Şirvan şəhəri 2011-ci ilə yekun vurdu

Yığıncaqdan qeydlər

(əvvəli ötən sayımızda)

Hər naxış bir gözəllikdir

80 min nəfərə yaxın əhalisi olan Şirvan şəhəri hər gün görkəmini bir az da gözəlləşdirir. Elə bu məqsədlə tikinti -abadlıq işləri nəticəsində şəhərin küçə və meydanları indi daha baxımlıdır. Ötən il Heydər Əliyev Prospektində 5.6 kilometr məsafədə asfalt-beton örtük əsaslı təmir edilmişdir. Şəhərin 30 küçəsində, Hacıqəhrəmanlı və Bayramlı qəsəbələrində uzunluğu 16 kilometr olan əraziyə asfalt qoyulmuşdu. İsmət Qayıbov, Mehmandarov küçələrində də cari təmir işləri yüksək keyfiyyətlə aparılmışdır.

Hazırda Ulu Öndərin adını daşıyan prospektə Daxili İşlər Nazirliyinin sifarişi ilə Bas Pasport və Qeydiyyat və Miqrasiya idarəsinin Regional Mərkəzinin İnzibati binasında son tamamlama işləri aparılır. Şirvan memarlıq üslubunu yaşadacaq "Xalq Bank" ASC-nin bank filialının inşası da son mərhələdir. Təməli İlham Əliyev tərəfindən qoyulan Olimpiya İdman Kompleksində tikinti davam etdirilir.

Şəhərin yaşayış massivlərində yeni salınacaq məhlələrin inşası da unudulmur.Orada qoyulacaq oyuncaq və idman qurğuları uşaq və yeniyetmələri daha çox sevindirəcək.

Sağlam insan, yaxşı təhsil ölkənin gələcəyidir

Bu mübaliğəsiz belədir. Hesabat yğıncağında qeyd edildi ki, bu sahədə də Şirvan şəhərində xeyli uğurlar əldə olunub. Səhiyyə Nazirliyi tərəfindən şəhər poliklinikası, Uşaq Birləşmiş Xəstəxanasının şöbələri, məhkəmə tibb ekspertizasının binası əsasında təmin edilmişdir. Ərazinin 5 min kvadrat metri asfaltlaşdırılmışdır. Şəhər Mərkəzi Xəstəxanasının vəsaiti ilə Təxirəsalınmaz Təcili Tibbi Yardım Stansiyası, Vərəm Şöbəsi təmir edilmişdir. Abadlıq işləri genişləndirilməklə 6584 nəfər xəstəyə tibbi yardım göstərmişdir.

Əvvəlki illərdə olduğu kimi Şirvan şəhər təhsili 2011-ci ildə də bir sıra naliyyətlər qazanmışdır. Ötən il tələbə adını qazanmış 200 şirvanlı məktəblidən 20 nəfəri qəbul imtahanlarında 600 -dən çox bal toplamışdır. Onlardan 2 nəfəri Prezident Təqaüdünə layiq görülmüşdür. Məktəblərə 30 mindən çox müxtəlif adda pulsuz dərslik, 70 ədəd elektron oxu vəsaiti verilmişdir. Təhsil şöbəsinin müdiri Paşa Nəbiyev ölkə Prezidentinin sərəncamı ilə pedoqoji sahədəki xidmətlərinə görə " Əməkdar müəllim" adına layiq görülmüşdür. 20 saylı məktəb "İlin ən yaxşı məktəbi", Şamama Yolçiyeva "İlin ən yaxşı müəllimi" müsabiqəsinin qalibi olmuşlar.

Təhsil Nazirliyi tərəfindən şəhərdəki 1 saylı uşaq bağçası-körpələr evində, 12 saylı tam orta məktəbdə təmir bərpa işləri aparılmışdır. 21 saylı orta məktəbin bir hissəsində isə təmir işləri başa çatdırılmışdır. Dünya bankının vəsaiti hesabına 16 saylı orta məktəbdə əsaslı təmir işləri, Bayramlıq qəsəbəsində 480 şagird üçün məktəb binasının inşası aparılır.

