Azərbaycan-Türkiyə əlaqələrinin inkişafında qadınların rolu

Jurnalist Qadınlar Assosiasiyası və Yevlax şəhər YAP qadınlar Şurasının təşkilatçılığı ilə Yevlaxda "Azərbaycan-Türkiyə əlaqələrinin inkişafında qadınların rolu" adlı tədbir keçirilib.

İlk öncə qonaqlar Yevlax şəhərində ümummilli lider H.Əliyevin heykəli önünə gül dəstələri qoyublar.

Sonra nümayəndə heyəti Türkiyə dostluq parkına baş çəkiblər. Qonaqlar qardaşlığımızın şərəfinə ucaldılmış abidənin üzərinə gül qoyduqdan sonra, Tarix Diyarşünaslıq müzeyinə gediblər. Muzeydə Yevlax-Mersin dostluğunu özündə əks etdirən eksponatlara baxıblar.

Şəhərlə tanışlıqdan sonra "Sahil" mərkəzində "Azərbaycan-Türkiyə əlaqələrinin inkişafında qadınların rolu" adlı tədbir öz işinə başlayıb.

Konfransı giriş sözü ilə Yevlax şəhər icra hakimiyyətinin birinci müavini Qənimət Qaraşov acıb. O, Azərbaycan -Türkiyə əlaqələrinin tarixindən danışıb və bu əlaqələrin son illər daha da möhkəmlənməsini xüsusi vurğulayıb. Q.Qaraşov deyib ki, Türkiyə-Azərbaycan münasibəti analoqu olmayan bir dostluq üzərində qurulub. Necə ki, ümummilli liderimiz Heydər Əliyev deyib: "bu dostluq əbədidir, sönməzdir".

Yevlax şəhəri YAP qadınlar şurasının sədri , "Kür" qəzetinin baş redaktoru Əminə Yusifqızı Yevlax şəhərinin Türkiyənin Mersin şəhəri ilə qardaşlaşması barədə məlumat verib. O eyni zamanda ulu öndərin "iki dövlət bir millət" fikrinə həmişə sadiq qaldığımızı və bu yöndə görülən işləri xatırladıb. Əminə xanım Yevlax şəhərinin ictimai-sosial həyatının inkişafında qadınların rolunun böyük olduğunu qonaqların diqqətinə çatdırıb. O, həmçinin məhz qadın təşkilatlarının gördüyü işlər barədə konfrans iştirakçılarına geniş məlumat verib.

Tədbirdə çıxış edən Jurnalist Qadınlar Assosiasiyasının sədri Sevil Yusifova bildirib ki, milli kimliyin formalaşması ailədən başlayır və milli kimliyini dərk edən gənclərimizin yetişməsində anaların, qadınların rolu danılmazdır. Qeyd etmək gərəkdir ki, bu gün Azərbaycan- Türkiyə qardaşlıq əlaqələrinə xələl gətirmək istəyən xaricdən idarə olunan qara qüvvələr var. Biz bu qüvvələrin hər vəchlə törətmək istədikləri fitnə-fəsada qarşı ayıq olmalı və düşməni birlikdə məğlub etməliyik. Bizim qardaşlığımız, birliyimiz ilahinin bizə verdiyi bir töhfədir. Necə ki, biz valideynlərimizi, bacı-qardaşlarımızı seçmirik, Azərbayan-Türkiyə qardaşlığının da kökü elə yaradılışa gedib söykənir.

Əgər indi bugünkü toplantımıza nəzər salsaq burda türk dünyasının kiçik modelini görə bilərik. Həm Azərbaycan türkləri, həm Türkiyə türkləri, həm də yavru Şimalı Kipr Cümhuriyyəti türklərini təmsil edən xanımlarımız bir araya gəliblər. Bu da birliyimizə əyani sübutdur.

Biz bir-birimizə bənzəyirik. Dərdlərimiz də birdir. Düşmənlərimiz də birdir. Sevincimiz də birdir. Mücadiləmiz də birdir. Biz eyni kökdən, eyni soydan olan qardaşlarıq.

Hər sahəyə nəzər salsaq orda bənzərliyimizi görəcəyik. Ailəyə, uşağa, valideynə münasibətimiz də əsrlər boyu eynidir. Dəyişməyib. Xeyir işlərimizə getsək görərsiniz ki, böyük türk dünyasının hər bucağında fərqlı deyilik. Eyniyyətin qorunmasında məhz siz xanımların rolu böyükdür, əvəzsizdir. Əlbəttə, özünüdərk və dostluq, qardaşlıq sevgimiz ta ailədən başlayarsa bizim qardaşlığımızı heç bir qüvvə sarsıda bilməz. Türk qadını əsrlər boyu öz müdrüklüyü, öz ağlı və bacarığı ilə kişilərlə yan-yana, çiyin-çiyinə hərəkət edibdi.

