Həsən Əblucun 70 illiyi qeyd edildi

Aprelin 30-da Akademik Milli Dram Teatrda görkəmli mədəniyyət xadimi, əməkdar artist Həsən Əblucun anadan olmasının 70 illiyinə həsr olunan xatirə gecəsi keçirilib. Lent.az xəbər verir ki, tədbirə sənətkarın sənət dostları, kino və teatr xadimləri qatılıblar. Gecənin aparıcıları əməkdar artist Azad Şükürov və xalq artisti Həmidə Ömərova sənətkar haqqında fikirlərini bölüşmək üçün iştirakçılara söz verib. Azad Şükürov deyib ki, Həsən Əbluc Azərbaycan incəsənət aləmində özünəməxsus iz qoyan sənətkarlarındandır: “O, aktyor, rejissor, bədii qiraətçi kimi bir çox işlə məşğul olur və hər zaman da öz dəsti-xətti ilə fərqlənirdi. Bu gün Azərbaycan teatr səhnəsində onun davamçıları fəaliyyət göstərməkdədir”.

Mərhum sənətkarın qardaşı Ənvər Əbluc tədbirin keçirilməsinə görə Mədəniyyət və Turizm Nazirliyinə, həmçinin Akademik Milli Dram Teatrın rəhbərliyinə və bütün əməyi keçənlərə təşəkkür edib. “Qardaşım 18 ildir, dünyasını dəyişsə də, ruhu hər zaman bizimlədir. Çünki əsl sənətkar ölmür və Həsən Əbluc da yaradıcılığı, tamaşaları və ən əsası səsi ilə insanların ürəyində öz yerini tutub” deyə Ə.Əbluc qeyd edib.

Ədalət.-2012.-2 may.-S.8.