UZAQ, YOXSA YAXIN BALAKƏN?

(əvvəli ötən sayımızda)

Meyvəçiliyin inkişafına təkan

Rayonda soyuducu və qurutma kameralarının tikintisi ilə yanaşı meyvəçiliyin inkişaf etdirilməsinə diqqət artırılmış, yeni intensiv bağ təsərrüfatları yaradılmışdır. Rayonun Qullar kəndində fiziki şəxs M.Bazarov tərəfindən 3,1 ha sahədə meyvə bağı salınmış, Yaponiya, Hollandiya, Çexiya və ABŞ-dan 26 növ yüksək məhsuldar meyvə ağacları və tinglər gətirilərək əkilməsi təmin olunmuş, damlama üsulu ilə suvarma sistemi qurulmuşdur. Təsərrüfatda tingliyin yaradılması və inkişaf etdirilməsi istiqamətində əkin sahəsinin daha 10 hektar artırılması nəzərdə tutulur. "Balacans" MMC tərəfindən "Təpəçöl" ərazisində yeni meyvə bağları salınmış, hal-hazırda 65 ha ərazidə bağ yaradılmış və 100 hektara çatdırılması istiqamətində işlər davam etdirilir ki, bu da gələcəkdə müəssisədə meyvə şirələrinin istehsalında ekoloji təmiz xammala olan tələbatının ödənilməsinə imkan verəcəkdir.

Tikinti-quruculuq,abadlıq işləri davam edir

İlin əvvəlindən başlayaraq H.Əliyev adına mədəniyyət və istirahət parkının ərazisində və digər yerlərdə 300 ədəd ağac əkilmiş, şəhərin küçə və parklarında 800-dən çox qızıl gül kolu və 300 ədəd dekorativ ağaclar əkilmişdir.

DTXK Balakən rayon şöbəsi tərəfindən Yerquruluşu Layihə İnstitutunun nümayəndələri ilə birgə inzibati ərazi dairələrinin və inzibati ərazi vahidlərinin xəritələrinin hazırlanması işi davam etdirilmişdir. Hal-hazırda Katex, Püştətala, Talalar, Qullar kəndlərində ərazi vahidlərinin xəritələri hazırlanır. Rüb ərzində 3 iş üzrə bələdiyyələrin mülkiyyətində olan torpaq sahəsi hərraca çıxarılmışdır.

Birinci rüb ərzində respublika əhəmiyyətli avtomobil yollarına xidmət göstərilmiş, ümumilikdə asfalt-beton qarışığı ilə 871 m2, çınqıl materialı ilə 10874 m2 çala təmiri işləri görülmüşdür. Respublika əhəmiyyətli avtomobil yolunun şəhərə aid 153-154-cü kilometrində 510 m2 asfalt-beton səki quraşdırılmışdır. Rayon əhəmiyyətli avtomobil yollarında çınqıl materialı ilə ümumilikdə 24789 m2 çala təmiri işləri görülmüşdür.

Rüb ərzində yerli bələdiyyələrin vəsaiti hesabına 11,6 km uzunluğunda kəndarası yollara qum-çınqıl döşənərək qreyderlə hamarlanmış, 11,9 km uzunluğunda su kanalları və arxlar qazılmışdır. İsaxlıgirmə kəndində Mazımçay üzərində uzunluğu 50 metr olan körpünün tikintisi davam edir.

Məktəb tikintisi sahəsində 480 yerlik Xalatala, 80 yerlik Qullar-3 və 180 yerlik Katex-zavod kənd məktəbləri üçün yeni məktəb binalarının tikintisi davam edir. Nizami adına şəhər 1 saylı tam orta məktəbində əsaslı təmir işləri başa çatmaq üzrədir. Şəhər 1 və 3 saylı uşaq bağçalarında əsaslı təmir işləri aparılır. Hər iki obyektdə işlər tamamlama mərhələsindədir.

Bundan başqa, 2 saylı Qullar məktəbi üçün 220, Hənifə məktəbi üçün 480, Qazma 2 saylı məktəbi üçün 360 və Qaracabinə məktəbi üçün 80 yerlik olmaqla 4 yeni məktəbin layihələndirilməsi aparılır ki, bu məktəblərin də tikintisinə yaxın zamanda başlanacaqdır. Sevindirici haldır ki, bir neçə gün öncə daha 2 yeni məktəbin- 180 yerlik Şambul və 220 yerlik Qazbinə kənd orta məktəbləri üçün yeni binaların tikilməsi haqqında Sərəncam imzalanmışdır.

Heydər Əliyev meydanının abadlaşdırılması işləri davam edir. Prospektin yol qovşaqlarında və hasarlarda dekorativ üzlənmə işləri aparılır, sahibkarlıq obyektlərinin fasad hissələri yenidən qurulur. Şəhərdə 3 yeni şadlıq evinin tikintisi davam edir, "Balakən-1" su-elektrik stansiyasının, rayon Mədəniyyət evinin tikintisinə, M.Əsədov küçəsində 8 mənzilli yaşayış evinin əsaslı təmirinə başlanılmışdır.

