Təbrizdə oğurlanan şairlərimiz tapılmır

Axtarışlara Kamal Abdulla da qoşulub

"İrana Bakıdan səfər etmiş iki gənc Azərbaycan şairi Şəhriyar Hacızadə və Fərid Hüseynin tapılması barədə İrandakı Baş Konsulluğumuzu məlumatlandırmışıq. Hazırda baş konsulluq...

Bu sözləri Lent.az-a açıqlamasında Xarici İşlər Nazirliyinin mətbuat xidmətinin rəhbəri Elman Abdullayev deyib. E. Abdullayevin bildirdiyinə görə, gənclərin hansı şəraitdə yoxa çıxdıqları, tutulub-tutulmadığı barədə də məlumat yoxdur: "Onlardan xəbər çıxan kimi konsulluq bizi məlumatlandıracaq və biz də mətbuata məlumat verəcəyik".

Xatırladaq ki, kulis.az saytı iki azərbaycanlı şair Şəhriyar delGerani (Hacızadə) və Fərid Hüseynin Təbrizdə mülki geyimli şəxslər tərəfindən həbs edildiyi barədə xəbər yayıb. Xəbərdə deyilir ki, Təbrizə poeziya festivalına gedən gənclər geri qayıdarkən mülki geyimli şəxslər tərəfindən naməlum istiqamətə aparılıblar. Mayın 2-dən bəri onlardan xəbər yoxdur.

Şəhriyarın atası Hacı Mail Hacıyev artıq İran səfirliyinə sorğu göndərildiyini deyib. Məsələ ilə Bakı Slavyan Universitetinin rektoru Kamal Abdulla şəxsən İran səfirliyinə müraciət edib. Hacı Mailin sözlərinə görə, məsələni həm də Azərbaycanın Xarici İşlər Nazirliyi araşdırır.

Hadisə ilə bağlı "Dünya ədəbiyyatı" dərgisinin baş redaktoru, Azərbaycan Yazıçılar Birliyi İdarə Heyətinin üzvü Səlim Babullaoğlu İranın Ali Dini rəhbəri Ayətullah Xamneyi, prezidenti Mahmud Əhmədinejad və İranın Azərbaycandakı səfiri Məhəmmədbağır Bəhramiyə müraciət edib.

S.Babullaoğlu bildirib ki, adları çəkilən adamlar olduqca istedadlı gənc ədəbiyyatçılardır, gənc olmalarına rəğmən Azərbaycanda kifayət qədər yaxşı tanınırlar və onlar indiyəqədərki heç bir hərəkəti və yazısı ilə nə İran dövlətinin, nə də Azərbaycan-İran dostluğunun əleyhinə olmayıb: "Düşünmürük ki, gənc həmkarlarımız İranda olduqları müddətdə hər hansı qanun pozuntusuna yol veriblər. Bunu eyni vaxtda İranda olan və onların saxlanmasına şahidlik edən həmvətənlərimiz də söyləyirlər".

Müraciətdə deyilir ki. İslamın uca, insanpərvər idealları əsasında qurulan və yaşayan dövlətdə belə bir xoşagəlməz hadisənin olması dərin təəssüf hissi doğurur: "İnanrıq ki, İran dövlətinin müvafiq strukturları bu məsələni tezliklə həll edəcək, ilk növbədə bu gənclərin onları artıq 5 gündür səbirsizliklə gözləyən valideynlərinin, sonra isə ədəbi ictimaiyyətin narahatlığına son qoyulacaq.Sizdən çox xahiş edirik ki, bu məsələnin tezliklə həll olunmasında öz böyük nüfuzunudan istifadə edəsiniz və ədalət bərqərar olsun!".

Anar

Ədalət.-2012.-8 may .-S.4.