İndi daha abad Sabirabad

Düz 2 il əvvəl - 2010-cu ilin mayında bu rayon - Sabirabad təbii fəlakətin ilk günlərini yaşayırdı. Dəli Kürün daşması nəticəsində sel daşqınları rayonun Qaragüney, Mürsəlli, Qasımbəyli, Bala Həşimxanlı, Şıxlar, Ulacalı və digər kəndlərini öz ağuşuna almışdı. Minlərlə ev, onlarla məktəb, tibb müəssisələri, inzibati binalar daşqının qurbanına çevrilmişdi. İnsanlar təbii fəlakətin törətdiyi faciənin ən qorxulu, ən müdhiş anlarını yaşayırdı.

Yaradılmış Dövlət Komissiyasında Maliyyə Nazirliyinin nümayəndəsi kimi iştirak edən, hazırda Şirvan şəhəri üzrə Maliyyə İdarəsinin "xəzinə əməliyyatları" sektorunun baş məsləhətçisi olan Nazim Məmmədov o günləri ürək ağrısı ilə xatırlayır. Deyir ki, bir sıra çox faciəli səhnələrlə bərabər Bala Həşimxanlı kəndində su basmış 60 evdən 20-sinin elə yolun içində yaşamaqdan başqa çarələri qalmamışdı. Körpə uşaqların gözlərindəki qorxu indi də yadımdadır...

O vaxtdan indi düz 2 il keçir. Respublika Fövqəladə Hallar Nazirliyi Komissiyasının müəyyənləşdirdiyi uçub-dağılmış, qəzalı vəziyyətə düşmüş evlərin yerində artıq çox böyük zövqlə 1400 ədəd mənzil inşa edilmişdir. Daşqından çox böyük zərər çəkən Ulacalı kənd sakinlərinə 50 evdən ibarət bütün şəraiti olan yeni qəsəbə ərməğan edilmişdir. Məktəblər, tibb müəssisələri, inzibati binalar, körpülər tikilmiş və ya əsaslı təmir edilmişdir. Həyat öz axarına düşsə də, sel daşqınları nəticələrini tam aradan qaldırmaq üçün yenə həmin kəndlərdə Fövqəladə Hallar Nazirliyinin 4 komissiyası araşdırmalar aparır, sonradan qəzalı vəziyyətə düşən binalar müəyyənləşdirilir.

Təbii fəlakət hər an baş verə bilər

Çox böyük gərginliklər, ağır günlər keçirən sabirabadlıların özləri etiraf edirlər ki, çiy kərpicdən tikilmiş köhnə evlərin əvəzində bu tezliklə bütün şəraiti olan yeni mənzillərin inşa edilməsini ağıllarına belə gətirmirdilər. Daşqının nəticələrini tam aradan qaldırmaqdan ötrü Ölkə Presidenti İlham Əliyevin 29 mart 2012-ci ildə "Kür və Araz çaylarının daşması nəticəsində baş vermiş təbii fəlakətin fəsadlarının aradan qaldırılmasına dair əlavə tədbirlər haqqında" verdiyi sərəncam burdakı işlərin daha intensiv aparılmasına səbəb olmuşdur.

Təbii fəlakətdən ziyan çəkmiş sakinlərə indiyə kimi dövlət tərəfindən ev və əmlaklarına görə 8 milyon 31 min manat, əkin və həyətyanı sahələrinə görə 4 milyon 627 min manat kompensasiya verilmişdir.

İndi Sabirabadda təbii fəlakətin nəticələri demək olar ki, aradan qaldırılmaq üzrədir. Bununla bərabər gələcəkdə baş verə biləcək sel daşqınlarının qarşısını almaq üçün qabaqlayıcı tədbirlər görülür. 2012-ci ilin 1-ci rübündə Kür-Araz Çaylarında Bəndlərin İstismarı İdarəsi bu məqsədlə Kür çayının sağ və sol sahilləri boyunca 14,4 kilometr məsafədə mühafizə bəndlərinin təmiri işlərini aparmışdır.

Yazda, yayın əvvəlində Kür çayında su daha bol olur. Belə vaxtlarda suyun səviyyəsi kifayət qədər yüksəlir. Torpaqların suvarılmasını təmin etmək üçün Sabirabadın bir sıra kəndində, o cümlədən Çığırğan kəndində bir ədəd şlüz quraşdırılmışdır. Suyu borular vasitəsilə keçirmək üçün etibarlı su keçidləri inşa edilmişdir.