"Aqrolizinq" ASC-nin Balakən rayon Aqroservis filialının, əhalinin sosial müdafiəsi mərkəzinin, rayon təhsil şöbəsinin, məcburi köçkünlər üçün çoxmənzilli yaşayış binasının və YAP rayon təşkilatının yeni inzibati binalarının tikintisi üçün torpaqayırma sənədləri hazırlanmışdır. Balakən şəhərinin su-kanalizasiya sisteminin layihələndirilməsi başa çatdırılmış, cari ilin sonunadək həmin obyektlərin tikintisinə başlanacaqdır.

Əhalinin sel sularından müdafiəsi məqsədilə birinci rübdə Mahamalar kəndi ərazisində Balakən çayının sağ sahilində 120 m3 həcmində daş-beton bəndlərdə cari təmir işləri, Balakən, Mazım və Katex çaylarında 482 min m3 həcmində çay məcralarının təmizlənməsi işləri görülmüşdür. Hazırda rayonun Acılıqbinə, Şambul, Meşəşambul, Qazbinə, Qaysa və Xalatala kəndlərində 25 km uzunluğunda təsərrüfat daxili kanalların lildən təmizlənməsi işləri aparılır və sel-sulara qarşı mübarizə tədbirləri görülür.

Mavi qaz, elektrik enerjisi və içməli su məsələləri diqqət mərkəzində

Rayonun qazlaşdırılması sahəsində əlavə olaraq 1390 evə qaz xətti çəkilməklə rayon üzrə abonent sayı 7681 nəfərə çatdırılmışdır. Rayonun Talalar, Tülü, Katex, Qazma, Püştətala kəndlərinə qaz xətlərinin çəkilməsi davam etdirilmişdır. Əhalinin içməli su ilə təminatının yaxşılaşdırılması sahəsində şəhərin Qafqaz küçəsində və Mahamalar kəndində su xətlərinin dəyişdirilməsi yekunlaşmaq üzrədir. Rayonun Gülüzanbinə yaşayış məntəqəsində 1 artezian quyusu qazılmış, Katex və Şərif kəndlərində 2 artezian quyusunun qazılmasına başlanılmış, Tülü kəndinin yeni yaşayış massivində, Şambul və Yeni Şərif kəndlərində artezian quyularının qazılması nəzərdə tutulmuşdur. Eyni zamanda, istismar olunan və yararsız vəziyyətə düşmüş 4 subartezian və 2 artezian quyusu təmir edilərək əhalinin istifadəsinə verilmişdir.

2012-ci ilin I rübü ərzində rayonda elektrik enerjisi verilişi sahəsində keyfiyyətin artırılması üçün 5 ədəd transformator əsaslı təmir edilmişdir. Yüksək və aşağı gərginlikli elektrik hava xətlərində 147 yeni dəmir beton dayaq basdırılmış, 13 ədəd 0,4 kv-luq, 1 ədəd 10 kv-luq ayırıcı quraşdırılmışdır.

Rayonda pensiyaçıların sayı 12641 nəfər, aylıq pensiya tələbatı 1676 min manat, orta aylıq pensiya məbləği 132 manat 65 qəpik olmuşdur. 01 aprel tarixə əhalinin rüblük pensiya tələbi ödənilmişdir.

3144 nəfərə sosial müavinət, 257 nəfərə təqaüd ödənilmiş, rüb ərzində ünvanlı sosial yardım təyin olunmuş 1461 ailəyə ödəniş aparılması davam etdirilmişdir. Yardım təyin olunmuş ailələrin 6263 nəfər ailə üzvü olmuş, hər ailəyə düşən yardımın orta aylıq məbləği 110 manat olmuşdur.

Təhsil, səhiyyə və mədəniyyət

Məktəblərdə və digər tədris müəssisələrində təlim-tərbiyənin keyfiyyətinin yaxşılaşdırılmasına xidmət edən tədbirlərin keçirilməsinə nəzarət artırılmışdır. Şagirdlərdə təlimə maraq oyatmaq, xüsusi istedada malik şagirdləri aşkar edib onların istedadlarını daha da inkişaf etdirmək məqsədilə şagirdlərin müxtəlif tədbirlərdə, yarış və müsabiqələrdə iştirakı təmin edilmişdir.

(ardı gələn sayımızda)

Məzahir ƏHMƏDOĞLU

Azərbaycan Respublikasının Prezidenti yanında kütləvi informasiya vasitələrinin inkişafına dövlət dəstəyi fondunun maliyyə yardımı ilə

Ədalət.-2012.-24 may.-S.7.