"Biri rəhmətə gedib, qalanlarını müxtəlif səbəblərdən uzaqlaşdırmışam"

Söhbətə başlamazdan öncə düşünürdüm ki, hər gün efirdə olan bir insanla hansısa toxunulmamış mətləblərdən danışmaq çətin olacaq. Çünki adətən hər gün efirdə olan insanlar bir müddət sonra cəmiyyət üçün maraqsızlaşır, hətta bəzən gözdən düşməyi də "bacarırlar". Sən demə, belə olmaya da bilirmiş. Beləliklə müsahibim əməkdar artist, böyük əksəriyyətin "Toppuş bacı" kimi tanıdığı aktrisa Tünzalə Əliyevadır.

- "Qaynana" serialı, məşqlər, televiziyadakı çəkilişlərimiz, toy, xına mərasimləri davam edir. Bir də sentyabrdan yeni serial çəkilişlərimiz başlayacaq.

- Bu qədər işlərə necə vaxt çatdırırsınız?

- Bunlar gündəlik iş deyil ki. Bir gün verilişin, o biri gün serialın çəkilişi olur, növbəti gün xınayaxdı mərasiminə gedirəm. Bəzən üst-üstə də düşür. Çalışıram ki, yola verim.

- "Burda və indi"də (əvvəlki "Çal çağır" verilişi-Y.Y) oynadığınız rolun diliylə ayrı-ayrı sənət adamlarını tənqid edirsiniz. O fikirlər sizə aiddir, yoxsa tapşırıq belə olur?

- Əvvəlki formatda hansısa tikanlı sözləri deyə bilərdik. İndi sənət baxımından bu belə deyil. "Gülmək qadağandır" rubrikasını çıxmaq şərtiylə digər rubrikalar Dilarəyə aiddir. Təbii ki, yeri gələndə biz də müdaxilə edirik.

- Mənim qənaətimə görə, əvvəllər sözügedən verilişdə "Keyxanım" və "Toppuş bacı" personajlarının rolu, çəkisi daha böyük idi. Sizcə indi bu obrazlar həmin verilişdə artıq görünmürmü?

- Efirdə bizim çıxışımızın on dəqiqəsini görürlər. Hər hansı səhnəciyimiz yarım saat çəkir. Sadəcə sonda rejissor onu qısaldır, efirəuyğunlaşdırır. Bəzən bir səhnəcikdə 4-5 rol oynayırıq. Mənə elə gəlir ki, o müddət ərzində bizim sərf elədiyimiz enerji kifayət edir.

- Aktrisa Tünzalə Əliyeva Azərbaycan tamaşaçısının yaddaşında oynadığı rollarla qaldı, yoxsa xarici görünüşüylə?

- Köklüyümü nəzərdə tutursunuzsa, mən bir müddət öncə 64 kiloqram arıqladım və normal insanların çəkisinə çatdım. Təbii ki, yadda qalmağımda fakturamın da rolu var. İstənilən halda mən tamaşaçıların, camaatın nəzərində yaxşı, totuş-motuş aktrisa kimi qaldım.

- Daha bir şəxsi qənaətimi sizinlə bölüşmək istərdim. İndi sizinlə söhbət edirik. Mənə elə gəlir ki, səhnədə gördüyüm "Toppuş bacı"yla indi danışdığım insanın nitqində elə də fərq hiss olunmur. Belə çıxır ki. siz səhnədə də özünüzü oynayırsınız...

- Ola bilər ki, hansısa məqamda özümü oynayıram. Ya gülməyimdə, ya danışıq tonumda bu oxşarlığın olması mümkündür.

- Məncə çox oxşarlıq var. Hətta 80-90 faiz.

- Tamaşaçı məni necə tanıyırsa, o formada görünməyə çalışıram. Mən başqa cür də görünə bilərdim. Amma belə daha yaxşıdır.

- Səhnədə ləhcəylə danışmaq nə dərəcədə doğrudur? Deyim ki, bu sizdə də var.

- Ləhcəm obrazlarıma kifayət qədər kömək edir.

- Obrazlara kömək edə bilər. Amma bir monotonluq da yaradır bütün obrazlarda eyni ləhcə, eyni danışıq tərzi.