Bütün zamanlarda olduğu kimi bu gün də hər bir ölkənin, şəhərin, kəndin gələcəyi sağlam insanlardan, yaxşı təhsildən keçir. Bu baxımdan Şirvan şəhərində kifayət qədər uğurlar vardır. Demək gələcəyə nikbin baxmaq olar

Qayğısız ömür ömür deyil ki..

İnsanlar kimi dənizlərin, şəhərlərin, kəndlərin də qayğıları var. Bu mənada qeyd edilən və edilməyən uğurları ilə bərabər Şirvan şəhərinin də qayğıları yox deyil. Doğrudur, son vaxtlar şəhərin içməli su problemi yoxdur, ancaq, az qala 50 il bundan əvvəl 30 min nəfər üçün inşa edilmiş su təsərrüfatı bu gün iri bir sənaye şəhərinin tələblərinə cavab vermir. Yağış və çirkab, qrunt suları şəhər təsərrüfatı ilə bərabər yaşayış binalarına, sağlamlığa da xeyli ziyan vurur. Yaxın vaxtlarda şirvanlılar bunlardan azad olacaq. Çünki, çox yaxın vaxtlarda şəhərin su və kanalizasiya sisteminin yenidən qurulması işlərinə başlanılacaq.

Dövlət Proqramıda 2009-2012-ci illərdə şəhərdə yüngül və yeyinti sənayesinin inkişaf etdirilməsi Sənaye və Energetika, Kənd Təsərrüfatı Nazirliklərinə tövsiyə edilmişdir. Şəhər İcra Hakimiyyəti Bayramlıq qəsəbəsində uyğun infrastrukturun yaradılması üçün bütün şəraitin olduğunu dəfələrlə bildirsə də nazirliklər hələ də lazımi reaksiya verməmişlər.

Sosial təyinatlı ictimai binaların istilik təchizatını yaxşılaşdırmaq üçün zəruri olan işləri görməyə cavabdeh "Azəristiliktəhcizat" ASC-də hələ ki, əməli işə keçməyə tələsmir.

Şirvan şəhərində ARDNŞ tərəfindən inşa edilmiş 720 yerlik stadionun tikintisi də naməlum səbəblərdən 2008-ci ildən dayandırılmışdır. Şəhər rəhbərliyi Neft Şirkətinə də tikintini başa çatdırmaq üçün dəfələrlə müraciət etməli olmuşdur.

Əlbəttə, bütün bunlar şəhərin əsas qayğılarından olmaqla bərabər rəsmi hesabatda əksini tapan məsələlərdəndir.

...Bu da təkliflər

Yuxarıda qeyd edildiyi kimi, həm də səmimi dialoqa söykənən hesabat yığıncağında şəhər sakinləri, fəallarda öz fikir və mülahizələrini, təkliflərini deməyi unutmadılar.

Kürkörpü yaşayış massivindəki 19 saylı məktəbin direktoru Münəvvər Həbibi hesabatda toxunulan yeni məktəb binasının tikintisinə başlanılması zərurətini qeyd etdi.

Şəhər musiqi məktəbinin müəllimi İlham Salmanov istifadə etdikləri binanın tam yararsız olması barədə fikir söylədi.

Digər çıxış isə şəhərdə Mərkəzi Kitabxana üçün ayrıca bir binanın olmasına diqqət çəkdi.

Bütün bunların gündəlikdə olduğunu və müvafiq işlər görüldüyünü bildirən Şirvan şəhər İcra Hakimiyyətinin başçısı Mərdan Camalov digər qayğılardan da bəhs etdi.

Razılıqla qarşılanan hesabat yığıncağının sonunda ölkə Prezidenti cənab İlham Əliyevə müraciət məktubu oxundu.

Səxavət Məmmədli

Ədalət.-2012.-2 mart.- S.7.