Masallı yeni uğurlar astanasında

(əvvəli ötən sayımızda)

Kəndlərdəki müasirləşən sağlamlıq ocaqları

Bir neçə gün davam edən yağışlardan sonra günəşli günlərin başlaması yayın istisini bir az da artırıb. Əbülfəz Nuriyev son vaxtlar Masallıda daha böyük vüsət almış abadlıq-quruculuq, tikinti işlərindən həvəslə danışır. Sonra nəyisə xatırlayıb əlavə edir:

- Masallı səhiyyəsindən də az-çox xəbərin var. Xəstəxanamıza, həkimlərimizə də bələdsən. Sən gəlmədiyin vaxtlarda 2 kəndimizdə həkim məntəqələrinin açılışı olub. Kolatan kəndində bələdiyyə binasında yerləşən həkim məntəqəsini yenisi ilə əvəz elədik. Daha doğrusu, həmin binanı əsaslı təmir edib həkimlərin ixtiyarına verdik, bələdiyyəni başqa binaya köçürdük. İndi bu kəndlə bərabər Bala Kolatan, Bağıroba kəndləri də bu məntəqədən lazımınca istifadə edəcəklər. Hişkədərə kəndində isə yeni həkim məntəqəsi inşa elədik. Müasir və hər cür şəraiti olan binadır. Bu kənd sakinləri ilə bərabər qonşu Mişgəmi kəndinin sakinləri də burdan yararlanacaqlar. Hər iki tibb məntəqəsinin açılışında icra başçımız Rafiq müəllim özü iştirak edib, sakinlərə gözaydınlığı verib. Rayonumuzun bütün tədbirlərində iştirak edən deputatımız Elmira Axundova kənd sakinlərinin sevincinə qoşulub, ağ xalatlıların isə sevinci yerə-göyə sığmırdı. Zamanın tələbi başqa cürdür, biz onunla mütləq ayaqlaşmalıyıq. Ən ucqar kəndlərimizdə müasir tələblərə cavab verən tibb məntəqələrimiz olmalıdır.

Ayrılanda Əbülfəz Nuriyev yenə zarafatından qalmadı: "Vaxt tap, bir-iki gün "İsti-su"-da dincəl, xeyrini görərsən. Son vaxtlar özünə baxmırsan" - dedi.

Şəhərin su və kanalizasiya problemi olmayacaq

Masallı şəhərində hər gün genişlənən abadlıq-quruculuq işləri ilə bərabər daha bir layihə həyata keçirilir. "Regionların 2009-2013-cü illərdə sosial-iqtisadi inkişafı" Dövlət Proqramı çərçivəsində Masallı şəhərinin içməli su və kanalizasiya sistemi yenidən qurulur. Təməlqoyma mərasimində ölkə prezidenti cənab İlham Əliyevin iştirak etdiyi bu proses 6 ay müddətinə başa çatdırılmalıdır. Dünya Bankının krediti hesabına "Milli Su Təchizatı və Kanalizasiya Xidmətləri üzrə İkinci Layihə" daxilində başlanan bu işin nəticəsində 89 min insanın içməli su tələbatı ödəniləcək. 37 min evin çirkab suları ümumi anbarlara axıdılacaq.

İndi işlərin qızğın çağıdır. Masallının H.Aslanov, Füzuli küçələrində və digər ərazilərində müxtəlif maşınlar qazıntı işləri aparır, müxtəlif ölçülü polietilen boruların basdırılması üçün kanallar açılır. Xeyli zəhmət və dəqiqlik tələb edən bu məsləhətli işi Türkiyənin "ESEER-Holdinq" firması həyata keçirir.