- Oxşar ola bilər, eyni olmur. Bir ildə 30-40 obraz oynayırıq. Həmin obrazların bir qismi oxşaya bilər. Bəzən ssenari elə yazılır ki...

- Teatrda fəaliyyətiniz davam edir?

- Yox dondurmuşam.

- Çəkilişlərdən vaxtınız yoxdur, yoxsa toylardan?

- Hər şey üst-üstə düşür. Teatrımız Binəqədiyə köçmüşdü, mən də Zığ qəsəbəsində yaşayırdım. İşə getmək üçün 3-4 marşrut dəyişməli olurdum. Vaxtında çatmaq olmurdu, gecikirdim. Bir dəfə, iki dəfə...sonra dedim ki, daha bəsdi

- Nəzərə almaq lazımdır ki, istənilən aktrisanın həm tanınıb üzə çıxmasında, həm də fəxri ad almasında teatr bünövrə, özül rolunu oynayır. Siz fəxri ad alarkən də, efirlərə çıxmağa başlayanda da teatr aktrisası idiniz.

- Bəli, teatrda işləyirdim. Problemlərim o qədər böyük idi ki, teatra vaxt tapa bilmirdim. Ona görə də teatrda işləyə bilmədim, fasilə verdim. Hər il fikirləşirəm ki, bəlkə teatra qayıdım?

- Amma bura sizi cəmiyyətə tanıdan bir məbəddir. Nəyə görə ondan imtina etməlisiniz?

- İmtina eləmədim. Sadəcə teatrla bağlı işlərimə fasilə verdim.

- Fasilə vermək imtina eləməyin bir az mədəni formasıdır da.

- Niyə imtina edirəm ki?

- Əgər belə olmasaydı, indi teatrda işləyərdiniz. Vaxtınız az idisə ya çəkilişin, yaxud da toyun birindən imtina edərdiniz. Niyə məhz teatrdan?

- Teatrdan aldığım maaşla kirayə pulunu, digər işlərimi görə bilmirdim.

- Teatrdan nə qədər məvacib alırdınız?

- Səhnə ustası kimi yüz qırx manat alırdım.

- Yenidən İrəvan Dövlət Azərbaycan Dram teatrına qayıtmaq, yoxsa başqa bir teatrda işə düzəlmək istəyirsiniz?

- Həmin teatra da qayıda bilərəm, başqa teatrda da işləməyim mümkündür. Hansı olur-olsun teatr olsun. Siz elə bilirsiniz mənim bütün çətinliklərim düzəlib? Düzəlməyib. Nə vaxt düzələcəksə, teatra onda qayıdacağam.

- Elə bir vaxt olacaqmı ki, sənət adamları maddi durumlarından gileylənməsinlər. Çünki milyon qazanan da gileylənir, manat qazanan da.

- Başqalarını deyə bilmərəm, mən gileylənmirəm. Allahımdan razıyam. Əgər bir ailədə beş nəfəri saxlaya bilirəmsə, niyə gileylənməliyəm? Milyon qazanıb gileylənənlərlə mənim aramda fərq var. Onların köməyi var, mənimsə yoxdur. 14 nəfərlik ailəyə mən baxıram.

- Tək ?

- Mənim işim elədir ki, evdə hamı mənə kömək edir. Paltarımı, əşyalarımı hazırlayırlar, kömək edirlər. Ailəlikcə birləşirik, amma qazanc yeri mənim əlimdədir.

- Belə çıxır ki, evdə kaprizlisiniz.

- Mən ümumiyyətlə, kaprizli insanam. Onun ailəyə və qazanca dəxli yoxdur.

- Əslində bu sualı vermək istəmirdim. Amma neçənci sualdır qazancla bağlı məqamlara toxunursunuz. Bir ara belə fikirlər var idi ki, siz kiminsə xınayaxdı və toy məsələlərinin təşkiliylə məşğul olan şirkətini işlədirsiniz.

- Bir neçə ildir ki, özümə kiçik xınayaxdı studiyası açmışam.

- Mənim bildiyimə görə, həmin bu studiya başqasınındır. Sadəcə siz tanınmış sima olduğunuza görə...

- Əvvəl bu cür studiyalar çağıranda ora gedirdim. Sonra yavaş-yavaş həmin pullarla özümə studiya yaratdım.

- Əvvəl xınayaxdıya neçəyə gedirdiniz?

