanizmlər sakinlərin kənd
təsərrüfatı işlərində, ot biçinində,
yer şumlanmasında və digər işlərində
çox yaxından, bəzən də təmənnasız
iştirak edir. Geniş profilli "Samir" MMC təmir-tikinti
işləri ilə bərabər un məmulatının
müasir texnologiyası ilə də məşğul olur.
Müəssisənin bişirdiyi çörək və bulki
məmulatları Qarabağlı ilə bərabər ətraf
kəndlərə də çatdırılır. Cəmiyyətin
nəzdində yaradılan əkinçilik və maldarlıq
sahələrində də xeyli yerli sakin
çalışır. Miqyası ilbəil böyüyən
hər iki müəssisənin Qarabağlının iqtisadi həyatında
oynadığı rol danılmazdır.
Aranda, Kürün sahilində yerləşən
Qarabağlı kəndi Salyanda həm də yaxşı mənada
söz sahibi olan bir obadır.
Səxavət
Məmmədli
Azərbaycan
Respublikasının Prezidenti yanında kütləvi informasiya
vasitələrinin inkişafına dövlət dəstəyi
fondunun maliyyə yardımı ilə
Ədalət.-2012.-4
iyul.-S.3.