Sonra Sevil xanım Bakıdan gələn qonaqlar arasında təşrif gətirən Türkiyə Cümhuriyyətinin Azərbaycandakı səfirinin xanımı Günay Kılıça və Şimalı Kipr Cümhuriyyətinin səfirinin xanımı Sine Qazıoğluna və digər qonaqlara tədbir iştirakçıları adından minnətdarlığını bildirdi. O, Türkiyənin Azərbaycandakı səfirinin indiyə kimi gördüyü işləri, ən həssas məqamlarda belə özünü azərbaycanlı kimi aparmasını, əsil qardaş olmasını və iki xalqın bir-birinə inteqrasiya etməsində göstərdiyi müstəsna rolunu vurğuladı. S.Yusifova həmçinin söylədi ki, "ərlə arvadın torpağı bir yerdən götürülüb" ata misalı sanki cənab səfir Hulusu Kılıç və xanımı Günay Kılıç üçün deyilib. "İndiyə qədər qardaş Türkiyənin Azərbaycanda çox səfiri fəaliyyət göstərib və hər biri diplomat kimi öz missiyalarını başa vurublar. Amma onlar hər addımlarında diplomat kimi rəftar ediblər. Bü gün çox fəxarətlə deyə bilərəm ki, Hulusi bəy isə öz fəaliyyəti ilə bir daha qardaş olduğunu sübut edib. Necə deyərlər, əməlləri və sözləri bir olan və gözəl işlərin həyata keçirilməsində bir-birini tamamlayan belə bir cütlük görmədik. Günay xanım istər bayramlarda olsun, istər dövlət tədbirlərində və istərsə də xeyriyyə işlərində olsun hər zaman öz aktivliyi və içdən gələn səmimiyyəti və istiqanlılığı ilə seçilib. Elm, səhiyyə, biznes sahəsində çalışan ünlü türk qadınlarının Azərbaycana gəlməsində və həmkarları ilə görüşməsində şəxsən özü bir neçə layihəyə imza atıb. Günay xanım Azərbaycanda Türkiyəni, Türkiyədə isə Azərbaycanı təbliğ edən bacımızdır. Mən bütün iştirakçılar adından ona sonsuz təşəkkürlərimi bildirirəm ki, zamanının az olmasına baxmayaraq uzun yol gəlib sizlərlə bir arada olmağa razı olub.

Çıxış üçün söz alan Günya Kılıç öncə təşkilatçılara minnətdarlığını bildirdi. O söylədi ki, Azərbaycana gəldiyində özünü yabançı bir ölkədə hiss etmədi. Anadolunun bir başqa şəhərinə getmiş kimi, yəni öz vətənində hiss etdi. "Biz aynı millətin övladlarıyıq, aynı kökdənik. Azərbaycan -Türkiyə bayraqlarının birlikdə dalğalanmasını görmək nə qədər qürurverici bir duyğudur". Türk qadının şərəfli tarixindən danışan natiq bildirdi ki, biz qız uşaqlarını diri-diri torpağa gömən bir millətin nümayəndələri olmamışıq. Biz dünayaya sivilizasiya daşıyan bir millətin övladlarıyıq. Azərbaycan qadını da bu baxımdan bizim qürur yerimizdir.

Günya xanım çıxışının sonunda Azərbaycan-Türkiyə qadınlarının birlikdə iki qardaş dövlətin qardaşlığının əbədi olmasını, bu dostluğun sönməyəcəyini dünyaya duyurmağa çağırdı.

Tədbirin sonunda Yevlax YAP qadınlar şurası tərəfindən və Azərbaycan Aləmi İcitimai Birliyi tərəfindən Azərbaycan-Türkiyə əlaqələrinin inkişafındakı xidmətlərinə görə Günay Kılıç diplomla təltif olundu. Eyni zamanda Günya xanıma regionda fəaliyyət göstərən ELTV tərəfindən fəaliyyəti müddətində dostluq və qardaşlığın möhkəmlənməsi yönümdə gördüyü işlərə görə xüsusu təşəkkürnamə təqdim olundu. Azərbaycanın tanınmş rəssamı Lyubov Buxarova Günay Kılıça öz əl işi olan, təmizlik simvolu Lili çicəklərinin rəsmini hədiyyə etdi. Təbdir incəsənət nümayəndələrinin rəngarəng proqramı ilə başa çatdı.

Ədalət.-2012.-22 iyun.-S.6.