Yardımlı bu gün və sabah

İlk dəfəydi ki, yoldan qayıdırdım. Maşınımız Masallıda olanda artıq gün yarı olmuşdu. Bundan sonra Yardımlıya getməyin adı yox idi. Bu dağ rayonunda qaynarlıq günortaya qədərdi. Çünki uzaq kəndlərdən gələnlər geri qayıtmaq üçün günün birinci yarısına kimi ən müxtəlif qayğılarını həll etməlidirlər. Günortadan sonra kimsəsiz, boş küçələr adamın üstünə gəlir. Sakitlik içində uyuyan qəsəbə insanlarsız bir qədər də məhzun görünür.

İkinci cəhdim xeyli uğurlu alındı. Günəş üfüqdən boylanmağa başlayanda artıq maşınımız Yardımlıya yol almağa başlamışdı. Viləş çayı boyunca uzanan dağlar öz füsunkar görkəmində, yaşıllıq içində cilvələnirdi. Sel daşqınlarından Masallı-Yardımlı avtomobil yolu xeyli zərər çəksə də, rahatlığını hələ də qoruya bilib.

Yardımlı ərazisində yerləşən məşhur "Şəlalə"də yol yarıdır. Burdan o tərəfə isə çılıpaq, meşəsiz dağlar başlayır. Yamaclar, ormanlar bombozdur, sanki bu torpaqlarda heç vaxt, heç bir ot göyərməyib. Çətin dağ yolu ilə Yardımlıya qalxan iri yük maşınları otla doludur. Bu ilin yazında Yardımlıya yağış düşməyib, indi də il quraq keçir. Ona görə də mal-qaranın tədarükünü yardımlılar indidən görməyə məcburdurlar. Atalar "Külək düşdü, qış düşdü" deyimini elə-belə deməyiblər. Başlarının təsərrüfat işlərinə qarışacağından qorxan dağlılar imkan varkən ot tədarükünü indidən görürlər. Çünki indi bir maşın otun qiyməti bir azdan indikindən 2 dəfə baha olacaq.

Ömür bitər, yol bitməz

Bütün bir ömürdə tikən, quran, yaradan, yol çəkən, dağ yaran insan hələ heç bir işini ürəyincə, tam başa çatdıra bilməyib. Nəyisə sona çatdırmaq elə son deməkdir. Elə buna görə də insanın çəkili, yaddaşlarda qala bilən həyatı doğrudan yola bənzəyir. Ömür bitir, yol bitmir.

İndi həqiqətən yolum Yardımlıyadır. Dediyim kimi sel daşqınları Masallı-Yardımlı yoluna xeyli zərər vurub. Güclü yağışlar nəticəsində yolun 16, 17, 18 və 35-ci kilometrliyində torpaq sürüşməsi baş vermişdir. Bu hadisə rayonun Sırıq-Horavar yolunun 1 və 4-cü, Sırıq-Əruz-Astanlı avtomobil yolunun 910-cu, Yardımlı-Deman-Arvana yolunun 19-cu kilometrliyində təkrar olunmuşdur. Yollarla bağlı rayondakı vəziyyəti nəzərə alan Yardımlı rəsmiləri Azərbaycan Respublikası Nəqliyyat və Fövqəladə Hallar Nazirliklərinə müraciət etmişdir. Bu qurumlardan dəvət edilmiş mütəxəssislərin iştirakı ilə rayonun yol təsərrüfatına dəymiş ziyan müəyyənləşdirilmişdir. Bütün bunlardan sonra toplanmış rəsmi sənədlər aid olduqları nazirliklərə göndərilmişdir.

Artıq bu ilin 3 ayında rayonun Yol İstismar İdarəsinə 21,6 ton bitum, 7,7 ton mazut gətirilmişdir. İşləri daha tez və keyfiyyətlə görmək üçün Asfalt-Beton Zavod təmir edilmişdir. İndi asfalt işlərini həyata keçirmək üçün burada lazım olan material hazırlanır.

