Lerikdən o yana haçadır yollar

(əvvəli ötən sayımızda)

Dağların dərdi – yol

Bir-iki stəkan pürrəngi çaydan sonra Miriş Xanış oğlu Şahıyevin dərdi açıldı:

- Bu yağışlar bilirsən bizə nə zülm edir? Dağlarda bu yağışın, qarın əlindən yol-iz qalmadı. Ərazimizdəki 496 kilometr kəndarası yolları daim nəzarətdə saxlamağımıza baxmayaraq əsaslı təmirə ehtiyacı var. Azərbaycan Respublikası Prezidentinin "Lerik rayonunun sosial-iqtisadi inkişafının sürətləndirilməsinə dair əlavə tədbirlər haqqında" 2012-ci il 03 aprel tarixli sərəncamı ilə Lerik-Qosmalian-Kəlvəz avtomobil yolunun tikintisi məqsədi ilə ilkin olaraq 3 milyon manat vəsait ayrılmışdır.

Əhalinin müraciətini nəzərə alan Rayon İcra Hakimiyyəti elə onların köməyi ilə Piran-Daster, 50-ci kilometr-Ağçay kəndarası avtomobil yolunun tikintisinə başlanmışdır. Nücü ərazisindəki kəndarası, Lərmərud -Masallı yolunda əsaslı təmir işlərinin qızğın çağıdır. Artıq Lərmərud -Masallı yolunun 5-ci kilometrliyində minik və yük maşınlarının hərəkəti üçün körpü inşa edilmişdir. Şingədulan, Zenoni, Ağçay kənd yollarında indi kiçik minik maşınları da rahat hərəkət edə bilir. Halbuki bir vaxtlar burda ancaq iri yük maşınlarına təsadüf etmək olardı.

Qısası, dağlarda yol saxlamaq igidlikdir desəm, mübaliğə etmərəm. Bircə dəfə babat yağışdan və ya güclü qardan sonra dağ yollarını suların necə yuduğunu görmək ağırdır. Buna baxmayaraq daxili imkanlar hesabına, sakinlərin öz gücünə xırda təmirləri özümüz aparırıq. Böyük işləri də gördüyün kimi hökumətin özü həyata keçirir.

Yeri gəlmişkən qeyd edim ki, iş qrafikinin sıx olmasına baxmayaraq "Ədalət" qəzetinin jurnalistinə vaxt ayıran Lerik rayon icra hakimiyyətinin başçısı Rövşən Bağırov da rayonun yol təsərrüfatına ayrıca fikir verildiyini vurğuladı. Əlavə etdi ki, rayonda aparılan çox böyük abadlıq-quruculuq tikinti işlərinin layiqincə, vaxtında aparılması üçün bütün qüvvələr səfərbər edilmişdir.

Həyat qayğıları ilə rəngarəngdir

Paytaxtdan, eləcə də digər şəhər və rayonlardan xeyli uzaqda-dağlarda yaşamaq doğrudan çətindir.

Qış aylarında burda yaşamaq bəlkə də qəhrəmanlıqdır. Ancaq öz el-obalarını, dağlarını, dərələrini sevən "dağlılar" bu çətinliklərdən qorxmurlar.

Lerik şəhərində və ona yaxın 6 yaşayış məntəqəsində ilk mavi qaz açılışında 2006-cı ildə Ölkə Prezidentinin özü iştirak edib. Ötən ilin dekabrından rayonun Hıramo, Yuxarı Binə, Mastayıl, Binə, Livədirgə, Murya, Qədiməküçə, Əvilə kəndlərinə qaz xətlərinin çəkilməsinə başlanmışdır. Anbu, Barzavu, Şinəband kəndlərində bu istiqamətdə işlər davam etdiriləcəkdir. Kirəvud, Gürdəsər, Hamarmeşə və digər kəndlərə mavi qazın verilməsi nəzərdə tutulub.

