ŞƏFA TAPMAQ İSTƏYİRSİNİZSƏ...

... İnsanın sağlamlığından böyük və qiymətli nəsə yoxdur. Sağlamlıq elə bir qiymətli şeydir ki, onu heç nə ilə əvəzləmək mümkün deyil. Sadəcə olaraq biz çox vaxt can sağlığımızın qayğısına qalmır və necə gəldi həyat tərzi yaşayırıq. Sonradan da hiss eləyirik ki, pis vərdişlərə alışmışıq və sağlamlığımıza böyük ziyan vurmuşuq. Bu gün ölkəmizin hər yerində olduğu kimi, Füzuli rayonunda da səhiyyənin inkişafı yüksələn xətlə gedir və bir-birindən gözəl, müasir tələblərə cavab verən şəfa ocaqları - xəstəxanalar, müalicə korpusları istifadəyə verilir.

AĞ XALATLI HƏKİMLƏR

Füzulinin işğaldan azad olunmuş 22 yaşayış məntəqəsində və 1 şəhərində bu gün 13 xəstəxana fəaliyyət göstərir. Bundan savayı, 17 həkim ambulatoriyaları, 48 feldşer-mama məntəqəsi hər gün insanlara lazımi köməkliyi eləyir. Təbii ki, bu tibb məntəqələrinin davamlı olaraq, fəaliyyət göstərməsi elə də asanlıqla başa gəlməyib. Ən azından ona görə ki, bu gün Füzulidə səhiyyənin inkişafına xüsusi bir önəm verilir. Bir faktı da qeyd edək ki, ölkə prezidenti cənab İlham Əliyev Füzulidə olarkən əhali ilə görüşündə bildirib ki, o, Füzuli rayonuna həmişə kömək edəcək və qayğı göstərəcəkdir. Cənab prezident sözünü əməli işi ilə doğruldub və Füzulidə bir çox tibb mərkəzlərinin və xəstəxanalarının tikintisinə yardımçı olub. İndi həmin xəstəxanalar əhaliyə xidmət eləyir. Bu xəstəxanalarda nə az, nə çox düz 188 həkim, 557 orta tibb işçisi çalışır.

FÜZULİ TİBB MƏRKƏZİ

Bayaq dediyimiz kimi, Füzulidə səhiyyənin inkişafı daim diqqət mərkəzində saxlanılır. Birincisi, ona görə ki, Füzuli cəbhə bölgəsidir və ermənilərin bir addımlığında yerləşir. İkincisi də burda tibbi xidməti ona görə inkişaf etdirirlər ki, sərhəd bölgəsində hər hansı insan xəstələnərkən xərc çəkib Bakıya müayinəyə və müalicəyə getməsin. Füzuli Mərkəzi Rayon Xəstəxanasının baş həkimi Soltan Əliyev uzun illərdi ki, səhiyyə sistemində çalışır. Bu illər ərzində onun tibb sahəsində topladığı zəngin təcrübəsi bir çox insanları yenidən həyata qaytarıb. Elə bu bacarığına görə də bir ilə yaxındır ki, Soltan Əliyev Füzuli Mərkəzi Rayon Xəstəxanasına baş həkim təyin edilib. Vəzifəyə gələn gündən də özünü əməli işi ilə təsdiq edib. Təsdiq edib ki, o, vəzifəyə heç də təsadüfən təyin olunmayıb. Soltan Əliyev bildirir ki, son vaxtlar Füzuli rayonunda bir neçə səhiyyə ocaqları istifadəyə verilib. Onlardan ən önəmlisi isə Füzuli Tibb Mərkəzidir. Füzuli Tibb Mərkəzi dünya standartlarına cavab verən ən müasir texnika və avadanlıqlarla təchiz edilib. Üstəlik də mərkəzdə daha peşəkar və daha savadlı həkimlər işə götürülüb. Soltan həkim onu da bildirdi ki, Azərbaycanın dövlət müstəqilliyinin bərpasının 20-ci ildönümü ərəfəsində Heydər Əliyev Fondunun təşəbbüsü, Azərbaycan Respublikası Dövlət Neft Şirkətinin dəstəyi ilə Mərkəzi Neftçilər Xəstəxanasının yüksək ixtisaslı həkimlərindən ibarət kardiocərrahiyyə tibb briqadası cəbhə bölgəsində yerləşən rayonumuzda açıq ürək əməliyyatı kampaniyası keçirib. Prezident cənab İlham Əliyevin göstərişinə əsasən rayonun Böyük Bəhmənli kəndində inşa olunmuş tibb mərkəzində bu mürəkkəb tibb əməliyyatları uğurla aparılıb. Kardiocərrahiyyə briqadasının rəhbəri Rəşad Mahmudov bu əməliyyatlardan çox razı qalıb. Bir sözlə, bu gün Füzuli Tibb Mərkəzində ən mürəkkəb tibb əməliyyatları aparmaq üçün hər cür şərait var.

GƏNCLƏR İRƏLİ ÇƏKİLİR...

