GÖZLƏRDƏN BOYLANAN SEVİNC...

Ətrafa yayılan musiqinin səsi insanın ürəyinə bir rahatlıq və bir xoş duyğu səpələyir. O duyğu ki, bir anlıq da olsa, adamı götürüb öz qanadlarında işğal olunmuş torpaqlarımıza - Füzuliyə, Ağdama, Zəngilana, Cəbrayıla, Qubadlıya, Kəlbəcərə, Şuşaya... aparır. Sanki musiqinin ovqatında qarış-qarış o torpaqları, o çayları, o gölləri, o bulaqları və o dağları gəzirsən. Ərgünəşdən Füzuli şəhərinə düşüb Çənlibelə, Köndələn çaya və ordan da şəhərin küçələri ilə dolaşa-dolaşa gəlib çıxırsan düz avtovağzala...

Bura Füzuli deyil. Heç bura Füzulinin küçələri də deyil. "Qarabağ şikəstəsi"nin dalğa-dalğa ətrafa yaydığı yer Bakıda Füzuli rayonunun İnşaatçılar qəsəbəsi, Uşaq Musiqi məktəbidir. Sadəcə olaraq bu məktəb burda da öz ömrünü yaşayır və 6 saylı Peşə liseyinin II korpusunun birinci mərtəbəsində yerləşir. Otaqlar dar olsa da bu musiqi məktəbinin kollektivinin qurub-yaratmaq eşqinin azaltmayıb, əksinə bu dar, balaca otaqlarda Füzuli musiqi məktəbinin zəngin ənənələri qorunur və yaşanır.

Məktəbin direktoru Zöhrə xanım Rzayeva ilə söhbətmiz çox səmimi alınır. Görkəmli xanəndə və pedaqoq Seyid Şuşinskidən başlamış, İslam Rzayevi, Ağabala Abdullayevi, Süleyman Abdullayevi, Təvəkkül Musayevi, Eldəniz Məmmədovu... bir-bir yada salır. Zöhrə xanım onların böyük sənətindən və musiqi istedadından söhbət açır. O qədər şirin, o qədər məlahətli danışır ki, bal kimi söhbətdən doymaq olmur.

Öyrənirəm ki, Zöhrə xanım həmişə böyük sənətin və musiqinin içində olub. Elə böyük sənət də zaman-zaman onu özünə çəkib və musiqi aləminə gətirib. Ixtisasca fortopiano müəllimidir. Ilk dəfə Ordubadda musiqi dərsləri deməyə başlayıb. Ordubada getməyi isə təsadüfi deyil. Bu ailə həyatı ilə bağlı olub. Sonradan Ağdam musiqi məktəbini bitirib və 1 nömrəli Füzuli musiqi məktəbində müəllim işləyib. Sonralar isə həmin məktəbdə dərs hissə müdiri vəzifəsində çalışıb. 1991-ci ildən isə Füzuli Uşaq Musiqi məktəbinin direktoru işləyir.

Söhbətimiz zamani bir daha hiss elədim ki, Zöhrə xanım çox kövrək ürəyə və incə qəlbə malikdir. Çünki Füzulidən danışanda hər dəfə kövrəlir və gözü dolurdu. Mən də istəmirdim ki, onun kövrək ürəyini daha da kövrəldəm. Ona görə də söhbətin səmtini musiqi məktəbinin üstünə yönəltmək istəyirdim. Söhbətimiz ürəyimiz istədiyi səmtə doğru da yön alırdı...

Bir-bir dərs keçilən sinif otaqlarına baxırıq. Otaqlarda şagirdlərlə yanaşı, musiqi alətləri - fortopiano, tar, skripka, kamança, nağara... diqqətimizi cəlb eləyir. Sən demə, bu məktəbdə üç şöbə - xalq çalğı alətləri, fortopiano, nəzəriyə şöbələri fəaliyyət göstərir. Şöbələrdə isə tar, kamança, qarmon, xanəndəlik (səs), nağara ixtisasları var. Elə istedadlı uşaqlar da bu ixtisaslarda musiqi sənətinin sirlərini öyrənirlər. Onlara klassik və müasir musiqinin bütün sirləri əxz edilir. Çünki musiqi məktəbində təcrübəli və musiqi aləmində sözünü deyə bilən müəllimlər işləyir.

