Musiqi kimi qəlblərdə yaşamaq...

İstedadlı musiqiçi və pedaqoq Aftandil Cəfərovun əziz xatirəsinə

Rəsmi sənədlərdə peşəsini bildirən qrafada cəmi bircə söz yazılmışdı-musiqiçi. Amma Aftandil Cəfərovun keçdiyi mənalı ömür yolunu, gördüyü işləri bu bir kəlmə ilə anlatmaq mümkün deyil. O, istedadlı musiqiçi olmaqla yanaşı gözəl pedaqoq, bacarıqlı təşkilatçı və səmimi insan kimi tanındı, hörmət qazandı. Dostları, həmkarları, çoxsaylı tələbələri bu gün Aftandil Cəfərovu məhz belə xatırlayırlar.

Aftandil Cəfərov 1938-ci il dekabrın 16-da dünyaya gəlmişdi. Musiqi onun ruhuna hopmuşdu. Musiqinin özü kimi həlim, ürəyəyatımlı, ətrafdakılara yalnız xoş ovqat bəxş edən insan idi. Bütün şüurlu həyatını da ana laylası kimi bizə yaxın olan musiqinin təbliğinə, tədrisinə həsr etdi. Qazaxda musiqi məktəbinə, Qubada musiqi texnikumuna rəhbərlik edərkən bacarıqlı təşkilatçı kimi böyük nüfuz və hörmət qazandı. Asəf Zeynallı adına Musiqi Kollecində müəllim kimi çalışarkən pedaqoq kimi bacarığını ortaya qoydu. Rəsmi titul, şan-şöhrət arxasınca qaçmadı, təmənnasız, sadə ömür sürməkdən yorulmadı. Yetişdirdiyi saysız-hesabsız tələbələrinin uğurları onun qazancı və sevinci oldu. İstedadlı tələbələrini öz ailə üzvlərindən, doğmalarından ayırmadı. Təsadüfi deyil ki, bu gün Aftandil Cəfərov itkisi ilə təkcə övladları, əzizləri deyil, çoxsaylı tələbələri barışa bilmir, böyük təəssüf hissi keçirirlər.

Əlihüseyn Cəfərov onun çoxsaylı tələbələrindən biridi: "Aftandil müəllim Quba Musiqi Texnikumuna rəhbərlik edəndə mən oranın tələbəsi idim. Həmin dövrdə texnikumun neçə-neçə tələbəsi Bakı Musiqi Akademiyasına daxil oldu. Mənim, Məmmədəli Cəfərovun, Yaşar Şəfiyevin, Rasim Kərimovun və digər tələbələrin bir musiqiçi və insan kimi formalaşmağımızda Aftandil müəllimin böyük rolu var. Dünyanın müxtəlif ölkələrində Azərbaycan musiqisini təbliğ edərkən həmişə Aftandil müəllimin məsləhətləri köməyimizə gəlib. İllər keçsə də o, bizimlə maraqlanır, xeyirxah əməllərini əsirgəmirdi. Belə bir gözəl insanın vəfatı xəbərini eşidəndə çox pis oldum. Yəqin ki, Aftandil müəllimin bütün tələbələri eyni hissi keçirdilər".

Digər tələbəsi, Milli Konservatoriyanın dosenti, Səid Rüstəmov adına Xalq Çalğı Alətləri Orkestrinin solisti Səbuhi Cəfərov da mərhum müəllimini ehtiramla anır: "Aftandil müəllim istedadlı pedaqoq olmaqla yanaşı həm də nəcib bir insan idi. Tələbələrinə qarşı hədsiz tələbkarlıqla yanaşırdı, amma çətin günlərimizdə də həmişə yanımızda olurdu. Onun tələbələrindən çoxu bu gün nüfuzlu musiqi kollektivlərində çalışır, pedaqoji fəaliyyətlə məşğuldu. Buna baxmayaraq, həmişə Aftandil müəllimdən öyrənirdik. O, da heç vaxt məsləhətlərini bizdən əsirgəmirdi. Çox doğma, səmimi bir müəllimi itirdik".

İstedadlı musiqiçi və pedaqoq, bacarıqlı təşkilatçı və səmimi insan həmişə qəlblərdə yaşayacaq. Elə musiqinin özü kimi...

ETİBAR

Ədalət.-2012.-8 may.-S.5.