Şirvan
- bölgədə öz yeri
olan şəhər
İndi bu şəhərin -
paytaxtdan o qədər də uzaq olmayan Şirvanın
siması tamam dəyişib. Mərkəzi yolların, eləcə
də şəhərdaxili küçələrin yenidən
qurulması nəticəsində indi daha da gözəlləşən
Şirvan şəhəri regionda inkişaf etmiş
yaşayış məskənlərindən birinə
çevrilmişdir. Paytaxt istiqamətindən şəhərə
daxil olan hər bir müsafir bu rahat, enli, hər iki tərəfi
həmişəyaşıl ağaclarla əhatə
edilmiş yolla istər cənub-qərbə, istərsə də
Muğana, Milə üz tutarkən rastlaşdığı
gözəllikdən xüsusi zövq alır. Gecələri
bir ayrı görkəmdə olan bu mərkəzi küçə
müasir işıqlandırma sistemi ilə təchiz edildiyindən
daha füsunkar görünür.
Yaşıllıqları onsuz da
bol olan Şirvan şəhərində təkcə son 6 ayda
990 ədəd ağac, 5000 müxtəlif gül kolu, 400 kvadrat
metr çim qazon, 1000 kvadrat metr qazon toxumu əkilmişdir. Mərkəzi
və baş küçələrlə bərabər digər
küçələrin də fasiləsiz
işıqlandırılması üçün indi
bütün imkanlar var.
Artıq şəhərin şimal
girişində "Bayraq Meydanı"nın inşasına
başlanmışdır. 52 metr hündürlüyü olacaq
bayrağın şəhərə xüsusi bir əzəmət
verəcəyi şübhəsizdir. Nəzərdə tutulan
4000 kvadrat metr ərazidə tikinti-quraşdırma işlərinə
start verilmişdir. 180 kvadrat metr məsafəyə
qum-çınqıl döşənərək əsaslı
yol çəkilmişdir. Üç rəngli bayrağımızın
dalğalanacağı özülün betonlaşması
üçün 180 kub metr monalit dəmir-beton işləri
görülmüşdür.
Qonşu Hacıqabul, Salyan,
Sabirabad, Saatlı rayonlarının mədəni mərkəz
saydıqları Şirvan şəhərinin sosial və digər
xidmət sahələrində insanlara daha çox yardımçı
olduğunu söyləmək artıqdır. 1962-ci ildə
inşa edilmiş Kür çayı üzərindəki
körpünün əsaslı təmirdən sonra yenidən
istifadəyə verilməsi Şirvan şəhərini diqqət
mərkəzinə bir az da
yaxınlaşdırmışdır. Bir sıra iri neft
şirkətlərinin, İqtisad və Apellyasiya Məhkəmələrinin,
böyük sənaye müəssisələrinin burda fəaliyyət
göstərməsi də təsadüfi deyil.
Abadlıq
gözəllikdir
Çox böyük şəhərlər,
çox böyük qəsəbələr
baxımsızlıq üzündən öz simasını
asanlıqla itirə bilir. Çünki şəhərin ilk
gözəlliyi onun abad olmasıdır, küçələrinin
təmiz, yaşıllığının bol olmasıdır.
Çox da böyük olmayan
Şirvan şəhərində son illər xüsusilə
diqqətdə olan abadlıq-quruculuq işləri hər
gün davam etdirilir. Vurulan hər naxış, hörülən
hər daş şəhərin ümumi gözəlliyini
artırmaqla bərabər həm də bu ənənəni
layiqincə yaşatmağa xidmət edir.
Bu ilin birinci yarısında
M.Füzuli, H.Z.Tağıyev küçələrinə
15340 kvadrat metr, Hacı Qəhrəmanlı qəsəbəsinin
giriş yoluna 13740 kvadrat metr asfalt-beton örtüyü
döşənmişdir.
Şəhərin ümumi görkəminə,
gözəlliyinə xələl gətirən 14 binanın
2500 kvadrat metr dam örtüyü sökülmüş, əvəzində
isə şüşə rüberoid materialı
salınmışdır. Burdakı 9 mərtəbəli
binaların giriş hissələri təmir edilməklə bərabər
liftlərindəki bir sıra texniki nasazlıqlar aradan
qaldırılmış, yeni elektrik mühərrikləri,
transformatorlar quraşdırılmışdır.