Sabirabad rayonunda sel daşqınları nəticələrini tam ləğv etmək üçün fərdi evlərin, sosial obyektlərin tikintisi, təmiri davam edir. Bu məqsədlə komissiya obyektlərə baxış keçirir. Yəqin ki, yaxın vaxtlarda Sabirabad bu qayğıdan tam azad olacaq.

Abad el yolundan bilinər

Paytaxtdan, eləcə də ölkənin digər şəhərlərindən Sabirabad rayonuna yol Şirvan şəhərindəki körpüdən başlayır. Kür çayı üzərində 1961-ci ildə inşa edilmiş bu körpü 2012-ci ilin əvvəllərində təmirə dayanmağa məcbur oldu. İndi təmir edilmiş, dəmir konstruksiyaları rənglənmiş körpü insanların xidmətindədir. Kür çayı üzərində yeni bir körpünün inşası isə son mərhələdədir.

Respublika üçün çox böyük əhəmiyyəti olan Hacıqabul-Bəhrəmtəpə-Horadiz avtomobil yolunun Sabirabad rayonu ərazisindən keçən hissəsində işlərin qızğın çağıdır. İndi burda əsaslı təmir işləri aparılır, körpülər tikilir.

Sabirabad rayonunda istifadəyə verilmiş yeni Asfalt zavod, dəmir-beton məmulatları istehsal edən 2 müəssisə yəqin ki, rayonun yol təsərrüfatına öz töfhəsini verəcək.

Sabirabad şəhərinin mərkəzi küçələri ilə yanaşı məhəllələrdəki küçələr də daim yenilənir. Yağış sularının küçələrdən axması üçün su ötürücü kanallar çəkilir. Ümumiyyətlə, son zamanlar Sabirabad rayonunda yolların abadlaşdırılmasına xüsusi fikir verilir. Uzunluğu 68 kilometr olan, 18 kəndin ərazisindən keçən Sabirabad-Qasımbəyli-Narlıq-Qaraqaşlı avtomobil yolunun əsaslı təmiri və yenidən qurulması Prezident İlham Əliyevin 02 noyabr 2010-cu il tarixli sərəncamı əsasında həyata keçirilmişdir. 22 kilometr uzunluğu olan Sabirabad-Qasımbəyli avtomobil yolunun əsaslı təmirinin açılışını bildirən qırmızı lenti 05 may 2011-ci ildə Azərbaycan Prezidenti kəsmişdir.

Sabirabad rayonunda yolların təmiri ilə bağlı aparılan işlər hər gün davam etdirilir. Çünki abad yolların çox olması əlaqələrin daim intensiv olması deməkdir.

Sabirabad şəhəri simasını dəyişir

Ölkə Rəhbərinin imzaladığı Regionların iqtisadi inkişafına dair Dövlət Proqramı Sabirabad rayonunda da uğurla həyata keçirilir. İqtisadiyyatın müxtəlif sahələrində abadlıq-quruculuq işlərindən bunu aydın görmək olur.

"Sabirabad, Saatlı, İmişli, Ağcabədi və Zərdab rayonlarının sosial-iqtisadi inkişafına dair əlavə tədbirlər haqqında" Azərbaycan Respublikası Prezidentinin 11 may 2011-ci il tarixli Sərəncamı əsasında Sabirabad rayonunda kifayət qədər iş görülmüşdür. Şəhərin Heydər Əliyev prospektindəki 15, 17, 118 saylı 5 mərtəbəli binaların dam örtükləri dəyişdirilmiş, binaya plastik pəncərələr qoyulmuşdur. S.Vurğun, H.Ağayev, H.Həmidov küçələrindəki yaşayış binalarının dam örtükləri yenilənmişdir. Sabirabad rayonunun Pambıq zavodu adlandırılan yaşayış massivindəki qəzalı vəziyyətdə olan 2 mərtəbəli yaşayış binası əsaslı təmir edilərək sakinlərin ixtiyarına verilmişdir.

(ardı gələn sayımızda)

Səxavət Məmmədli

Azərbaycan Respublikasının Prezidenti yanında kütləvi informasiya vasitələrinin inkişafına dövlət dəstəyi fondunun maliyyə yardımı ilə

Ədalət.-2012.-19 may.-S.20.