- Bütün qiymətlərə gedə bilirəm.

- Məsələn?

- Bir adam mənə zəng edir ki, Tünzalə xanım eşitmişik siz çox baha gəlirsiniz-halbuki mən belə bir söz deməmişəm. Tutaq ki, deyirəm 500 manata gələrəm. Deyir ki, yetim uşaq böyüdürəm, 300 manata gələrsiniz? Məcburam ki, gedəm.

- Bu məcburiyyətiniz o insana görədir, yoxsa özünüzün ehtiyacınız olur?

- İkitərəflidir. Amma ən birinci ona görə. Kiməsə deyirəm ki, 500 manata gəlirəm. Heç nə demir. Deməli varıdı ki, heç nə demir də. Amma bunu yoxudur deyə xahiş edir ki, aşağı düşüm. Bəzən də biri zəng edir ki, qızım sizi çox istəyir və sair. Xınayaxdıya gedib görürəm ki, doğrudan da əsl mən deyən məclisdir. Düşünürəm ki, aşağı qiymətə olsa da nə yaxşı ki, bura gəldim.

Yəqin artıq bir komandanız var.

- 14-15 nəfərlik işçi qüvvəmiz var.

- İstərdinizmi bu xınayaxdının da bir fonoqraması olsun. Axı müğənnilər canlarını oxumaqdan məhz bu üsulla qurtarırlar.

- Mən bilmirəm vallah. Onu fonoqram eliyənlər bilər.

- 10 nəfərlik heyətlə bir məclisdə iştirak edib 500 manat alırsınız, hansısa müğənni tək özünə 5-6 min manat alır.

- Mən tək çıxışıma 500 manat alıram. Ümumi gedəndə ən böyük məbləğimiz 4000 manat olur.

- Onda müğənnilərə şükür eləmək olar?

- Niyə? Elə müğənni var ki, yarım saata 4 min alır.

- Amma müğənni heç olmasa o qiymətə toya gedir, xınayaxdıya yox.

- Mənim xınamda göz açmaq mümkün deyil. Bütün adət-ənənələri imkanım, savadım daxilində tətbiq eləməyə çalışıram. Adicə bir "gəbəkəsdi" ayinini həyata keçirmək üçün nə qədər vaxt lazım olur.

- Ələsgərlə ("Qaynana" serialındakı həyat yoldaşı-Y.Y) münasibətiniz nə vaxt düzələcək?

- Mən ha istəyirəm yaxşı olsun, alınmır da.

- Ələsgərlə Məftuna xəyanət etmiş sayılmırsınız?

- Yox o başqa yerdədir, bu başqa yerdə.

- Məftunun axırı necə oldu?

- O hələ gözləyə-gözləyə qalıb (gülür).

- Avtomobil idarə edirsiniz?

- Sürücüm idarə edir. Hələ kreditini verib qurtarmamışam.

- Bəs sürücünün məvacibini vaxtında verə bilirsiniz?

- Əlhəmdulillah.

- Narazı deyil?

- Əsla. Altıncı sürücüdür dəyişirəm. Narazı olmağa vaxtları qalmır.

- İndiyə qədər 6 sürücü?!

- Hə. Üç il ərzində 6 sürücü dəyişmişəm. Biri rəhmətə gedib, qalanlarını müxtəlif səbəblərdən uzaqlaşdırmışam. Eləsi var ki, heç iki aya tamam olmadan çıxıb.

- Hansı səbəbdən?

- Elə səbəblər var ki, bunları demək çirkinlikdir. Amma mən onlara atam, qardaşım, əmim kimi yanaşıram. Bəzən insanlara isti münasibət bəsləyəndə sənin çantana girirlər.

- Son olaraq, nə vaxt tamaşaçı Tünzalə Əliyevanı "Toppuş bacı" kimi yox, daha yaddaqalan bir obrazda görəcək?

- İnşallah sentyabra qədər dözək.

- Serialda oynayacağınız obraz sizə fərqli amplua qazandıra biləcək?

- Sentyabrı gözləyək. Heç istəməzdim ki, bu obraz yaddan çıxsın. İnanmıram ki, çıxsın. Bəzən bu obraza görə pis şeylərdən çəkinmişəm.

İntiqam Valehoğlu

Ədalət.-2012.-13 iyun.-S.5.