Viləş çayının Qəriblər kəndi ərazisindəki sutəmizləyici qurğudan 5 min kub metrlik anbarlara vurulacaq su 630 millimetrlik polietilen borularla rayonun girişinə gətiriləcək. Bu ana xətdən müxtəlif diametrli borularla şəhərin bütün evlərinə su veriləcək. Müxtəlif ölçülü boruların ümumi əhatəsi 150 kilometrdir. Texnoloji proseslərdən keçən su heç bir xəstəlik yaratmasın deyə son anda ozon qazı ilə təmizlənəcək.

Şəhərin çirkab suları kimyəvi yollarla təmizləndikdən sonra Viləş çayı vasitəsilə dənizə axıdılacaq. Bu işlər 140 kilometr uzunluğu olan polietilen borularla həyata keçiriləcək. 250 nəfərin çalışdığı bu layihənin vaxtında başa çatdırılmasında heç bir problem yoxdur.

Hər görüş uğurlu bir işin başlanğıcıdır

Ömrün müdriklik anlarını yaşayan Masallı rayon Ağsaqqallar Şurasının sədri Cavanşir Əsədovla axşamçağı görüşdük. Sakit bir guşədə pürrəngi çay içə-içə xeyli söhbətləşdik. Axıra yaxın əlavə elədi:

- Bilirəm, yenə yazacaqsan, özgə nə işin var ki? Düz-dünyanı bürüyən işlərimizi görürsən. Ancaq son vaxtlar bunlar lap çoxalıb. Qoy olsun, tikdiklərimiz qalacaq da, oğul. Təzə başçımız Rafil Hüseynov Masallıya gələndən bəlkə də kabinetində ürək dolusu oturmayıb. Əslində elə bu yaxşıdır. "Böyük dayaq" filmini görmüsən yəqin, rəhbərin dayağı el-oba, camaat olmalıdır. Ona görə Rafil müəllim düz eləyir, camaatın qayğısını, dərdini onun öz kəndində eşidir, orda da müvafiq qərar çıxardır. Kalinovka kəndində camaatla 6 saata yaxın bir yerdə oldu, onlarla açıq, səmimi söhbət apardı. Boradigah qəsəbəsindəki görüşə gələnlərin sayı-hesabı yox idi. Çayçılığın inkişaf etdirilməsi üçün nələr danışmadı? Ən uca kəndlərimizdən olan Həsənli kəndinə getmişdi. Rayonda illərlə işləyənlər o kəndin heç yolunu bilmədilər. Yoldan-rizdən, qazdan danışdı, insanları dinlədi. Xıl kəndində su çəkilişinə, asfalt yol salınacağına söz verdi. Sığdaş kəndindəki görüşdə də Rafil müəllim yenə çayçılığın inkişafından, sitrus bitkilərinin yetişdirilməsinin vacib olduğundan bəhs etdi. Mənim yadımda qalan bunlardır. Onun dindarlarla, dini icma rəhbərləri ilə görüşü isə ayrıca yadımda qalıb. Dinə böyük hörmətlə yanaşan başçı erkən nikahlara qarşı dindarların da mübarizəyə qalxmalarını xahiş və tövsiyyə etmişdir. O həmin görüşdə çox düzgün və kəskin bildirdi ki, qanuni dövlət nikahı olmayanlara kəbin kəsmək olmaz. Belə səmimi görüşlər bilirsən nə qədər vacib və əhəmiyyətlidir? Ən yaxşısı odur ki, başçı kənddəki yerli rəhbərlərə elə ordaca müəyyən tapşırıqlar verir. Bax belə səmimi ünsiyyətdən sonra qayğılar, problemlər həll edilir, yeni iş-güc haqqında düşünülür. Hə, deyəsən yordum səni. Əslində Cavanşir kişi özü yorulmuşdu. Ancaq o elə bu söhbəti ilə Masallıda daha böyük uğurların olacağından bəhs etmişdir.

Səxavət Məmmədli

Azərbaycan Respublikasının Prezidenti yanında kütləvi informasiya vasitələrinin inkişafına dövlət dəstəyi fondunun maliyyə yardımı ilə

Ədalət.-2012.-13 iyul.-S.3.