Rayonun elektrik təsərrüfatında vəziyyətə nəzarət etmək üçün köhnə transformatorlar təmir edilmiş və ya dəyişdirilmişdir. İstismar müddəti bitmiş elektrik dirəkləri, naqillər yenilənmişdir. Şingədulan-Zenoni-Ağçay elektrik xəttinin tikintisi yekunlaşmaq üzrədir.

Dağlara səpələnmiş uzaq kəndləri elektriklə daha yaxşı təmin etmək üçün Lerikdə 17 meqavatt elektrik gücündə olan modul tipli elektrik stansiyası inşa edilir. 30 milyon manat dəyərində olan bu dövlət müəssisəsinin tikintisi üçün 5 hektar torpaq sahəsi ayrılmışdır. Tikinti başa çatdıqdan sonra burda 80 nəfər işçi çalışacaq.

2011-ci ildə Təhsil Nazirliyi tərəfindən Hamarmeşə və Veri kənd tam orta məktəbləri tikilmişdir. Rayonun köhnə, yararsız daha 24 məktəbində 2011-2013-cü illərdə müasir məktəb binasının tikintisi aparılacaq. Züvüç, Barzavu, Aran, Davradibi, Ləkər, Daster, Kələxan kəndlərində ələbata uyğun məktəb binalarının inşasına başlanmışdır. Rayonun digər kəndlərində də bu istiqamətdə işlər aparılır.

Su aydınlıqdır, həyatdır

Ta qədimdən belə deyib babalarımız. Ancaq heç kim inanmaz ki, dağlar qoynunda yerləşən Lerik şəhərinin özündə insanlar su sarıdan zaman-zaman korluq çəkiblər. Şəhərin su təchizatını yaxşılaşdırmaq, kanalizasiya sisteminin yaradılması məqsədi ilə işə başlanmışdır. Dəyəri 22 milyon manat olan bu layihəni Türkiyənin "Gelişim Group" şirkəti həyata keçirəcək. 16569 metr məsafədən çəkilən ana su xəttinin düz 3 kilometrinin qayalıqdan keçməsinə baxmayaraq artıq 12 kilometr kanal qazılmışdır. Zuvand çayı üzərində, xəttin mənbəyində su qəbuledici məntəqə tikiləcək və ekoloji cəhətdən təmiz olan bu su Lerik şəhərinə veriləcək. Şəhərin ən yüksək nöqtəsində sutəmizləyici qurğu inşa ediləcək. Təmizlənmiş bu su nasos vasitəsilə məhəllələrdə tikiləcək 4 su anbarına vurulacaq. Beləliklə, bütün şəhər daim fasiləsiz su ilə təmin ediləcək. Mənzillərə su anbarlardan öz axarı ilə gedəcək.

3 mərhələdə reallaşacaq bu layihədə indi işlərin qızğın çağıdır. Su şəbəkəsinin tikintisində müxtəlif ölçülü borulardan istifadə edilir. Yaxın vaxtlarda burdakı işçilərin sayı 170-180 nəfərə çatacaq. Kanal toplayıcı xəttin uzunluğu 1300, kanal şəbəkəsinin uzunluğu isə 35820 metrdir. Burdakı çirkab suların öz axarı ilə sutəmizləyici qurğulara ötürülməsi baş verəcək. Həm su, həm də kanalizasiya xəttinin tikintisini 2013-cü ilin fevralında yekunlaşdırmaq planlaşdırılır.

Yazının sərlövhəsinə qoyulmuş şeir misrası isə Leriki və Azərbaycanı çox sevən lerikli şair Ağacəfər Həsənlinindir. Ağacəfər sevgisinə qoşulan:

Səxavət Məmmədli

Azərbaycan Respublikasının Prezidenti yanında kütləvi informasiya vasitələrinin inkişafına dövlət dəstəyi fondunun maliyyə yardımı ilə

Ədalət.-2012.-30 may.-S.7.