Dağlar qoynundakı Lerik

(əvvəli ötən sayımızda)

Buna baxmayaraq son illər Lerikdə yol tikintisinə ayrıca diqqət verilir. Elə Lənkərandan Lerikə uzanan 56 kilometrlik yol buna misaldır. Hal-hazırda Lerik şəhərindən Zuvand yaşayış məntəqəsinə yüksək keyfiyyətli asfalt yolun çəkilməsinin son mərhələsidir. Azərbaycan Respublikası Prezidentinin 3 aprel 2012-ci il tarixli sərəncamına əsasən tikilən bu yolun çox böyük iqtisadi-sosial mədəni əhəmiyyəti olacaqdır. Azərbaycan Respublikasının Prezident Administrasiyasının tövsiyyəsinə əsasən əhalinin daha çox istifadə etdiyi və sıx yaşadığı 36 kilometr məsafəsi olan 50-ci kilometr - Xanagah yolu barədə ilkin məlumatlar toplanmışdır. Aparılmış hərtərəfli araşdırmalar nəticəsində yol haqqında akt yazılmış, smeta sənədlər hazırlanmışdır. Müvafiq qərar qəbul edilməsindən ötrü bütün sənədlər Prezident Administrasiyasına, Nazirlər Kabinetinə təqdim edilmişdir.

Yollarla bağlı bir məsələni də qeyd etmək yerinə düşər ki, 56 kilometrlik Lənkəran-Lerik yolu son illər yağan intensiv yağışlar nəticəsində xeyli dərəcədə ziyan çəkmişdir. Yoldakı bu narahatlıqları aradan qaldırmaq üçün respublikanın bütün aidiyyəti qurumlarına Lerik rayon rəhbərliyi çoxsaylı müraciət etmişdir. Yəqin ki, yaxın vaxtlarda müraciət olunan rəsmi qurumlar bu məsləyə müsbət rəy verəcəklər.

Abadlıq işləri davam etdirilir

Lerik rayonunun kəndləri ilə bərabər şəhərin özündə də tikinti, abadlıq işləri hər gün bir az da genişləndirilir. Rayon mərkəzindəki küçə və səkilər yenidən qurulur, istinad divarları ağ lay daşlarla bəzədilir. Su ötürücüləri yeniləri ilə əvəz edildiyindən indi qəsəbədə səliqə-sahman daha çox hiss edilir.

Lerik rayon mərkəzinin əsas küçələri və onlara paralel olan digər küçələr asfaltlaşdırılıb. Bu yöndə işlər indi də davam etdirilir. Rayon mərkəzindən polis şöbəsinə qədər uzanan yolun ətrafında olan xırda tikililər iriləri ilə əvəz edilir. Onların ətrafında aparılan tikinti abadlıq işləri müasir tələblərə cavab verə bilən görkəmə salınır.

Fövqəladə Hallar Nazirliyi rayonun Molalan, Durğan, Bürsülüm kəndlərində qəza vəziyyətinə düşmüş 4 yaşayış evinin inşasına başlamışdır. Hal-hazırda işlərin qızğın çağıdır. Daha 14 belə yaşayış evinin tikintisi üçün tələb olunan texniki şərtlər, torpaqqayırma və digər sənədlər hazırlanaraq nazirliyə təqdim edilmişdir. Fövqəladə Hallar Nazirliyinin yaxın vaxtlarda bu evlərin tikintisinə də müsbət rəy verəcəyi şübhə doğurmur.

Hal-hazırda Lerik şəhərinin İ.Yaqubov, Nizami, A.Əsədullayev küçələrində yenidənqurma işləri aparılır, istinad divarları hörülür, səkilər quraşdırılır.

Yeni istehsalat müəssisələri, yeni iş yerlə

Ölkənin bütün regionlarında olduğu kimi Lerikdə də yeni istehsalat müəssisələri, sahibkarlığın inkişafı həmişə gündəmdə olan məsələlərdən biridir. Çünki, yeni təşkil edilmiş istehsalat müəssisələri yerli büdcəyə, eləcə də respublika büdcəsinə mənfəət verməklə bərabər həm də, yeni iş yerləri deməkdir.