Bu gün məktəbdə 240 şagirdə 66 müəllim musiqi dərsi deyir. Təbii ki, müəllim yaxşı olanda onların şagirdləri də çox şeyləri öyrənə bilirlər. Vəfa Musayevə (fortopiano), Ramiq Mehdiyev (tar), Tofiq Nəsibov (xanəndəlik), İlahə Qasımova (fortopiano), Rövşanə Abdullayeva (skripka), Aynur Məmmədova (nəzəriyyə), Günel Paşayeva (nəzəriyyə) belə müəllimlərdəndir.

Məktəbin bir neçə şagirdi Mədəniyyət və Turizm Nazirliyinin Mədəniyyət Şurası üzrə Elmi-Metodik Mərkəzin keçirdiyi "Muğam-xanəndəlik" müsabiqəsində iştirak edib. Gənc xanəndələr Əmrah Cənnətəliyev və Nəriman İmanzadə bu müsabiqədə maraqlı çıxışları ilə diqqəti cəlb eləyiblər. Digər iki şagird - fortopianoda İsmayıl Xəlilov və skripkada Elmira Quliyeva növbəti müsabiqəyə hazırlaşır. Əlbəttə, isteded heç də birdən-birə üzə çıxmır. Onun üzə çıxması üçün bir çox müsabiqələr və yarışlar yeni bir təkan olur. Elə ki, bir istedadlı musiqiçi hər hansı yarışmanın qalibi adını qazanır, bax onda deyirlər ki, keçirilən müsabiqə filankəsi tamaşıçılara tanıtdı. Necə ki, ATV-nin "Xalq ulduzu" yarışması Eldəniz Məmmədovu kəşf elədi.

... Qarmonun məlahətli səsi eşidilir. "Azərbaycan təranələri" pərdə-pərdə ətrafa yayılır. Bu musiqini eşidən insanın içinə bir işıq, bir sevinc gəlir. Qarmonu səsləndirən isə məktəbin şagirdi Mübariz İslamzadədi. Qarmon müəllimi Əfsanə Əhmədova diqqətlə onun barmaqlarına baxır. Barmaqlar isə qarmonun şirmayi dilləri üzərində elə gəzir ki, sanki su pərisi suyun üzü ilə yeriyir...

Bunların hamısını məktəbin direktoru Zöhrə xanım Rzayevə ilə bir yerdə seyr edirik. Hiss eləyirəm ki, yenə musiqinin sədaları Zöhrə xanımı çox uzaqlara - işğal altında olan yurduna aparır. Birdən-birə mənə sarı dönür və deyir ki, o uşaqların gələcəyinə inanıram. Bizim üçün və musiqinin inkişafı üçün cox işlər görülür. Rayon icra hakimiyyətinin başçısı Alı Alıyevin, mədəniyyət və turizm şöbəsinin müdiri Elman Məmmədovun bizə çox isti münasibəti, qayğısı var. Elə həmişə də çətinə düşəndə onları özümüzə arxa bilirik.

... Günlərin birində bu musiqi məktəbi yenidən Füzuliyə dönəcək. Günlərin birində bu qəlbi sınıq və nisginli insanlar yenidən öz yurd yerlərinə qayıdacaq. Bax onda indiki kimi Zöhrə xanımın gözlərinə çökən o kədəri görməyəcəyik. O gözlərdən, o ürəklərdən sevinc və fərəh hissi boylanacaq...

Faiq QİSMƏTOĞLU

Ədalət.-2012.-1 may.-S.6.