TORPAQ
GƏLİR GÖRÜŞƏ - SÜRÜŞƏ-SÜRÜŞƏ
Sovet
vaxtında qəribə mahnılarımız vardı: Gəl
görüşək MTS-dən yuxarıda; Yar gəlir
görüşə-sürüşə-sürüşə...
Ay qardaş, Maşın-Traktor Stansiyası (MTS)-ın
mahnıda nə işi var, yar niyə görüşə
sürüşə-sürüşə gəlir,
ayağı sürüşkəndi?... Beş gündü
evimizin dalında dağ sürüşə-sürüşə
evimizin üstünə gəlməkdədir. Bir də
telekanalların maşınları parta-partnan gəlib-getməkdədir.
O gəlir, bu gedir, o biri qayıtmamış bu biri gəlib həyətdə
yer axtarır. Hətta JEK müdiri də həyətə gəlib.
Binanın üstünə ünvan lövhəsi də
vurublar. Müxtəlif təşkilatlardan gələnlər də
var. Bir sözlə, məhləmiz məşhurlaşmaqdadır,
hətta qonşularımız da ekrandan göyçək
görünürlər...
Rəsmi xəbərdə deyilir
ki, "Bakı şəhər Xətai rayonu Əliağa
Şıxlınksi küçəsilə Gəncə
prospektində 3 gündür ki, torpaq sürüşməsi
baş verir. ANS TV-nin məlumatına görə, qar əriyəndən
sonra adı çəkilən ünvanlarda dərinliyi 2 metrə
yaxın çat əmələ gəldiyi müşahidə
olunub. Sürüşmə ətrafdakı iaşə obyektlərinin
sahibləri üçün xüsusi narahatlıq yaradıb.
Belə ki, iaşə obyektlərinin binalarında gözlə
görünən çatlar müşahidə olunur. Həmçinin
general Əliağa Şıxlınski küçəsi 59 və
57 saylı, Gəncə prospekti 53, 63, 65 və 79 saylı
yaşayış binaları üçün də təhlükə
yaranıb".
Məni və kamera
qarşısında danışmayanları
yandırıb-tökən " Sürüşmə ətrafdakı
iaşə obyektlərinin sahibləri üçün
xüsusi narahatlıq yaradıb. Belə ki, iaşə obyektlərinin
binalarında gözlə görünən çatlar
müşahidə olunur" sözləri oldu. Bu obyektlərin
sahiblərindən soruşan yoxdur ki, uçurumun
üstündə niyə bina tikirdiniz ki, indi
binalarınızı da təhlükə qarşısında
qoymusunuz, dağın ətəyində olan binaların
taleyeni də. Buyurun, oğlumun çəkdiyi foto-şəkilləri
təqdəm edirəm; hansı ağıllı adam belə
yerdə bina tikərdi. Bu torpaqları satanlar indi təbiət
hadisəsindən danışırlar, görüləcək
tədbirlərdən danışırlar. Rəhmətlik
Müşfiq demişkən, "Adamın üzündə həya
gərəkdi..."
Bəlkə elə bilirsiniz ki,
uçurum üzərində binalar tikəndə təhlükəli
olacağı haqda xəbərdarlıq edilməyib? Təbiət
özü xəbərdarlığı eləyib. Bu
"iaşə obyektləri"nin binaları tikilməzdən
çox qabaq, bu ərazidə sürüşmə hadisəsi
dəfələrlə olub.Belə ki, ərazidə ən
güclü sürüşmə 1989-cu ildə baş verib və
həmin vaxt sürüşmə o qədər böyük
olub ki, Gəncə prospekti 53 saylı binanın birinci mərtəbəsindəki
evlər də torpaq qatı ilə örtülüb. Elə
bilirsiniz nəticə çıxaran olub? Buyurun, müstəqilliyimiz
dövründə müstəqil uçurum uzərində
tikilən obyektlərin şəkillərinə bir də
baxın. Hələ birinin də bünövrəsi qoyulub...
Rəsmilərdən biri deyir ki, hazırda
sürüşmənin aktivliyini müəyyən etmək
üçün ərazidə ölçmə işləri
aparılır. Vallah, indi ölçməkdənsə o
torpaqları satanda, göz görə-görə təhlükəli
zonada binalar tikilməsinə icazə verəndə
ağılla düşünmək lazım idi... Əlbəttə,
qazanc olan yerdə ağıllı düşünməyin
yeri yox idi axı...
"O vaxtdan da mütəmadi olaraq
ərazidə tədqiqat işləri aparlıb"-
Yalançının!!!
Adı çəkilən
dağın üstündə, indiki sürüşmə ərazisindən
300 metr aralıda bir vaxtlar məscid tikmək istədilər.
İstədilər deyəndə, tikdilər də. Gəlib
uçurdular ki, bu ərazinin altında hərbi obyekt olub,
altı katakombalardı. Həm də strateji obyektlər bu ərazidən
nişangaha gəlir-məscid olmaz. Sonra orada yekə bir qəsəbə
saldılar. Nə hərbi obyekt yada düşdü, nə
katakomba, nə də strateji obyekt... Pul olan yerdə nə məscid,
nə strateji obyekt, nə katakomba, yox bir, hərbi obyekt ha...
Kim satdı, kim xeyirini gördü, indi də AA seriyalı
maşınlarda gəzirlər.
ANS TV-nin müxbirinin hadisə
yerində apardığı müşahidələrə əsasən,
hazırda sürüşmənin ən çox müşahidə
edildiyi ərazidə sürüşmənin dərinliyi 1
metrdən artıqdır və 150 metr ərazini əhatə
edir". Təbrik edirəm, ANS-in müxbiri, sürüşmənin
dərinliyi bəzi yerlərdə 2-4 metri də keçib, ərazisi
də ikiqat genişlənib. Hələlik "Mütəxəssis
rəyindən sonra gücləndirilmiş iş görmək
lazımdır. İstinad divarlarını bərkitmək
olar. Amma hələ ölçmə işləri
aparılır". Özü də köhnə
olçü nişangahları artıq torpağın
altında qalıb, indi təzələrini qoymaq
lazımdır ki, görək onlar nə vaxt batacaqlar...
OQTAY
SALAMOV
Ədalət.-2012.-2
mart.- S.7.