Qazi toyu

Bu gün toy qurulub, toy, Qarabağda,

Qol-qıçlar qışqırır, oy Qarabağda.

Bu qazi toyunda, bu ər toyunda,

rəqs meydanına nidalar qoyan

tək qıçı üstündə oynayan oğlan,

bu gecə tək qalan qıçın oynayır.

Oturub ortada qara ciyər bəy,

sağdişi ayaqdı, soldişi qoldu,

dağlara dırmanan uzanan yoldu,

sürünə-sürünə barmaqlar gəlir,

atlana-atlana pəncələr gəlir,

qollar rəqs eləyir, qıç təpik çalır,

oynayıb yorulan əl çəpik çalır.

Hərdən halay vurub yallı gedirlər,

bir pəncə ortadan çıxmaq istəmir

qalan barmağından süzülür təri,

sevinc tər içində boğur kədəri

Şəhid Qarabağda toydu bu gecə .

Bu qazi toyunda, bu ər toyunda,

yerində oynayan süzənindən çox,

yerdən təbrik edən gəzənindən çox,

saqqallı gələni bəzənəndən çox.

Bu qazi toyunda, bu ər toyunda,

tək əl ovcun döyür çəpik yerinə,

çəliklər səs salır təpik yerinə.

Qazilər oynayır, qazilər indi-

başları üstündə qoltuq ağacı,

yellənir boş, qıçsız şalvar balağı,

Bu qazi toyunda, bu ər toyunda.

Bu gün bəy oturub bayrağın altda

bu qazi toyunda bu ər toyunda.

Bu qazi toyunda bu ər toyunda

qol qalxır, qıç qalxmır oynaya o da,

ötən günlərini sala bir yada.

Dolaşan ruhlar da oynayır bu gün,

itən arzular da oynayır bu gün,

bu qazi toyunda, bu ər toyunda.

Bu qazi toyunda, bu ər toyunda,

çəngəllər, bıçaqlar əllərdən artıq,

susanı danışan dillərdən artıq. . .

Göylərə ucalan tək qol oynayır

yanında oynayan bir xəyal qolla,

yol gedir, yol gedir bir kölgə yolla.

Ananın yol çəkən gözləridi bu,

oğluna söz qoşan sözləridi bu.

Səngərdən dağlara uzanan ağ yol,

sonunda qaliblər dayanan ağ yol,

bu gecə yol gedən tək ayaqlılar

döyüşə səsləyir ayaqlıları

bu qazi toyundan, bu ər toyundan .

Bu gün toy qurulub, toy, Qarabağda,

qol-qıçlar qışqırır, oy Qarabağda.

Rəfail Tağızadə

Ədalət.-2012.-28 mart.- S.7.