ŞƏKİ: QÜRURLU OLMAQ SƏLAHİYYƏTİ

(əvvəli ötən saylarımızda)

Əhalini elektrik enerjisi ilə təmin edən və istismar müddətini başa vurmuş əsas xətlər və dayaqlar dəyişdirilmir, transformator yarımstansiyalarına vaxtlı-vaxtında texniki baxışlar keçirilmir, payız-qış aylarında elektrik enerjisi ilə normal təminatda ciddi problemlər yaranır.

Hesabat dövründə Aşağı Küngüt, Oxud və Fazıl kəndlərinə təbii qazın verilməsi təmin edilmiş, yaşayış məntəqələrinin qazlaşdırılması istiqamətində işlər davam etdirilmişdir.

Son illər ölkəmizdə əhalinin içməli su təminatının yaxşılaşdırılması istiqamətində mühüm tədbirlər görülür, çox böyük layihələr həyata keçirilir. Təməli 2010-cu ilin dekabr ayında qoyulmuş Şəki şəhərinin su təchizatı və kanalizasiya sisteminin yenidən qurulması layihəsinin birinci mərhələsi artıq yekunlaşmışdır. 2012-ci ilin mart ayında layihənin ikinci mərhələsi üzrə tikinti quraşdırma işləri həyata keçiriləcək, şəhərdaxili su təchizatı və kanalizasiya sistemi tamamilə yenidən qurulacaqdır.

Təhsil sistemi diqqət mərkəzindədir

Hesabat dövründə təhsil sisteminin tədrisi, təlim-tərbiyə prosesinin yüksək səviyyədə təşkili daim diqqət mərkəzində saxlanmışdır.

2011-ci il sentyabrın 15-də Baş Kəldək kəndində inşa olunan 180 şagird yerlik yeni məktəb binası istifadəyə verilmişdir. Hazırda Şəki şəhər 5 saylı tam orta məktəb üçün 320 yerlik yeni tədris korpusunun, Şorsu və Aşağı Layısqı kəndlərinin hər birində 360 şagird yerlik, Çələbi Xan qəsəbəsində 180 şagird yerlik yeni məktəb binalarının tikintisi aparılır.

Şəkinin Kiş kəndində Yaponiya hökumətinin vəsaiti hesabına inşa edilmiş yeni bir uşaq müəssisəsinin açılışı olmuş, 22 saylı uşaq bağçasının dövlət vəsaiti hesabına əsaslı təmiri davam etdirilir.

2012-ci ildə Şəki Şəhər Təhsil şöbəsinin yeni inzibati binasının, Əliyar kəndində 80 şagird yerlik ümumi orta məktəbin tikintisi, Baş Küngüt kəndində tam orta məktəbin əsaslı təmiri nəzərdə tutulmuşdur.

2010-2011-ci tədris ilində ali məktəblərə keçirilən qəbul imtahanlarında iştirak edən 1265 nəfər məzundan 513 nəfəri tələbə adını qazanmışdır.

Səhiyyə xidməti yüksəlişdə

2011-ci ildə əhaliyə göstərilən tibbi xidmətin səviyyəsini daha da yüksəltmək məqsədilə səhiyyə müəssisələrinin maddi-texniki bazasının yaxşılaşdırılması istiqamətində işlər davam etdirilmişdir.

2011-ci il noyabrın 17-də Prezident İlham Əliyevin iştirakı ilə şəhərdə yeni, müasir 100 çarpayılıq şəhər xəstəxanasının açılışı olmuşdur.

Şəki Doğum Evi Kompleksində dövlət vəsaiti hesabına əsaslı təmir, Aşağı və Baş Göynük kənd xəstəxanaları üçün yeni binaların tikintisinə başlanmışdır.

İcra strukturlarının təşkilat-quruculuq fəaliyyəti.