Lənkəran-Lerik yolunun 37-ci kilometrliyində süfrə suyu və şirə istehsal edən müəssisənin davam edən tikintisi buna bariz nümunədir. İş adamı tərəfindən Lerik şəhərində əvvəllər tədarük məntəqəsi kimi fəaliyyət göstərən tikililərdə yenidənqurma, əlavə tikinti işləri aparılır. Tikintilər başa çatdırıldıqdan sonra burda mebel, plastik qapı-pəncərə istehsal olunacaq, əhaliyə digər xidmətlər göstəriləcək. Hazırda köhnə çörək zavodu müasir tələblər səviyyəsində iş adamı tərəfindən yenidən bərpa edilir. Bütün bu işlərin yekunundan sonra istehsala başlayacaq bu müəssisələrdə onlarla iş yeri açılacaqdır.

Şəhərdə yeni şadlıq sarayının, 2 mərtəbəli ictimai iaşə obyektinin tikintisi də sürətlə aparılır. Piran kəndində yumurta, ət, quş istehsalı ilə məşğul olacaq broyler fabrikinin tikintisində son tamamlama işləri aparılır. Hər gün 50 ton quş əti istehsal edəcək bu fabrikdə indi 80 nəfərdən çox lerikli işləyir. Müəssisə tam fəaliyyətə başlayandan sonra burda 150-də yuxarı daimi iş yeri yaradılacaq. Bu isə 150 nəfər ailənin ailə-məişət şəraitinin daha da yaxşılaşdırılmasına xidmət edəcək.

Daster kəndi ərazisində sahibkar tərəfindən inşasına 2007-ci ildən başlayan broyler sexi və ictimai iaşə obyekti fəaliyyətə başlamışdır. Bu müəssisədə 18 nəfər lerikli daimi işlə təmin edilmişdir.

Rayonda ictimai asayiş mükəmməl qorunur

Əvvəlcə qeyd edək ki, 2012-ci ilin 9 ayında rayon İcra Hakimiyyətinin başçısı hüquq- mühafizə orqanları, rayonda fəaliyyət göstərən idarə-müəssisə rəhbərləri ilə birlikdə səyyari qəbullar zamanı vətəndaşları fərdi qaydada qəbul etmiş və onların müraciətinə baxmışdır. Bunların nəticəsində ictimai asayişin daha yaxşı qorunması yolları və təklifləri meydana çıxmışdır.

Qeyd etmək lazımdır ki, Lerik rayonu sakit həyat tərzi keçirən rayonlarımızdandır. Rayon polis şöbəsinin cinayət-axtarışı üzrə rəis müavini, polkovnik leytenant Şahin Ağayev bildirdi ki, rayonumuzda ictimai asayişə nəzarət edilir. Narkotik və oğurluq halları demək olar ki, son həddə kimi azalmışdır. Ancaq uzun müddət axtarışda olan 1949-cu il təvəllüdlü, Lerik rayonunun Lələheyran kənd sakini Zeynəb Abdulrəhim qızı Mahmudovanın aşkarlanması üçün xeyli əziyyət çəkməli olmuşlar. 15 oktyabr 2012-ci il tarixdə Bakının Yasamal rayonunda ələ keçən bu qadın 1995-ci ildən Azərbaycan Respublikası Cinayət Məcəlləsinin 102-ci maddəsi ilə axtarışda olub. Vamazqon kənd sakinləri 1992-ci il təvəllüdlü Ülkər, Səfurə Panalı qızı Panaliyeva bacıları 2012-ci ilin 1 yanvarında evlərindən çıxıb getmişlər. Uzun müddət axtarışdan sonra məlum olub ki, qızlar Keşlə qəsəbəsində yaşayırlar. Evdən getmələrindən səbəb isə ailədəki narazılıq olub.

Enişli-yoxuşlu, dolanbac Lerik yollarında 9 ay ərzində 6 yol nəqliyyat hadisəsi alınıb. Nəticədə 2 nəfər həyatını itirmiş, 6 nəfər isə xəsarət almışdır. Qış qabaqdadır, ancaq leriklilər əmindirlər ki, onlar qarlı-şaxtalı havalarda da öz uğurlarını davam etdirəcəklər. Tikib-quracaq, inkişaf edəcək və daha yaxşı yaşayacaqlar.

Səxavət Məmmədli

Ədalət.-2012.-1 noyabr.-S.7.