Rayondakı bir sıra kəndarası yolların təmiri də unudulmamışdır. Qış mövsümündə xeyli problem yaradan belə yolların kənarındakı suötürücü qurğular, borular təmizlənmişdir.

Yardımlı rayonunda uzaq dağ kəndləri kifayət qədərdir. Bu il salınan yol qışdan sonra tanınmaz hala düşüb. Həyatsa davam edir, təmir ediləcək hələ nə qədər yollar var. Bitib-tükənməyən yollar...

"Bu mənim şəhərimdir"

Rayon mərkəzi Yardımlı şəhərində Aydın Sarı oğlu Sarıyevlə görüşümüz sırf təsadüf nəticəsində oldu. Əslən bu torpaqdan olan, indi Şirvan şəhərində yaşayan bu zəngin ziyalı aranın istisindən can qurtarmaq üçün imkan taparaq 1-2 günlük dağlara pənah aparıb. Ölkənin, eləcə də doğma Yardımlısının tarixini gözəl bilən Aydın müəllimin təklifi ürəyimcə oldu:

- Bəlkə gün qızmamış şəhəri birgə gəzək.

İndi doğrudan əsil şəhərə bənzəyən Yardımlı rayon mərkəzini bərabər gəzirik. Kifayət qədər uzunluğu olan H.Əliyev prospektində hələ də tikinti-abadlıq işləri davam etdirilir. Onsuz da geniş və səliqəli olan prospektin giriş hissəsində, yolların kənarında, şəhərin daxilində, inzibati binaların, ticarət mərkəzlərinin ətrafındakı yaşıllıqlar göz oxşayır. Təkcə bu ilin ilk aylarında burada 6900 ədəd dekorativ ağac əkilmişdir. Meşə və meyvə ağaclarının salınması da unudulmamışdır.

H.Əliyevin adını daşıyan park daha geniş və rahatdır. Maliyyə şöbəsinin, Rayon Məhkəməsinin, Əmək və Əhalinin Sosial Müdafiə Mərkəzinin yeni binaları şəhərə bir yaraşıqdır. Rayon İcra Hakimiyyətinin, Prokurorluğun, inzibati binaların və fərdi yaşayış evlərinin təmirdən sonrakı görkəmi təqdirə layiqdir. Asfalt döşənmiş, müasir işıqlandırma qurğuları ilə təmin edilmiş küçələr, səkilər 10-15 il əvvəlki Yardımlı şəhərinin tam əksidir. Digər tikililərlə barabər Yeni Azərbaycan Partiyasının rayon təşkilatı üçün inşa edilən yeni inzibati binasının inşası başa çatmaq üzrədir.

- Müəllim, ölkəmizdə Dünya Bankının imzaladığı kredit sazişinə əsasən "Milli Su Təchizatı və Kanalizasiya xidmətləri üzrə İkinci Layihə" əsasında rayonda ümumi uzunluğu 52,2 kilometr olan su və 58,2 kilometr kanalizasiya xəttinin çəkilməsinə başlanmışdır. 2013-cü ilin iyulunda başa çatacaq bu layihədən sonra əhalimiz fasiləsiz olaraq su ilə təmin olunacaq. Kanalizasiya xətti çirkab suları küçələrdən, evlərdən çox uzaqlara aparacaq. Onda Yardımlı bir qədər də gözəl və səliqəli olacaq. Bəli, bu mənim şəhərimdir. Hər gün bir az da genişlənən, böyüyən, inkişaf edən şəhərim.

Aydın müəllimin öyünməyə haqqı var, çünki burdakı proses onun dediklərinə əyani sübutdur.

(ardı gələn sayımızda)

Səxavət Məmmədli

Azərbaycan Respublikasının Prezidenti yanında kütləvi informasiya vasitələrinin inkişafına dövlət dəstəyi fondunun maliyyə yardımı ilə

Ədalət.-2012.-22 iyun.-S.7.