Qarşıda duran vəzifələr

Şəkinin 33 kənd və qəsəbə icra nümayəndəliyində Şəki şəhər İcra Hakimiyyəti başçısı tərəfindən təsdiq edilmiş qrafikə uyğun olaraq 2011-ci ilin yekunlarına dair hesabat yığıncaqları keçirilmişdir. Yığıncaqlarda görülən işlər və mövcud problemlər müzakirə edilmişdir. Lakin ərazi kənd icra nümayəndəliklərinin bir çoxunun fəaliyyəti qənaətbəxş deyildir.

2011-ci ildə 867 nəfər vətəndaş Şəki Şəhər İcra Hakimiyyəti başçısı tərəfindən qəbul edilmişdir. Şəhər İcra Hakimiyyətinin başçısı tərəfindən təsdiqlənmiş qrafikə əsasən 47 səyyar qəbul keçirilmiş, qəbullarda 5076 nəfər iştirak etmişdir. Keçirilmiş qəbullarda 426 nəfər vətəndaş dinlənilmiş, 560 müraciət səslənmişdir. 2011-ci ildə Şəki şəhər icra hakimiyyəti başçısının sərəncamı ilə maddi yardım üçün müraciət edən vətandaşların sosial vəziyyətinin, yaşadıqları evlərinə təbii fəlakət nəticəsində və ya digər səbəblərdən dəymiş zərərlərin, ayrı-ayrı təkliflərin araşdırılması ilə bağlı komissiya yaradılmışdır . 2011-ci ildə komissiya tərəfindən 147 nəfər vətəndaşa müxtəlif məqsədlər üçün 69 min 377 manat məbləğində maddi yardım göstərilmişdir.

2011-ci ilin dekabrında Şəki Şəhər İcra Hakimiyyəti regional televiziya kanalı olan "Kanal-S"-in imkanlarından istifadə edərək ilk dəfə "Açıq mikrofon" layihəsini həyata keçirmişdir. Vətəndaşların birbaşa icra başçısına ünvanladığı suallar yerindəcə cavablandırılmış, onların həlli nəzarətə götürülmüşdür.

2012-ci ildə qarşıda duran vəzifələr əsasən aşağıdakılardır:

Yaxın iki ildə rayonun sosial-iqtisadi inkişafının gücləndirilməsi;

ərazinin infrastrukturunun yenidən qurulması üçün bir sıra mühüm layihələrin həyata keçirilməsi;

sənaye və kənd təsərrüfatı istehsalının genişləndirilməsi;

ərazinin təbii sərvətlərindən səmərəli istifadə olunmasına nail olmaq;

yol təsərrüfatı və nəqliyyat infrastrukturunun möhkəmləndirilməsi;

elektrik enerjisi, istilik və qaz təchizatı, rabitə xidmətinin yaxşılaşdırılması;

su təchizatının və kanalizasiya sisteminin yenidən qurulması;

meliorasiya və irriqasiya sahəsində mühüm işlərin davam etdirilməsi;

yeni iş yerlərinin açılması,quşçuluq və baramaçılıq təsərrüfatlarının yaradılması və sair.

Şübhəsiz ki, qazanılan bütün uğurlar Prezident İlham Əliyevin adı ilə bağlıdır. Nazirlər Kabinetinin 2011-ci ilin 9 ayının yekunlarına həsr olunan geniş yığıncağında cənab Prezident demişdir: "Mən əminəm ki, 2012-ci ildə də qarşıda duran bütün vəzifələr uğurla icra ediləcəkdir. 2012-ci ilin dövlət büdcəsi 2011-ci ilə görə daha da böyükdür... Beləliklə, 2012-ci il başlayır. 2012-ci ildə görüləcək işlər çoxdur. Hamıdan fəallıq, fədakarlıq, vicdan və qələbə əzmi gözləyirəm".

MƏZAHİR ƏHMƏDOĞLU

Azərbaycan Respublikasının Prezidenti yanında kütləvi informasiya vasitələrinin inkişafına dövlət dəstəyi fondunun maliyyə yardımı ilə

Ədalət.-2012.-16 mart.-S.7.