Qarabağlı

Salyandakı bu kənd rayonun ən inkişaf etmiş ərazisidir

Rayon mərkəzindən 28 kilometr məsafədə yerləşən Qarabağlı kəndinin maraqlı tarixi var. Tarixi mənbələrdə göstərilir ki, 1700-cü ildə Ağdam rayonunun Abdalgülablı kəndindən gəlmiş bir neçə ailə burada məskunlaşmışdır. Müxtəlif səbəblərdən Şamaxıda köç edən bir neçə ailə də təbii relyefinə görə çox əlverişli olan bu obada yerli sakinlərlə yaşamağa üstünlük vermişlər. Sonralar Qərbi Azərbaycandan köçürülmüş soydaşlarımız da Kürün sahilində, yol kənarında yerləşən bu kəndə pənah gətirmişlər. Beləcə Qarabağlı kəndi böyümüş, inkişaf etmiş və rayonun iqtisadi-sosial həyatında önəmli yer tutmuşdur.

Hazırda Qarabağlı ərazi inzibati vahidliyində 850 nəfər adam yaşayır. Mərkəzi Qarabağlı olan bu inzibati əraziyə Kolanı, Gomuşlu və Təzəkənd kəndləri də daxildir.

30,89 kvadrat kilometr ərazisi olan Qarabağlı kəndinin əsas məşğuliyyəti əkinçilik və maldarlıqdır.

Kənd sakinləri taxıl, kartof, üzüm, tərəvəz, bostan bitkilərindən bol məhsul əldə etmək üçün xeyli əziyyət çəkmişlər. İndi bu kənddə 2275 baş iribuynuzlu, 7100 baş xırdabuynuzlu mal-qara bəslənilir.

Rayonda, eləcə də bölgədə sayılıb-seçilən kəndlərdən olan Qarabağlıda zəhmətkeş, torpağa bağlı adamlar çoxdu. Ona görə də burda camaat daha yaxşı, daha firavan yaşayır.

İş üçün ən münasib vaxt səhər erkəndir

Ümumiyyətlə, günün birinci yarısında görülən işlər, həyata keçirilən tədbirlər daha effektli olur. Qızmar yay aylarında isə bu labüd bir amilə çevrilir.

Uzun müddət ingilis dilini tədris edən, sonralar böyük bir şirkətdə tərcüməçi kimi çalışan, hazırda Qarabağlı ərazi inzibati vahidliyində icra nümayəndəsi işləyən İlham Qaytaran oğlu Muradovla da sabah, səhər erkən yenidən görüşüb Qarabağlı kəndini gəzməyi qərara aldıq. Gəzmək, görmək zəngin təəssürat deməkdir.

İcra nümayəndəliyinin, bələdiyyənin, polis məntəqəsinin, kənd kitabxanasının, 60 saylı Salyan-Neftçala seçki idarəsinin yerləşdiyi müasir, səliqəli 1 mərtəbəli binada İlham müəllimlə nə qədər tez görüşsək də, qəbula gələnlər kifayət qədər idi. "Əkin-biçin adamlarıdır. Onları yola verim, gedək" deyə icra nümayəndəsi qəbul otağındakıları içəri dəvət etdi.

Az sonra biz artıq tozlu kənd yolları ilə uzaqdan görünən yaşıl stadiona yol almışdıq. "Nail" idman klubu tərəfindən stadionun kənarında inşa edilən otaqlarda yaxın vaxtlarda idmançılar üçün gözəl şərait yaranacaq. Kəndin dayağı olan, böyük xeyriyyəçi Hacı Qurban Abasovun rəhbərlik etdiyi "İlkin-N" MMC-nin Qarabağlıdakı filialında çalışan müxtəlif peşə adamlarının heç biri işdən ayrılmaq fikrində deyillər. Çoxşaxəli iş profili olan bu müəssisədə ailəsinə ruzi aparanların sayı yüzlərlədir. Əkinçilik və maldarlıq kimi köməkçi təsərrüfatı olan "İlkin-N" MMC öz işçiləri ilə bərabər kənd sakinlərinə, şəhid ailələrinə, imkansızlara da daim əl tutur.

- İndi Nəsimi Xəlilov adına məktəbə gedirik. Orada hər şeyi özün görəcəksən.

Ancaq nə qədər ki, yol gedirik görə bilməyəcəyimiz bəzi şeylər haqqında məlumat verim. Qarabağ uğrunda döyüşlərdə 20 şəhid vermişik, o ailələr daim diqqət mərkəzindədir. Həmin döyüşlərdə əlil olan 7 nəfəri də unutmuruq. Böyük Vətən Müharibəsi iştirakçılarından cəmi 4 nəfər qalıb. Kəndimizin ən yaşlı sakini Sona Hacıqulu qızı Əliyeva 1905-ci ildə doğulub. Camaatımız maşallah, zirək camaatdır. Mal-heyvan saxlayan kim, əkin-biçinlə məşğul olan kim. Sakinlərimizin bir çoxu da ərazimizdə yerləşən "Salyan Oyl" və yaxud Şirvan şəhərindəki "Şirvanneft"də, Dövlət Elektrik Stansiyasında, müxtəlif təşkilatlarda çalışırlar. Hə çatdıq, arxasını sonra danışarıq. Düşək, baxaq görək neyləyib bu qoçaqlar.Tikinti meydançasında bizi hörmətlə qarşıladılar.

"Elmsiz bir ölkənin gələcəyi yoxdur"

Qarabağlı inzibati vahidliyində 4 təhsil ocağı var. 1 və 2 saylı tam orta məktəb Qarabağlı kəndində yerləşir. Kolanı və Təzəkənd kəndlərində isə ümumi orta məktəb fəaliyyət göstərir.

Məktəb tikintisində iş icraçısı kimi çalışan Kamil Behbudov işlərin gedişindən razı görünürdü:

- 480 yerlik 1 saylı orta məktəbi sentyabra qədər tikib təhvil verəcəyik. Düzdür, iş çoxdur. Ancaq mənim uşaqlarım da qoçaqdırlar. Tikintidə 30 nəfər yerli sakin çalışır, onlar da od kimidir. Məktəbin ayrıca elektrik xətti, istilik sistemi olacaq. Açıq və örtülü idman zalları, kitabxana, akt zalı da şagird və müəllimlərə xidmət edəcək. 40 tonluq həyətdəki bu hovuzda isə daim su olacaq ki, yanğın zamanı istifadə edilsin. Sanuzellər oğlan və qızlara, müəllimlərə ayrıca xidmət edəcək. Bir sözlə, Qarabağlı kənd 1 saylı orta məktəb bu tərəflərdə ən gözəl təhsil ocağı olacaq. Elmsiz heç bir ölkənin gələcəyi yoxdur. Afrika cəngəlliklərində yaşayan qəbilələri kim tanıyır? İnşaat işləri üçün heç bir çətinliyimiz yoxdur, hər şey əlimizin altındadır. Söz də sözdür.

Nə deyirik, qolunuza qüvvət, təki siz deyən olsun!

(ardı gələn sayımızda)

Səxavət Məmmədli

Azərbaycan Respublikasının Prezidenti yanında kütləvi informasiya vasitələrinin inkişafına dövlət dəstəyi fondunun maliyyə yardımı ilə

Ədalət.-2012.-3 iyul.-S.3.