ÜMUMTƏHSİL SİSTEMİNDƏ MÜASİRLƏŞMƏ DÖVRÜ

(mövzu əsasında VIII yazı)

Güclü iqtisadiyyatın qurulmasında müasirləşən təhsilin rolu böyükdür

Bütün dövrlərdə cəmiyyətin tərəqqisi bilavasitə təhsilin inkişafından və onun əhəmiyyətinin düzgün qiymətləndirilməsindən asılı olmuşdur. Cəmiyyətin tələbatı təhsilin inkişafını sürətləndirmiş, elmi və texnoloji nailiyyətlər isə təhsil sistemi qarşısında həlli vacib olan daha mürəkkəb vəzifələr qoymuşdur.

Qloballaşmanın geniş vüsət aldığı hazırki mərhələdə, informasiya cəmiyyətində sosial-iqtisadi fəaliyyət sahələrindəki rəqabətin gücləndiyi, habelə təbii resursların tədricən tükəndiyi bir vaxtda təhsilin rolu artmaqdadır. Birləşmiş Millətlər Təşkilatı XXI əsri "Təhsil əsri" elan etmişdir. Yüksək intellektə malik insan kapitalının formalaşmasında, davamlı inkişafa zəmin yaradan güclü iqtisadiyyatın qurulmasında təhsilin rolu mühüm əhəmiyyət kəsb edir. Təbii, burada təhsilin bütün mərhələlərinin ümumi məzmunu nəzərdə tutulur.

"Təhsil əsri" və İKT

Ümumtəhsil sisteminin müasirləşməsindən söz açarkən xüsusi qeyd etmək lazımdır ki, biliklərə əsaslanan iqtisadiyyatın təşəkkül tapdığı şəraitdə İnformasiya və Kommunikasiya Texnologiyalarının (İKT) inkişafı ölkənin intellektual və elmi potensialının vacib göstəricilərindən biridir. Danılmaz faktdır ki, bu gün qloballaşan dünyada ölkələrin rəqabət qabiliyyəti, ilk növbədə onların İKT-dən səmərəli istifadəsi ilə formalaşır.

Müstəqilliyin şərəfli yolları ilə gələcəyə doğru inamla irəliləyən ölkəmizdə son illər ərzində aparılan davamlı islahatlar siyasəti dövlətimizin əhəmiyyətli dərəcədə güclənməsinə imkan vermiş, dinamik sosial-inkişafı və xalqımızın rifah halının yaxşılaşdırılmasını təmin etmişdir. Azərbaycan Respublikasının Prezidenti İlham Əliyevin imzaladığı "Azərbaycan gəncliyi 2011-2015-ci illərdə Dövlət Proqramı"nın təsdiq edilməsi haqqındakı sərəncamı ölkədə gənclərə, onarın savadlı, vətənpərvər, "Təhsil əsri"nə layiq olmalarına göstərilən qayğının, dəstəyin bariz nümunəsidir.

Təhsilə dövlət qayğısının yeni mərhələsi

Bu gün dövlət qayğısı ilə əhatə olunmuş Azərbaycan təhsilinin uğurlarının gündən-günə artmasının, inkişaf etməsinin və dünya təhsilinə inteqrasiyasının təməlində Ulu Öndər Heydər Əliyev tərəfindən müəyyən edilmiş siyasi kurs və bu kursun Prezident İlham Əliyev tərəfindən uğurla davam etdirilməsi durur. Cənab Prezidentin dəfələrlə səsləndirdiyi "Təhsil Azərbaycanın davamlı inkişaf strategiyasının ən öncül istiqamətlərindən biridir" fikri təhsilin dövlət siyasətinin mərkəzi subyekti olduğunu sübut edir. Respublikamızda geniş vüsət almış yeni məktəblərin, digər uşaq tərbiyə müəssisələrinin tikintisi, onların əsaslı təmiri və müasirləşdirilməsi, müasir avadanlıqlarla, informasiya-kommunikasiya texnologiyaları ilə təchizi, yeni dərsliklərin - tədris vəsaitlərinin çap edilərək pulsuz şagirdlərə çatdırılması, yeni təlim texnologiyalarının tətbiqi, pedaqoji kadr hazırlığı və s. bu kimi tədbirlər milli təhsilimizin möhkəm təməllər, elmi proqramlar əsasında qurulduğundan və düzgün inkişaf etdirildiyindən xəbər verir. Respublikamızda mövcud potensialı müasir və innoativ təhsil sisteminin təkmilləşdirilməsi üçün geniş imkanlar açmaqla onun iqtisadi inkişafının mühüm amilinə çevrilməsini təmin etməlidir fikrini əsas götürən ölkə rəhbəri 2011-2012-ci illərdə Azərbaycan təhsilinin inkişafı üzrə milli strategiyanın hazırlanması haqqında da sərəncam imzalanmış, bu sahədə böyük işlərin startı verilmişdir.

Təhsil sahəsində Kürdəmirdə çox işlər görülür

Son illər Kürdəmir rayonunda da təhsilə, onun inkişafına və müasirləşməsinə xüsusi diqqət və qayğı göstərilir. Burada yeni məktəblər tikilir, məktəblərin maddi-texniki bazasının möhkəmləndirilməsi üçün əlavə tədbirlər görülür. Qazanılan uğurlu nəticələr pedaqoji kollektivləri daha yüksək göstəricilərə ruhlandırır. Hansı vəzifədə çalışmasından asılı olmayaraq həmişə qurub-yaratmaq və uğurlar qazanmağı qarşıya məqsəd qoyan, bütün bilik və təcrübəsini vətənin yüksəlişinə sərf edən hörmətli İrşad Əliyevin bu rayona rəhbər təyin edilməsi təhsil işçilərini də sevindirmişdir. Çünki onlar İrşad müəllimin yüksək idarəçilik bacarığına və şəxsi nüfuzuna bələddirlər.

Keyfiyyət uğurların göstəricisidir

Kürdəmir rayon təhsil şöbəsinin müdiri Tacəddin Novruzovla söhbətimiz zamanı öyrənirik ki, kollektiv 2011-2012-ci tədris ilini uğurla başa vuraraq yeni dərs ilinə hazırlıq işlərinə başlayıb. Təbii ki, təhsil sistemində və onun həyata keçirilməsində ən mühüm göstərici təhsilin keyfiyyətidir. Bütün dövrlərdə, eləcə də təhsil islahatının və yeni təhsil qanununun həyata keçirildiyi indiki dövrdə yüksək təhsil keyfiyyətinə malik olmaq, milli-mənəvi və əxlaqi dəyərləri özündə əks etdirən təhsil siyasətini həyata keçirmək əsas vəzifələrdən biri olmuşdur.

Məktəblərdə aparılan təlim-tərbiyə işlərinin keyfiyyətini yüksəltmək sahəsində əldə edilən uğurların nəticəsidir ki, ötən dərs ilində rayon məktəbliləri respublikada keçirilən müxtəlif nominasiyalar üzrə müsabiqələrdə, bilik yarışlarında və fənn olimpiadalarında yaxından iştirak etmişlər.

(ardı gələn sayımızda)

Məzahir ƏHMƏDOĞLU

Azərbaycan Respublikasının Prezidenti yanında kütləvi informasiya vasitələrinin inkişafına dövlət dəstəyi fondunun maliyyə yardımı ilə

Ədalət.-2012.-10 iyul.-S.3.