Füzuli Mərkəzi Rayon Xəstəxanasının baş həkimi Soltan Əliyev bizimlə söhbətində bir fikri də xüsusilə vurğuladı ki, son illər yaş senzi ilə əlaqədar olaraq bir çox həkimlərimiz təqaüdə göndəriliblər. Təbii ki, təqaüdə göndərilən onlarla həkimin Füzuli rayon səhiyyəsində çox böyük xidmətləri olub. O həkimlər ağır vəziyyətdə və ölümün pəncəsində olan neçə-neçə insanı xilas edərək həyata qaytarıblar. Elə buna görə də onların el-oba arasında böyük hörməti var. Yeni kadrların vəzifəyə təyin olunması elə də asan deyil. Çünki birinci növbədə gərək vəzifəyə təyin olunan həkimin savadı və təcrübəsi olsun. Bu prinsipdən də çıxış edərək biz yeni gənc kadrları vəzifələrə təyin etmişik. Onların arasında baş həkim də var, baş həkimin müavinləri də. Məsələn, Horadiz şəhər xəstəxanasına gənc bir həkim - Şaiq Şükürov baş həkim təyin edilib. Onların fəaliyyəti göstərir ki, bu işdə nə biz, nə də səhiyyə nazirliyi səhv etməyib. Ona görə ki, seçib təyin etdiyimiz gənc kadrlar göstərilən etimadı zaman-zaman doğruldurlar. Bu da onu deməyə əsas verir ki, Füzuli səhiyyəsi yaşlı nəsildən sonra gənc nəslin etibarlı əllərindədir. Hər şey dəqiq və yerində olanda, bax onda atılan addımlar da düzgün olur.

ŞƏKƏRLİ XƏSTƏLƏR DİQQƏT MƏRKƏZİNDƏ

Hər yerdə olduğu kimi, Füzuli rayonunda da uçotda dayanan xəstələr var. Xüsusən şəkərli xəstələr bu mənada daha çox diqqəti cəlb eləyir. Əlbəttə, bütün xəstələrə və səhhətində problem yaranan insanlara səhiyyə xidməti göstərilməlidir. Amma şəkərli xəstələrə bu diqqət ikiqat və daha çox olmalıdır. Baş həkim Soltan Əliyev bildirir ki, əvvəllər bu sahədə müəyyən nöqsanlar mövcud olsa da, artıq həmin qüsurlar zaman-zaman aradan qaldırılıb. Şəkərli xəstələrin dərman təhcizatına və digər problemlərinə böyük diqqət yetirilir. Xəstəxanaların baş həkimlərinə bir daha tapşırıq verilib ki, bu sahədə heç bir problem yaranmasın. Eyni zamanda şəkərli xəstələrlə bağlı narazılıqlar elə yerindəcə həll edilsin. Şəkərli xəstələrə hörmətli nazirimiz Oqtay Şirəliyev də qayğı göstərməyi bizim qarşımıza əsas vəzifə kimi qoyub. Cənab nazir bizimlə olan söhbətində bildirib ki, davamlı olaraq, şəkərli xəstələr pulsuz dərmanlarla təmin edilməlidir. Məhz biz də rayon ərazisində bu tapşırığı yerinə yetirmək üçün baş həkimlərə lazımi göstərişlər vermişik. Hansı həkimdən narazılıq edilirsə həmin məsələlər operativ surətdə həllini tapır və şəkərli xəstə lazımi dərmanla təchiz edilir.

XƏSTƏXANALARDA ŞƏRAİT YAXŞILAŞIB

Təkcə Füzulinin Horadiz şəhərində deyil, eyni zamanda Qayıdış, Zobucuq və yeni salınmış digər yaşayış məntəqələrində də səhiyyə xidməti günbəgün yüksəlir. Zobucuq qəsəbəsindəki Füzuli Mərkəzi Rayon Xəstəxanası hər cür texnika və avadanlıqla təchiz edilib. Burda müxtəlif xəstəliklərin tam müalicəsi mümkündür. Çünki xəstəxanada çox bacarıqlı və təcrübəli həkimlər işləyirlər. Cərrahdan tutmuş, terapefte qədər hər cür ixtisaslı həkim var. Reanimasiya otağı isə hər cür avadanlıqla təmin edilib. Mürəkkəb əməliyyatlar aparılan zaman xəstələr həmin reanimasiya otağında yerləşdirilir və onlara operativ xidmətlər göstərilir. Təbii ki, müasir texnika və avadanlıqla yanaşı, xəstənin sağalmasında həkimin savadı və təcrübəsi böyük rol oynayır. Çünki həkim savadsız olsa, ən müasir avadanlıqla belə xəstənin həyatını xilas etmək mümkün olmur.

Nə yaxşı ki, Füzulidə müasir standartlara cavab verən xəstəxanalarda savadlı, təcrübəli və bacarıqlı tibb işçiləri çalışırlar. Baş həkim bizimlə söhbətində onu da dedi ki, rayon səhiyyəsinin inkişafına icra hakimiyyətinin başçısı Alı Alıyev yaxından köməklik göstərir. Onun köməkliyi və yardımı ilə biz müəyyən inkişafa nail olmuşuq.

... Xəstəni həyata qaytaran yuxarıda Allah, yerdə isə həkimlərdir. Hər bir xəstə xəstəxanaya gedərkən Allahdan kömək istəyir və həkimdən yardım umur. Bu yardım insana çatanda onun həyatı ölümün pəncəsindən xilas edilir. Füzulinin də tibb işçiləri, ağ xalatlı həkimləri bax beləcə neçə-neçə ağır xəstəni həyata qaytarıb və onların alqışını qazanıblar...

Faiq QİSMƏTOĞLU

Azərbaycan Respublikasının Prezidenti yanında kütləvi informasiya vasitələrinin inkişafına dövlət dəstəyi fondunun maliyyə yardımı ilə

Ədalət.-2012.-7 iyul.-S.14.