Şirvan şəhərinin mərkəzi
hissəsində yerləşən Energetik küçəsindəki
9 saylı, 20 Yanvar küçəsindəki 12-a saylı
binaların fasadlarında əsaslı təmir işlərinin
sürəti, keyfiyyəti bir az da
artırılmışdır. Bu iki binada 390 kvadrat metr
fasadın divar səthinə "poliuretan" üzlük
vurulmuşdur. Burda yerləşən ictimai-iaşə obyektlərinin
qarşısında yenidənqurma işləri də eyni
sürət, eyni keyfiyyətlə davam etdirilir.
Şəhərin ən görkəmli
ərazilərindən Heydər Əliyev meydanında əsaslı
təmir işlərinin qızğın
çağıdır. 1 May küçəsindəki
abadlıq işlərinə həyətyanı divarların
müasir görkəmə salınması da əlavə
edilmişdir. Burda rənglənmiş divarların ümumi ərazisi
3200 kvadrat metrə bərabərdir.
Muğana uzanan mərkəzi yolun
"Sabirabad dairəsi" adlanan ərazisində isə 120
kvadrat metr istinad divarları dekorativ formalı daşlarla
üzlənmiş, yeni görkəmə
salınmışdır.
Şirvanın abadlıq-quruculuq
işlərində daim fəal iştirak edən şəhər
bələdiyyəsinin, Təhsil şöbəsinin, Sosial
Müdafiə Mərkəzinin və Fondunun yerləşdiyi
inzibati binaların qarşısına döşənmiş
daş üzlüklər mərkəzə ayrı bir gözəllik
verir.
Nümunəvi məhəllələr əsl istirahət
yeridir
Xatırlayıram ki, Şirvan
şəhərində yaxın vaxtlara qədər məhəllələrdə,
yaşayış binalarının həyətlərində
miqyası böyük olan tör-töküntü, səliqəsizlik
vardı. Zibilliklərdə bir-birinə sığınan
xırda tikililərdə antisanitariya hökm
sürürdü. Çox işlərdə avanqard olan Mərdan
Talıb oğlu Camalov şəhərin icra
başçısı kimi fəaliyyətə başlayandan
sonra məhəllələrə xüsusi fikir verdi.
İndi Şirvan şəhərində
sakinlərin əsil istirahət yerlərinə çevrilən,
şəhərə ayrı bir gözəllik verən
nümunəvi məhəllələr kifayət qədərdir.
Bu ənənənin təməli xeyli əvvəl qoyulsa da,
bu yöndə aparılan işlər hər gün bir az da
sürətlənir.
Şəhərin Xəqani
küçəsindəki 10, 22, 31, 20 Yanvar küçəsindəki
1 və 5 saylı binaların qarşısında nümunəvi
məhəllələrdə yerli sakinlərlə bərabər
şəhərin qonaqları da lazımınca istirahət edə
bilirlər. Burdakı xeyir-şər məclisləri
üçün nəzərdə tutulan tikililər də
daim diqqət mərkəzindədir.
Qeyrət Kazımlı da öz
şəhərini sevən, qoruyan ziyalılardan biridir. İstirahət
vaxtlarında yeni salınmış belə məhəllələrdə
dincəlməyə üstünlük verən Qeyrət
müəllimin dediklərindən:
- Hər birimiz öz şəhərimizi,
yaşadığımız məhəlləni sevib
qayğısına qalmalıyıq. Bu şərait, bu gözəllik
bizim üçündür. Bizim də borcumuz bunları
qorumaq, imkan daxilində bir az da genişləndirməkdir. Bax,
bu yaşıllıqlar, rahat oturacaqlar, üstü
örtülü tikililər, körpələrimizin əylənməsinə
hesablanmış qurğular elə-belə yaranmayıb
axı. Bütün bunları qurub-yaradanlara sakinlər
adından təşəkkür edirəm. Çünki belə
şəraiti olan nümunəvi məhəllələr
istirahət yeri olmaqla bərabər həm də bir gözəllikdir.
Gözəllikdən zövq almağı bacarmaq
lazımdır...
Qeyrət müəllimin dediklərində
böyük həqiqət var. Yaşadığı şəhərdən,
keçirdiyi ömürdən zövq almaq hamıya eyni dərəcədə
nəsib olmur.
(ardı gələn sayımızda)
Səxavət
Məmmədli
Azərbaycan
Respublikasının Prezidenti yanında kütləvi informasiya
vasitələrinin inkişafına dövlət dəstəyi
fondunun maliyyə yardımı ilə
Ədalət.-2012.-27
iyul.-S.3.